OVISILA 2 - Embimbiliya - Bíblia Sagrada em Umbundu

¹ Nda omunu o nena ku Yehova ocilumba colomema, ocilumba caye ci kale cosema ya fina. Muẽle itilako ulela, o kapako insensu.

² O ci nena komãla va Arone, ovo ovitunda. Oco o yoyamo epupu liosema yaco ya fina lulela kuenda insensu viaco viosi. Ocitunda o yi yokela kutala ndonjivaluko yaco, ocilumba covondalu, celemba li pepa ku Yehova.

³ Kuenje eci ci supa kocilumba colomema ci linga ca Arone lomãla vaye valume. Oco ci kola ca piãla pokati kovilumba via Yehova viovondalu.

⁴ Kuenje eci ove o nena ocilumba colomema ca yokiwila vofolono, ci kale otuakende tuosema ya fina ya tengiwa lulela, ka tu kuete etumbisa, pamue otuakende tua pelevala ka tu kuete etumbisa, tua sieketiwa lulela.

⁵ Nda ocilumba cove ci linga ocilumba colomema ca yokiwila pelonga, ci kale cosema ya fina ka yi kuete etumbisa, ya tengiwa lulela.

⁶ O ci timbula, kuenda witilako ulela, oco ocilumba colomema.

⁷ Nda ocilumba cove ci linga ocilumba colomema ca yokiwila pociyo, ci kale cosema ya fina ya tengiwa lulela.

⁸ O nena ocilumba colomema ca tungiwa lovina evi ku Yehova kuenje ceciwa kocitunda, eye o ci nena kutala.

⁹ Kuenje ocitunda cupa kocilumba caco colomema onjivaluiso yaco, ci yi yokela kutala, ocilumba covondalu, celemba li pepa ku Yehova.

¹⁰ Oco caco ci sialapo cocilumba colomema ci linga ca Arone lomãla vaye valume. Oco ci kola ca piãla pokati kovilumba via Yehova viovondalu.

¹¹ Ka ci tava okuti vocilumba colomema ci neniwa ku Yehova mu tengiwa etumbisa, momo ka ci tava oku yoka etumbisa pamue owiki ndocilumba covondalu ku Yehova.

¹² Oku vi nena ku Yehova ndocilumba covaima atete ci tava. Puãi oku vi yokela kutala okuti ku tunda elemba li pepa oco ka ci tava.

¹³ Ovilumba viove viosi violomema o vi singa omongua. Ka ci tava okuti omongua wocisila wa lisila la Suku yove u kamba kocilumba cove colomema. O kapa omongua vovilumba viove viosi.

¹⁴ Nda o tuala ku Yehova ocilumba colomema viovaima atete ocilumba caco colomema viovaima atete ci kale olomema via sopuiwa haivio via tunda kovasa epungu li talala. Ocimbuka caco ci yokiwe.

¹⁵ Witilako ulela loku kapako insensu; oco ocilumba colomema.

¹⁶ Ocitunda ci yoka kamue kocimbuka caco ndonjivaluko yaco. Ci ka yoka kumue lulela waco kuenda insensu. Oco ocilumba covondalu coku Yehova.