OVISILA 22 - Embimbiliya - Bíblia Sagrada em Umbundu

¹ Yehova yu wa popia la Mose hati,

² Sapuila Arone lomãla vaye okuti va litepa lovina vi kola via va Isareli, vina va tumbika kokuange okuti ka va sami onduko yange yi kola. Ame ndi Yehova.

³ Popia lavo huti, Wosi omunu ukuambuto yene yosi kovitumbulukila viene viosi, nda elie nda elie, amẽla kovina vi kola, evi va Isareli va tumbika ku Yehova, osimbu a vĩhĩsua, omunu waco o tepiwa kovaso ange. Ame ndi Yehova.

⁴ Omunu wosi ukuambuto ya Arone, nda elie nda elie, ukuavilundu pamue yu o pita cimue ketimba, ka ka lie kovina vi kola toke o yelisua. Ndaño u o lamba cimue ca vĩhĩsua locivimbi, pamue ulume olucito luaye luo tunda;

⁵ pamue wosi o lamba cimue ci likoka posi ci tẽla oku u vĩhĩsa, pamue omunu o tela oku u vĩhĩsa, okuvĩhĩsua kuaye nda kue nda kue;

⁶ u o lamba cimue ca soka ndeci o vĩhĩsua toke koñolosi, oco ka ka lie kovina vi kola te nda wa yua vovava.

⁷ Kuenje eci ekumbi liñila oco a yela; noke oco a lia kovina vi kola, momo ovio okulia kuaye.

⁸ Eci ca lifila oco muẽle pamue ceci ca kuatiwa locinyama ka ka ci lie ha lĩvĩhisa laco. Ame ndi Yehova.

⁹ Oco va patekele ocikundi cange, sanga va kala longole yovina viaco kuenje va fa laco nda va ci sama. Ame ndi Yehova ndukuaku va kolisa.

¹⁰ Lomue ocingendeleyi ka ka lie eci ci kola; ukombe wocitunda, pamue ukuopange waye, ka ka lie kueci ci kola.

¹¹ Puãi nda ocitunda ci landa omunu loseo yolombongo viaye, omunu waco o lialiako; kuenda ava va citiwila konjo yaye va lialia kokulia kuaye.

¹² Nda omõla ocitunda ukãi o likuela locingendeleyi, ka ka lie kovilumba viovina vi kola.

¹³ Puãi nda omõla ocitunda ukãi o kasi ocimbumba, pamue wa nyaliwa kuenda ka kuete omõla yu wa tiukila kepata lie isiaye ndeci vufeko, eye o tẽla oku lialia okulia kua isiaye. Puãi ocingendeleyi ka ci ka lieko.

¹⁴ Kuenje nda omunu o lia lonumbi kueci ci kola, o vandekako onepa yatãlo loku eca kocitunda eci ci kola.

¹⁵ Ovitunda ka vi ka samise ovina vi kola via va Isareli vina vi va lumbaila ku Yehova,

¹⁶ sanga vi va vetisa ekandu leko eci va lia ovina viavo vi kola. Momo ame ndi Yehova ndukuaku va kolisa.

¹⁷ Oco Yehova wa popia la Mose hati,

¹⁸ Popia la Arone lomãla vaye kuenda va Isareli vosi huti, Eci umue ukuepata lia Isareli, pamue ocingendeleyi vi Isareli, a nena ocilumba caye, ci kale colohuminyo, ci kale cocipango, vina va lumbila ku Yehova ndocilumba coku pia elisi,

¹⁹ a nene eci culume ka ci kuete etondelo, pamue colongombe pamue colomeme pamue colohombo, oco ci taviwa.

²⁰ Ka ci tava oku lumba eci ci kuete etondelo, omo ka cu taviwila.

²¹ Eci umue a lumba ku Yehova ocitundasonde combembua ha tẽlisa ohuminyo yaye, pamue o lumba ocilumba cocipango, ci kale ongombe, ci kale omeme pamue ohombo, ocinyama caco ci ñuaime oco ci taviwa; ka ci ka kale letondelo.

²² Ovinyama viupeke pamue vievi via teka pamue viovinimbaile, pamue vievi vi kasi lovipumbu, pamue vievi vi kuete olohala, pamue vievi vi kuete ovingupi, ko ka vi lumbi ku Yehova, pamue oku vi nena ku Yehova ndocilumba covondalu kilu liutala.

²³ Onale pamue omeme yi kasi locimatamata cimue ca vandekako pamue ca kambapo, oku yi lumba ocilumba cocipango, ci tava, puãi oku yi lumba ocilumba cohuminyo ka ci tava.

²⁴ Ocinyama ci kasi lapuãla a punyulũha pamue a sasõha pamue a tuika pamue a tetiwa, ka ci tava oku ci lumba ku Yehova vofeka yene.

²⁵ Ovinyama via lemãla ndomo, haivio via landiwa kukualofeka, laviovo ka ci tava oku vi lumba ndokulia kua Suku yene. Omo uvi wavio haimo u kasi omo vi kuete etondelo, oco ka viu taviwi.

²⁶ Yehova yu wa popia la Mose hati,

²⁷ Eci onale pamue omeme pamue ohombo yi citiwa, yi kala la inaco oloneke epanduvali. Oco tunde keteke liecelãla kuenje kovaso yaco yi taviwa oku lumba ndocilumba covondalu ku Yehova.

²⁸ Kuenje ndaño onjindi yongombe pamue omange yomeme ka yipaiwaila kumuamue lomõlaco okuti kavali kavio keteke liongongo.

²⁹ Eci wu lumbila Yehova ocilumba colopandu, wu lumba ndeci ci taviwa.

³⁰ Keteke liaco hailio ci liwa. Ko ka yumbuli cimue toke komẽle. Ame ndi Yehova.

³¹ Oco wu patekela ovihandeleko viange ho vi lingaingi. Ame ndi Yehova.

³² Ko ka sami onduko yange yi kola, ame puãi ñolisua pokati ka va Isareli. Ame ndi Yehova ndu kolisi,

³³ ndo wupi kofeka ye Egito si lingi Suku yene. Ame ndi Yehova.