OVISILA 16 - Embimbiliya - Bíblia Sagrada em Umbundu

¹ Oco Yehova wa popia la Mose kovaso yokufa kuomãla vavali va Arone, eci vamẽla ku Yehova kuenje va fa.

² Yehova yu wa popia la Mose hati, Popia la huvove Arone huti, Oloneke viosi ka ci tava oku iñila vohondo yi kola vokati kongumbo, kovaso yomangu yohenda yi kasi kilu liocikasia, sanga o fa. Momo ame mõlẽhela velende kilu liomangu yohenda.

³ Puãi Arone iyaiya mulo mu kola lovina evi: onale ndocilumba cekandu, lomanga ndocilumba coku pia elisi.

⁴ O wala ocikutu ci kola covalatanya, lovikasãu viovalatanya vi waliwa ketimba, o litika luvia wovalatanya, o kapa ekofue liovalatanya; ovio vi linga uwalo waco u kola. O yua hã ha vi wala.

⁵ Kuenje o tambula ku va Isareli ovitupi vivali violohombo vocilumba cekandu, kuenda omange yimue yi linga ocilumba coku pia elisi.

⁶ Kuenje Arone o nena onale yaco yocilumba cekandu, oco caye, hã ha likutilila eye muẽle kuenda onjo yaye oku tuvika akandu avo.

⁷ Oco o nyañula itupi vivali ha vi tumbika kovaso a Yehova kuvelo wombalaka yoku ñualehela la Yehova.

⁸ Kuenda Arone imbilila olohombo viaco vivali ocela, ocela eci ca Yehova, ocela eci coku inasi.

⁹ Oco Arone o nena ohombo eyi ocela ca wilila Yehova, o yi lumbila ndocilumba cekandu.

¹⁰ Puãi ohombo ocela coku inasi ca kuatela, yi tumbikiwa lomuenyo kovaso a Yehova ha va likutililako, loku yi tuma kekalasoko oku yinasi.

¹¹ Kuenje Arone o nena onale yocilumba cekandu, oco caye muẽle, ha likutilila eye muẽle lonjo yaye oku tuvika akandu, kuenje ipaya onale yocilumba cekandu ca linga caye.

¹² Oco noke o nyañula ociyukilo ceyuka akãla ondalu a tunda kutala u kasi kovaso a Yehova. O nyañulavo apupu avali insensu vi kuete elemba liwa haivio via suliwa, ha vi tuala vokati kongumbo.

¹³ O kapa insensu vondalu kovaso a Yehova, okuti evonge linsensu li sitika omangu yohenda yi kasi kilu liocikasia covisila, sanga o fa.

¹⁴ O nyañula kamue kosonde yonale ha yi nyila lomuine waye komangu yohenda konẽle yokutundilo, kuenda kovaso yomangu yohenda o nyĩla osonde olonjanja epanduvali lomuine waye.

¹⁵ Oco ipa ohombo yocilumba cekandu, oco comanu, ha nena osonde yaco vokati kongumbo oco o linga losonde yaco ndeci a lingile losonde yonale, hã ha yi nyila komangu yohenda kuenda kovaso yomangu yohenda.

¹⁶ O likutilila ohombo yi kola oku tuvika evi vi vĩhĩsa va Isareli kuenda okulueya kuavo, okuti akandu avo osi. Haicovo a lingila ombalaka yoku ñualehela Yehova yina yi kasi pokati kavo, ndaño avĩho avo alua.

¹⁷ Ka mu kala omunu vombalaka yoku ñualehela la Yehova eci Arone a iñilamo oku likutilila vohondo yi kola toke eci a tundamo, okuti wa likutilila eye muẽle lonjo yaye kuenda va Isareli vosi ha tuvika akandu avo.

¹⁸ Noke o tundamo ha endi kutala u kasi kovaso a Yehova ho likutilila, kuenje o nyañula kamue kosonde yonale losonde yohombo ha yi kapi kolombinga viutala kolonẽle viosi.

¹⁹ O nyilako osonde lomuine waye olonjanja epanduvali oku u yelisa loku u kolisa kokuvĩhĩsua kua va Isareli.

²⁰ Noke, eci a mãla oku likutilila ohombo yi kola kuenda ombalaka yoku ñualehela la Yehova, lutala, oco o nena ohombo yi kasi lomuenyo.

²¹ Kuenje Arone imba ovaka aye, kavali kao, kutue wohombo yi kasi lomuenyo lia litavelelako olohole viosi via va Isareli, lokulueya kuavo kuosi, okuti akandu avo osi. Akandu avo osi o a kapa kutue wohombo yaco. Ohombo yaco yeciwa komunu wa tukuiwa ha ka yi tuala kekalasoko.

²² Ohombo yi ambata kilu liayo olohole viavo viosi, yenda vekalasoko. Noke omunu waco o sia ohombo yaco vekalasoko.

²³ Kovaso yaco Arone iñila vombalaka yoku ñualehela la Yehova, o lula uwalo wovalatanya una a walele eci a iñilile vohondo yi kola, u solekamo.

²⁴ Noke o yuila vohondo yimue yi kola, o wala uwalo waye, o tunda ha lumbi ocilumba caye coku pia elisi kuenda ocilumba comanu coku pia elisi, ha likutilila eye muẽle kuenda omanu.

²⁵ Ulela wocilumba cekandu u yokela kutala.

²⁶ U wa ka tuale ohombo yambata akandu, eci a tiuka o sukula uwalo waye, o yua, kuenje oco ci tava noke oku iñila vocilombo.

²⁷ Onale yocilumba cekandu kuenda ohombo yocilumba cekandu, osonde yavio ya neniwa vohondo yi kola oku tuvika, vi upiwa kocilombo via tualiwa kofeka. Ovipa viavio, lositu yavio kuenda aniña avio vi yokiwa londalu.

²⁸ U o vi yoka o sukula uwalo waye, noke o yua, oco a iñila noke vocilombo.

²⁹ Oco ci linga ocisila cene cenda hũ cokuti vosãi yepanduvali, keteke liekui kosãi, wu likandangiya okulia kuenje ka vu lingi upange umue, ci kale olonyitiwe, ci kale ovingendeleyi via tunga pokati kene.

³⁰ Momo keteke liaco vo likutilila oku tuvika, ho yelisiwi. Vu yelisiwa kakandu ene osi kovaso a Yehova.

³¹ Eteke liaco li linga esambata liowusa u kola pokati kene, kuenje vu likandangiya okulia. Ci linga ocisila cenda hũ.

³² Ocitunda ci wavekiwa ha cihĩwa ocikundi oku linga ocitunda komangu ya isiaye, eye o likutilila oku tuvika, o wala uwalo wovalatanya haiwo uwalo u kola.

³³ Ci likutilila ohondo yi kola, ci likutilila ombalaka yoku ñualẽhẽla la Yehova kuenda utala; ci likutilila ovitunda kuenda omanu vosi, oku tuvika akandu.

³⁴ Ci linga ocisila cene ci kala ño hũ coku likutilila va Isareli oku tuvika akandu avo osi onjanja yimosi vunyamo. Kuenje Mose wa linga ndeci Yehova a sapuila.