OVISILA 19 - Embimbiliya - Bíblia Sagrada em Umbundu

¹ Oco Yehova wa popia la Mose hati,

² Popia la va Isareli vosi, huti, Ene u koli momo ame ndi Yehova Suku yene ñola.

³ Vosi omunu omunu a sumbile inaye la isiaye, kuenda vu kolisa asambata ange. Ame ndi Yehova Suku yene.

⁴ Ko ka sokolokeli kovina viaño pamue oku lilulikila olosuku viutale wa itilua. Ame ndi Yehova Suku yene.

⁵ Nda wu lumba ocitundasonde combembua ku Yehova ci lumbi ndomo cu taviwila.

⁶ Ci liwe eteke wu ci lumba kuenda vali ko hẽla yaco. Nda cimue ci sialapo toke keteke liatatu, ci yokiwa londalu.

⁷ Nda kamue ka liwa keteke liatatu, ndaño katito, ci lingisa onyanya, ka ci taviwa.

⁸ Kuenje wosi o liako enda longole yaye momo wa sama kueci ci kola ca Yehova. Lomunu waco o tepiwa ku vakuavo.

⁹ Kuenje eci wunguli olomema viofeka yene, ku kongule pe kavindi epia liove, kuenda vali ku ka nolũle olomupuluila violomema viove.

¹⁰ Ku ka pupulule vocumbo cove cayuva; ku kongolole epako liocumbo cove cayuva lia lokila posi, o vi silapo osuke ocingendeleyi. Ame ndi Yehova Suku yene.

¹¹ Ko ka ivi; ko ka liañi; ko ka likembi pokati kene.

¹² Ko ka lisingi londuko yange loku kemba, loku sama onduko ya Suku yove. Ame ndi Yehova.

¹³ Ku ka talise ohali u o lisingue love, pamue oku u punda. Ofeto yukuopange ka yi ka kale love uteke wosi toke komẽle.

¹⁴ Ku ka siñale ocisitatuĩ; ku ka imbile ocilondokua kovaso omeke; puãi sumbila Suku yove. Ame ndi Yehova.

¹⁵ Ko ka tetuluili oku pengisa; ko ka sumbili ocipala cosuke, ku ka kemainye ocipala cekope; puãi tetuluila ukuẽle lesunga.

¹⁶ Ku ka endaende pokati ka vakuẽle loku endisa olombonde. Ku ka lundile ukuẽle huti, Wa pia osonde. Ame ndi Yehova.

¹⁷ Ku ka suvukile ukuẽle vutima wove; ocili o lemẽla u o lisungue love, puãi ku ka lituike ekandu liaye.

¹⁸ Ku ka fetuluinye, ku ka kale locikumbiti cokomãla vofeka yove; sola puãi u o lisungue love ndeci o lisola ove muẽle. Ame ndi Yehova.

¹⁹ Patekela ovisila viange. Ku ka tave okuti ovinyama viove vi cita lombuto yiñi. Ku ka kũle pamuamue vepia liove olombuto vivali viocitengasova. Ku ka wale onanga ya tutiwa lovina vivali via tengiwa apumumu.

²⁰ Kuenje nda umue o pekelisa ukãi upika wa lombiwa lulume, ka yowiwile, ka vo panduluile, ondaka yavo yi sokiyiwe, ka va ka ipaiwe omo ukãi ka kaile omamãle.

²¹ Ulume a nene ku Yehova ocilumba caye ceko kuvelo wombalaka yoku ñualehela la Yehova, oco omanga ndocilumba ceko.

²² Oco ocitunda cu likutilila kovaso a Yehova lomanga yocilumba ceko ha tuvika ekandu liaye a linga, kuenje ekandu a linga liu wecelua.

²³ Eci wiñili vofeka kuenda wu kũla oviti violombuto viosi viokulia, apako ofeka yaco a lemeliwa kokuene, a lemeliwa muẽle anyamo atatu. Ka ci tava oku a lia.

²⁴ Puãi kunyamo wakuãla apako osi ofeka yaco a kola, a linge ocilumba cesivayo ku Yehova.

²⁵ Puãi kunyamo watãlo ci tava ño oku lia apako aco oco oviti viu wimili ca velapo. Ame ndi Yehova Suku yene.

²⁶ Ko ka li cimue losonde yaco. Ko ka lingi vakuombanda, ndaño oku sumbila owima.

²⁷ Ko ka pemũli avindi ovitue viene; ko ka salũli avindi olonjele viove.

²⁸ Ko ka litandi katimba ene nda umue wene wa fa. Ko ka litisi olombumba katimba ene. Ame ndi Yehova.

²⁹ Ku ka samise omõlove ukãi hu lingisa ocipuepue, sanga ofeka yi tiama kukahonga, ha yi yuka evĩho.

³⁰ Wu lava asambata ange kuenda oku sumbila ocitumãlo cange ci kola. Ame ndi Yehova.

³¹ Ko ka tiami ku vakuakusingila pamue ku vakuakutãha; ko ka va sandi okuti we livihisa lavo. Ame ndi Yehova Suku yene.

³² Votokela kovaso u o kuete owele, sumbila ocipala cekongo; sumbila Suku yove. Ame ndi Yehova.

³³ Nda ocingendeleyi ci tunga love vofeka yove, ku ka ci linge lãvi.

³⁴ Ocingendeleyi ca tunga lene ci kale lene ndonyitiwe pokati kene, kuenda vu u sola ndeci vu lisola ene muẽle, momo lenevo wa kaili ovingendeleyi vofeka ye Egito. Ame ndi Yehova Suku yene.

³⁵ Ko ka pengisi esunga poku seteka usõvi lo poku pesalisa, ndaño poku yonga.

³⁶ Olombalãsa viocili, olonjongo viocili, efa liocili, kuenda ohine yocili, ovio vu kala lavio. Ame ndi Yehova Suku yene ndo wupi vofeka ye Egito.

³⁷ Oco wu limbuka ovisila viange viosi kuenda ovihõlo viange viosi ho vi lingaingi. Ame ndi Yehova.