OVISILA 21 - Embimbiliya - Bíblia Sagrada em Umbundu

¹ Oco Yehova wa popia la Mose hati, Popia lovitunda omãla va Arone. Popia lavo huti, Lumue a limbe koku livĩhĩsa omo pokati kepata liaye pa fa umue,

² te nda ngandiaye muẽle yo ndõ, pamue inaye, pamue isiaye, pamue omõlaye ulume, pamue omõlaye, ukãi, pamue manjaye ulume.

³ Kuenda mukãi waye ufeko o kasi ocipepi laye omo ka kasi lulume, nda eye o fa ci tava oku livihisa.

⁴ Eye ka ka livihise ha lisepuisa, omo haeye ukulu pokati kavakuavo.

⁵ Ka va ka lipemũle asenya kovitue viavo, ka va ka pemũle avindi olonjele viavo, pamue oku litanda katimba avo.

⁶ Va kola ku Suku yavo, ka va ka same onduko ya Suku yavo; momo ovo vakuakulumbila ovilumba via Yehova viovondalu, haivio okulia kua Suku yavo; oco va kola.

⁷ Ka va ka kuele ukai okahonga, pamue yu wa sepula; ndaño ukãi wa nyaliwa la veyaye ka va ko kuele; omo eye ocitunda o kola ku Suku yaye.

⁸ Ove u kolisa momo o lumba lumba okulia kua Suku yove; kokuove eye o kola, momo ame ndi Yehova ndukuaku u kolisa, haime ñola.

⁹ Kuenda omõla ocitunda ukãi nda o lisepuisa loku linga ukahonga, ca lomboloka okuti wa sepuisa isiaye; a yokiwe londalu.

¹⁰ Ocitunda ci kasi ndukulu pokati kavamanjaye, okuti kutue waye kua itilua ulela woku waveka, haeye ihiwa ocikundi okuti o tẽla oku wala uwalo waco, ka ka salũlũle ocifuko cokutue waye, ka ka kesule uwalo waye;

¹¹ ka ka ende kocivimbi, ka ka livĩhĩsile ndaño isiaye pamue inaye;

¹² ka ka tunde vocitumãlo ci kola oku sama ocitumãlo ci kola ca Suku yaye; momo ocifuto culela wokuwaveka kua Suku yaye ci kasi kokuaye. Ame ndi Yehova.

¹³ A kuele ufeko wosombo.

¹⁴ Ukãi ocimbumba, ndaño u wa nyaliwa, pamue ukãi wa sepuka haeye okahonga ka ka va kuele; puãi a kuele ufeko wosombo ukuepata liavo.

¹⁵ Ka ka sepuise ombuto yaye pokati kavakuavo. Momo ame ndi Yehova ndu kolisa.

¹⁶ Oco Yehova wa popia la Mose hati,

¹⁷ Popia la Arone huti, Wosi omunu ukuambuto yove kovitumbulukila viavo viosi, nda elie nda elie, o kasi letondelo, ka ka ame ocipepi oku lumba okulia kua Suku yaye.

¹⁸ Momo omunu wosi, nda elie nda elie, o kasi letondelo ka ka ame; ndeci omeke, pamue ocilema, pamue u o kasi lenyũlu lia tuwa ondimba, pamue o kasi leci ca vandekako,

¹⁹ pamue waco wa kumbuka omãi, pamue wa kumbuka eka,

²⁰ pamue ukuañoño, pamue okaholototo, pamue u o kasi lonende viso, pamue u o kuete ocimumusu, pamue ovingupi, pamue o kasi lapuãla a tuika.

²¹ Lomue ukuambuto ya Arone ocitunda o kuete etondelo ka ka ame oku lumba ovilumba via Yehova viovondalu. Omo o kuete etondelo oco ka ka amẽle oku lumba okulia kua Suku yaye.

²² O lia ño okulia kua Suku yaye, nda eci ci kola enene nda eci ci sule.

²³ Cinene lika, ka ka iñile kongumbo, ka ka amẽle kutala omo o kasi letondelo, sanga o sama ovitumãlo viange vi kola. Momo ame ndi Yehova ndi va kolisa.

²⁴ Haico Mose a popia la Arone kuenda omãla vaye la va Isareli vosi.