OVISILA 20 - Embimbiliya - Bíblia Sagrada em Umbundu

¹ Yehova wa popia la Mose hati,

² Sapuila va Isareli huti, Nda ci kala elie nda elie pokati ka va Isareli, pamue pokati kovingendeleyi via tunga vo Isareli, okuti eca omãla vaye ku Moleke, omunu waco ipaiwa muẽle; omanu vakuafeka vo sosola lovawe.

³ Lamevo nyumãlĩsila ocipala cange komunu waco, ndu tepa ku vakuavo, momo wa eca omãla vaye ku Moleke, wa vĩhĩsa ocitumãlo cange ci kola kuenje wa sama onduko yange yi kola.

⁴ Kuenje nda omanu vakuafeka vo patela ovaso avo omunu waco, eci a eca omãla vaye ku Moleke kuenje ka vo wipaila,

⁵ oco ame muẽle nyumãlĩsila ocipala cange omunu waco kuenda epata liavo, ndu tepa ku vakuavo eye muẽle kuenda ava vosi vo kuama ha va lingi vakuokahonga, oku linga la Moleke ukahonga.

⁶ Nda omunu waco o tiamẽla ku vakuakusingila, kuenda ku vakuakutãha, ha lingi lavo ukahonga, nyumãlĩsila omunu waco ocipala cange, ndu tepa ku vakuavo.

⁷ Oco liyelisi ho koli, omo ame ndi Yehova Suku yene.

⁸ Patekeli ovisila viange loku vi lingainga. Ame ndi Yehova ndukuaku u kolisi.

⁹ Omo wosi o siñala isiaye pamue inaye eye ipaiwa muẽle; u wa siñala isiaye pamue inaye oco osonde yaye yu vata.

¹⁰ Nda ulume o pekela lukãi wokuavo, lulume kuenda ukãi kavali kavo vakuovaisi, va ipaiwa muẽle.

¹¹ Ulume o pekela lukãi wa isiaye ca lomboloka okuti wa sikũlũla isiaye ha kala epõlõla, kavali kavo va ipaiwa muẽle; osonde yavo yi va wila.

¹² Nda ulume o pekela lukãi womolaye kavali kavo va ipaiwa muẽle; va linga akutisasõi; osonde yavo yi va wila.

¹³ Nda ulume o pekelisa ulume ndeci ukãi, kavali kavo va linga umbondo; va ipaiwa muẽle; osonde yavo yi va wila.

¹⁴ Nda ulume o nyañula ukãi la inaco, oco evĩho li kola; va yokiwe londalu, eye lovo, oco ka pa ka kale pokati kene evĩho li kola.

¹⁵ Nda ulume o pekela locinyama ipaiwa muẽle; wipayivo ocinyama caco.

¹⁶ Nda ukãi amẽla kocinyama hã ha pekela laco, wipayi ukãi kuenda ocinyama caco, va ipaiwa muẽle; osonde yavo yi va wila.

¹⁷ Nda ulume o nyañula mukãi waye, omõla a isiaye pamue omõla a inaye, hã ho tali eci a kasi epõlõla, leye ukãi ho talivo eci a kasi epõlõla, oco ci linga osõi; kuenje va tepiwa kovaso omãla vakuavo; wa sikũlũla mukãi waye ha kala epõlõla; o kala ño longole yaye.

¹⁸ Nda ulume o pekela lukãi o kasi lofuko, ho sikũlũla ha kala epõlõla eye wa sikũlũla ono yaye, kuenda ukãi wa sikũlũla ono yosonde yaye: kavali kavo va tepiwa ku vakuavo.

¹⁹ Ku ka sikũlũle manja nyoho ha kala epõlõla, ndaño sohayi yove manja so; momo wa sikũlũla ngandiaye; va kala ño longole yavo.

²⁰ Nda ulume o pekela lukãi waisiaye yumãlẽhe wa sikũlũla isiaye ha kala epõlõla; va ambata ekandu liavo; va fa, lomõla mbu.

²¹ Nda ulume o nyañula ukãi wamanjaye, oco ca vĩha; wa sikũlũla manjaye ha kala epõlõla; ka va mõli omõla.

²² Oco patekeli ovisila viange viosi lovihõlo viange viosi ho vi lingaingi, sanga ofeka oko ndu tuali oku tungamo yu sanji.

²³ Ko ka endaendi lolombilo viavakuafeka ndi va tundisila kovaso ene, momo va lingaile ovina evi viosi, oco va ndingisa onyanya.

²⁴ Puãi nda popia lene siti, Wu piñala ofeka yavo, kuenda ndi yeca kokuene ho yi fuki, ofeka yi tumõha lasenjele lowiki. Ame ndi Yehova Suku yene ndo punguli kolofeka.

²⁵ Oco, tepisi pokati kocinyama ci yela leci ca liña, pokati kolonjila via liña levi vi yela, kuenje ko ka vĩhĩsi ovimuenyo viene lumbondo wocinyama, pamue onjila pamue levi viñi vi likoka posi, nda vi tepisa kokuene siti via liña.

²⁶ Oco ene wu linga vange, wu kola, momo ame ndi Yehova ñola, ndo tepisi kolofeka ho lingi vange.

²⁷ Kuenda vali ulume pamue ukãi ukuakusingila, pamue ukuakutãha, ipaiwa muẽle; va va sosole lovawe; osonde yavo yi va wila.