OVISILA 23 - Embimbiliya - Bíblia Sagrada em Umbundu

¹ Oco Yehova wa popia la Mose hati,

² Sapuila va Isareli huti, Olofesta via Yehova vina via tukuiwa haivio vi lingaiwa lefendelo li kola, okuti ovio olofesta viange via tukuiwa, vievi:

³ Oloneke epandu wu linga upange. Puãi eteke liepanduvali olio esambata liowusa u kola, eteke liaco ku kala efendelo li kola. Ka ci tava oku lingamo upange omo olio esambata lia Yehova volonjo viene viosi.

⁴ Olofesta via Yehova vina via tukuiwa vi lingiwa lefendelo li kola koloneke via vi tukuiwila. Olofesta viaco vievi:

⁵ Kosãi yatete, keteke liekui lakuãla kosãi koñolosi ku kala o Pascoa ya Yehova.

⁶ Keteke liekui latãlo kõsai yaco haiyo ku kala ofesta ya Yehova yombolo ka yi kuete etumbisa. Oloneke epanduvali wu lia ombolo ka yi kuete etumbisa.

⁷ Keteke liatete ku kala efendelo li kola. Veteke liaco ka ci tava oku lingamo upange wovaka.

⁸ Oloneke epanduvali wu lumba lumba ku Yehova ocilumba covondalu. Keteke liepanduvali ku kala efendelo li kola. Veteke liaco ka ci tava oku lingamo upange wovaka.

⁹ Yehova yu wa popia la Mose hati,

¹⁰ Sapuila va Isareli huti, Eci wiyi vofeka ndu wihi ho unguli olomema viaco, wu nena kocitunda ocitungu covaima atete koku ungula kuene.

¹¹ Ocitunda ci yangelisa ocitungu kovaso a Yehova okuti vu taviwa. Keteke lia kuama esambata ocitunda ci ci yangelisa.

¹² Oco veteke wu yangelisa ocitungu wu lumba okameme kulume kunyamo umosi, aka ka ka kuete etondelo, ka linga ocilumba coku pia elisi coku Yehova.

¹³ Oco ocilumba caco colomema ci kale olonepa vivali viekui viefa liosema ya fina ya tengiwa lulela, ci linga ocilumba covondalu coku Yehova, ndelemba li pepa; ocilumba caco coku nyua ci kale covinyu, onepa yakuãla yohine.

¹⁴ Ko ka li ombolo pamue olukango pamue olomema vi talala toke keteke liaco, te wa neni ocilumba ku Suku yene; oco ocisila cenda hũ kovitumbulukila viene lovolonjo viene viosi.

¹⁵ Oco wu tenda asambata epanduvali oku awisa tunde keteke liaco lia kuama esambata, tunde keteke wa neni ocitungu cocilumba coku yangelisa,

¹⁶ toke keteke lia kuama esambata liepanduvali, oco wu tenda akuĩ atãlo koloneke, kuenje wu lumbila ku Yehova ocilumba colomema viokaliye.

¹⁷ Wu tundi volonjo viene loku nena olombolo vivali vioku yangelisa, haivio vi tungiwa lolonepa vivali viekui viefa; vi kale viosema ya fina, vi yokiwe letumbisa ndovaima atete a lumbiwa ku Yehova.

¹⁸ Kumue lolombolo viaco weci otumeme epanduvali tunyamo umosi ka tu kuete etondelo, lonale yimosi kuenda ovitupi vivali violomeme, vi linga ocilumba coku pia elisi coku Yehova, kumue locilumba cavio colomema kuenda ovilumba viavio vioku nyua, ocilumba covondalu celemba li pepa ku Yehova.

¹⁹ Kuenje wu lumba ocitupi cimuamue cohombo ocilumba cekandu, lotumeme tuvali tualume tunyamo umosi, ocitundasonde combembua.

²⁰ Kuenje ocitunda ci vi yangelisila kumuamue lolombolo viovaima atete ndocilumba coku yangelisa kovaso a Yehova, kumue lotumeme tuaco tuvali: vi kola ku Yehova, vi tiamẽla kocitunda.

²¹ Oco keteke liaco hailio wu imbi oluiya. Ku kala efendelo liomanu vosi. Veteke liaco ka ci tava oku lingamo upange wovaka. Oco ocisila cenda ño volonjo viene viosi kovitumbulukila viene viosi.

