OVISILA 17 - Embimbiliya - Bíblia Sagrada em Umbundu

¹ Oco Yehova wa popia la Mose hati,

² Popia la Arone kuenda omãla vaye la va Isareli vosi huti, Ca tuma Yehova okuti ci lingiwa ceci:

³ Nda umue ukuepata lia Isareli ipalela ongombe pamue okameme pamue ohombo vocilombo, pamue o yipalela kofeka,

⁴ puãi ka yi nena kuvelo wombalaka yoku ñualẽhẽla la Yehova oku yi lumbila ku Yehova ndocilumba kovaso yotavernakulu ya Yehova, omunu waco o pia eko liosonde momo wa pesela osonde. Omunu waco o tepiwa ku vakuavo.

⁵ Ci lingiwa okuti va Isareli va nena nena ku Yehova ovilumba viavo vina va vipãlela vusenge waño. Va vi nene kocitunda kuvelo wombalaka yoku ñualehela la Yehova. Va vi lumba ku Yehova ndocitundasonde combembua.

⁶ Kuenje ocitunda ci nyila osonde yaco kutala wa Yehova kuvelo wombalaka yoku ñualẽhẽla la Yehova. Ulela waco cu yoka ha ci lingi elemba li pepa ku Yehova.

⁷ Oco ka va lumbila vali ovilumba viavo kolondele, oku linga lavio ukahonga. Cilo ci linga ocisila cavo cenda hũ kovitumbulukila viavo viosi.

⁸ Va sapuila huti, Omunu wosi ukuepata lia Isareli pamue kovingendeleyi via tunga pokati kavo, o lumba ocilumba coku pia elisi pamue ocitundasonde,

⁹ puãi ka ci nena kuvelo wombalaka yoku ñualehela la Yehova ha ci lumbi ku Yehova, omunu waco o tepiwa ku vakuavo.

¹⁰ Omunu wosi ukuepata lia Isareli pamue kovingendeleyi via tunga pokati kavo, o lia osonde, nda ye nda ye, nyumalĩsila ocipala cange komunu waco o lia osonde kuenje ndu tepisa ku vakuavo.

¹¹ Momo omuenyo wetimba u kasi vosonde kuenje nda yecela kokuene kutala oku likutilila layo ovimuenyo viene, omo osonde oyo yi tuvaika momo oyo yi kuete omuenyo.

¹² Oco nda popia la va Isareli siti, lomue pokati kene ka ka lie osonde, ndaño ocingendeleyi ca tunga pokati kene ka ci ka lie osonde.

¹³ Kuenje omunu wosi u Isareli pamue kocingendeleyi cosi ca tunga pokati ka va Isareli, nda poku yeva o kuata ocinyama vonjevo pamue onjila, evi vi tava oku liwa, osonde yaco o yi pesela kuenje o yi lembika leve.

¹⁴ Momo omuenyo watimba osi osonde yao. Oco nda popela la va Isareli siti, Ko ka li osonde yetimba, nda lie nda lie, momo omuenyo watimba osi osonde yao, wosi o yi lia o tepiwa ku vakuavo.

¹⁵ Omunu wosi o lia eci ca lifila pamue ceci ca kuatiwa locinyama, ci kale onyitiwe yofeka, ci kale ocingendeleyi, o sukula uwalo waye, o yua kuenje o vĩhĩsua toke koñolosi; oco a yela noke.

¹⁶ Puãi nda ka sukula uwalo pamue ka yui, o kala ño longole yaye.