OVISILA 18 - Embimbiliya - Bíblia Sagrada em Umbundu

¹ Yehova wa popia la Mose hati,

² Popia la va Isareli huti, ame ndi Yehova Suku yene.

³ Oco ka ci tava ene oku linga ndeci va Egito, oko wa tungili, va lingainga; ka ci tavavo ene ku linga ndeci va Kanana omu ñasi oku u tuali, va lingainga. Ka ci tava oku lingainga ovisila viavo.

⁴ Ovihõlo viange lovisila viange ovio vu lingainga loku tẽlisa loku endaenda lavio. Ame ndi Yehova Suku yene.

⁵ Oco vu tẽlisa ovisila viange lovihõlo viange, ame ndi Yehova. Omunu wosi o vi lingainga o kuata lavio omuenyo.

⁶ Lomue kokuene ka ka kokele ocipepi lu ositue laye ho sikũlũla ha kala epõlõla; ame ndi Yehova.

⁷ So ku ko sikũlũle ndaño nyõho, ha kala epõlõla, momo nda ca lomboloka okuti wa sikũlũla nyõho; ku ka sikũlũle nyõho ha kala epõlõla.

⁸ Ukãi waso ku ko sikũlũle ha kala epõlõla; epõlõla liaye epõlõla liaso.

⁹ Mukãi wove, omõla aso pamue omõla a nyõho, nda wa citiwa vimbo liaye, nda wa citiwa kumue kuiñi, ku ka va sikũlũle ha va kala epõlõla.

¹⁰ Onekulu yove yukãi, omõla omõlove ulume pamue omõla omõlove ukãi, ku ka va sikũlũle ha va kala epõlõla. Epõlõla liavo hailio epõlõla liove muẽle.

¹¹ Omõla a nyõha yokatumba, wa citiwa laso haeye mukãi wove, ku ko sikũlũle ha kala epõlõla.

¹² Sohãyi yove mukãi waso ku ko sikũlũle ha kala epõlõla, momo eye ngandi aso.

¹³ Nyõho yumalẽhe ku ko sikũlũle ha kala epõlõla, momo eye ngandi a nyõho.

¹⁴ So yumalẽhe ku ko sikũlũle ha kala epõlõla, ku ka kokele kukãi waye momo nyõho muẽle.

¹⁵ Ndatembo yove ku ko sikũlũle ha kala epõlõla; eye ukãi womõlove; ku ko sikũlũle ha kala epõlõla.

¹⁶ Ukãi wa manjove ku ko sikũlũle ha kala epõlõla momo epõlõla liaye epõlõla liamanjove.

¹⁷ Ukãi kuenda omõlaye ukãi ku ka va sikũlũle ha va kala epõlõla; ku ka tambule onekulu yaye yukãi, okuti omõla omõlaye ulume pamue omõla omõlaye ukãi oku u sikũlũla ha kala epõlõla; momo ovo vangandiaye, ci kola calua.

¹⁸ Ku ka kuele oluvale ukãi la manjaye, ha va lingi olosepakãi, okuti ove o sikũlũla umue ha kala epõlõla osimbu ukuavo a kasi lomuenyo.

¹⁹ Ku ka kokele kukãi hu sikũlũla ha kala epõlõla, osimbu a kasi lofuko yaye yu wa vĩhĩsua.

²⁰ Ku ka pekele kukãi wokuene hu livĩhĩsa laye.

²¹ Ku ka ece omãla vove oku va imba vondalu ya Moleke, ku ka same onduko ya Suku yove; ame ndi Yehova.

²² Ku ka pekele lulume ndeci va pekela lukãi, oco umbondo.

²³ Ku ka pekele locinyama oku livĩhĩsa laco. Ukãi ka ka talame kovaso ocinyama ha pekelisua laco, oco oku sama.

²⁴ Ko ka livĩhĩsi lovina evi viosi, momo olofeka evi ñasi loku tundisa kovaso ene ovio ovina va livĩhĩsa lavio.

²⁵ Oco ofeka ya vĩhĩsa okuti nda yi yambuila ongole yayo kuenda ofeka yi sanja olonungi viayo.

²⁶ Ene puãi vu lingainga ovisila viange lovihõlo viange, kuenje ko lingainga ovina evi viumbondo, ci kale onyitiwe yofeka, ci kale ocingendeleyi ca tunga pokati kene.

²⁷ Momo omanu va livanga oku tunga vofeka va linga umbondo waco wosi kuenje ofeka ya vĩhĩsua.

²⁸ Ene puãi ko ka lingaingi ovina viumbondo sanga, eci vu yi vĩhĩsa, ofeka yi vu sanja ndeci ya sanja omanu vaco va kalale osimbu ene ka weyili.

²⁹ Momo vosi va linga cimue covina evi viumbondo, ava muẽle va vi linga, va tepiwa ku vakuavo.

³⁰ Oco patekeli ocikundi cange kuenda ko ka lingi cimue colombilo evi viumbondo va vi lingaila konyima yene, ko ka livĩhĩsi lavio. Ame ndi Yehova Suku yene.