²² Eci wu ungula olomema viofeka yene ku ka pupulule pe pavindi epia liove, ku ka nolũle olomupuluila violomema viove; o vi silapo osuke kuenda ocingendeleyi. Ame ndi Yehova Suku yene.

²³ Yehova yu wa popia la Mose hati,

²⁴ Sapuila va Isareli, huti, Kosãi yepanduvali keteke liatete liosãi yaco ku kala owusa u kola. Eteke liaco li linga lionjivaluko. Onjivaluko yaco yi lalekiwa lolombela. Ku kala efendelo li kola liomanu vosi.

²⁵ Veteke liaco ka ci tava oku lingamo upange wovaka. Va lumba ocilumba covondalu ku Yehova.

²⁶ Oco Yehova wa popia la Mose hati,

²⁷ Haimo keteke liekui vosãi yaco yepanduvali ku kala eteke lioku tuvika akandu. Ku kala efendelo li kola liomanu vosi loku likandangiya okulia; kuenje wu lumba ocilumba covondalu ku Yehova.

²⁸ Veteke liaco ka ci tava oku lingamo upange wovaka momo eteke liaco lioku tuvika akandu, oku u likutilila kovaso a Yehova Suku yene akandu ene ha a tuvikiwa.

²⁹ Omunu nda elie nda elie ka likandangiya okulia eteke liaco o tepiwa ku vakuavo.

³⁰ Omunu waco, nda elie nda elie, o lingilamo upange veteke liaco, nda we nda we, omunu waco ndu nyõla pokati kavakuavo.

³¹ Ko ka lingi upange lakamue; oco ocisila cenda hũ kovitumbulukila viene kuenda volonjo viene viosi.

³² Li linga kokuene esambata liowusa u kola kuenje wu likandangiya okulia. Keteke liecea liosãi yaco koñolosi, tunde koñolosi toke koñolosi, wu kolisi esambata liene.

³³ Oco Yehova wa popia la Mose hati,

³⁴ Sapuila va Isareli huti, Keteke liekui latãlo kosãi yilo yepanduvali ku kala ofesta yolosinge yoku Yehova oloneke epanduvali.

³⁵ Keteke liatete ku kala efendelo li kola liomanu vosi. Veteke liaco ka ci tava oku lingamo upange.

³⁶ Oloneke epanduvali wu lumba lumba ocilumba covondalu ku Yehova. Keteke liecelãla ku kala efendelo li kola liomanu vosi. Vu lumbila Yehova ocilumba covondalu. Olio liu lingila eteke lioku liuvika. Veteke liaco ka ci tava oku lingamo upange wovaka.

³⁷ Evi ovio olofesta via Yehova via tukuiwa. Wu vi imbila oluiya luefendelo li kola liomanu vosi. Kolofesta viaco oko vu lumbila Yehova ocilumba covondalu locilumba coku pia elisi, ocilumba colomema, ocitundasonde, lovilumba viokunyua, ocilumba leteke liaco, ocilumba leteke liaco.

³⁸ Olofesta viaco vi vandekiwa kawusa asambata a Yehova. Lovilumba viaco vi vandekiwa kolombanjaile viene lokovilumba violohuminyo viene viosi, kuenda kovilumba viene viosi viocipango vina wecaeci ale ku Yehova.

³⁹ Keteke liekui latãlo kosãi yepanduvali, eci wonguli ale ovaima ofeka, wu kala lofesta ya Yehova oloneke epanduvali. Keteke liatete ku kala owusa u kola loketeke liecelãla ku kala owusa u kola.

⁴⁰ Oco keteke liatete wu nyañula apako oviti via posoka, ovianja vieva kuenda ovianja vioviti via pulika, lavunje olondui, oco wu yolele oloneke epanduvali kovaso a Yehova Suku yene.

⁴¹ Kuenje wu kala lofesta yaco ya Yehova oloneke epanduvali vunyamo; oco ocisila cenda hũ kovitumbulukila viene, wu kala kala lavo kosãi yepanduvali.

⁴² Wu tumãla volosinge oloneke epanduvali; olonyitiwe viosi via Isareli vi tumãla volosinge;

⁴³ oco ovitumbulukila viene vi kulĩhe ndeci nda tumãlisile va Isareli volosinge eci nda vopa vofeka ye Egito. Ame ndi Yehova Suku yene.

⁴⁴ Oco Mose wa sapuila va Isareli olofesta via Yehova via tukuiwa.