OVISILA 15 - Embimbiliya - Bíblia Sagrada em Umbundu

¹ Oco Yehova wa popia la Mose la Arone hati,

² Sapuili va Isareli hoti, Eci ulume a kasi loku pita cimue ketimba liaye ndokatutuila, okupita kuaco kua vĩha.

³ Okuvĩhĩsua kuaye kuokatutuila kaco kuoku: nda okupita kuaco kua enda ño, ndaño oku pita kuaco kua kotoka ketimba liaye, haimo wa vĩhĩsua.

⁴ Ula wosi okuti kua pekela u o kasi lokatutuila kaco wa vĩhĩsua, lovina viosi eye a tumãla via vĩhĩsua.

⁵ Kuenda u o lamba kula waye o sukula uwalo waye, o yua, kuenje o vĩhĩsua toke koñolosi.

⁶ Kuenda u wa tumãla kocina cimue oku kua tumãlẽle ukuakatutuila kaco o sukula uwalo waye, o yua, kuenje o vĩhĩsua toke koñolosi.

⁷ Kuenda u o lamba etimba liu o kasi lokatutuila o sukula uwalo waye, o yua, kuenje o vĩhĩsua toke koñolosi.

⁸ Kuenda nda u o kasi lokatutuila kaco o siyila umue o yela, oco u o yela o sukula uwalo waye, o yua, kuenje o vĩhĩsua toke koñolosi.

⁹ Kuenda oselei yosi ukuakatutuila a tumalako ya vĩhĩsua.

¹⁰ Kuenda wosi o lamba cimue ca kala vemẽhi liaye o vĩhĩsua toke koñolosi. Lu ambata ovina viaco o sukula uwalo waye, o yua, kuenje o vĩhĩsua toke koñolosi.

¹¹ Lu wosi ukuakatutuila kaco wo lamba osimbu ka pitisile ovaka aye vovava, omunu waco o sukula uwalo waye, o yua, kuenje o vĩhĩsua toke koñolosi.

¹² Kuenda ocikuata cotuma nda ca lambiwa lu o kasi lokatutuila kaco va cipa; nda ocikuata cuti ci sukuiwa lovava.

¹³ Oco eci u o kasi lokatutuila kaco a yelisua kokatutuila o litendela oloneke epanduvali vioku yelisua ha sukula uwalo waye; kuenda o yua vovava a enda oco kuenje o yela.

¹⁴ Keteke liecelãla o nyañula olopomba vivali pamue ivuvu vivali violonende, kuenje iya ku Yehova kuvelo wombalaka yoku ñualehela la Yehova ha vi eci kocitunda.

¹⁵ Kuenje ocitunda ci vi lumba, yikuavo ocilumba cekandu, yikuavo ocilumba coku pia elisi. Kuenje ocitunda cu likutilila kovaso a Yehova ha tuvika okatutuila kaye.

¹⁶ Oco nda olucito lulume lu tunda, o yuisa etimba liaye liosi kuenje o vĩhĩsua toke koñolosi.

¹⁷ Kuenda uwalo wosi lovina viosi vi kasi lolucito luaco vi sukuiwa lovava, vi vĩhĩsua toke koñolosi.

¹⁸ Ukãivo, nda ulume o pekela laye lolucito, kavali kavo va yua kuenje va vĩhĩsua toke koñolosi.

¹⁹ Nda ukãi o kasi lokupita kumue, kuenje okupita kuaco ketimba liaye osonde, o vĩhĩsua lofuko yaye oloneke epanduvali; wosi u lamba o vĩhĩsua toke koñolosi.

²⁰ Oco ovina viosi okuti o pekailamo osimbu a kasi lofuko yaye vi vĩhĩsua, kuenda evi viosi a tumãlãila vi vĩhĩsuavo.

²¹ Oco wosi o lamba kula waye o sukula uwalo waye, o yua, kuenje o vĩhĩsua toke koñolosi.

²² Kuenda u o lamba cimue caco eye a tumãlela o sukula uwalo waye, o yua kuenje o vĩhĩsua toke koñolosi.

²³ Kuenje ci kale kula, ci kale kocina cimue ukãi a tumãlẽle eci okuti a ci lamba, o vĩhĩsua toke koñolosi.

²⁴ Kuenje nda ulume o pekela laye leci cofuko ci kuata ulume waco, ulume o vĩhĩsua oloneke epanduvali, kuenda ovola osi ulume a pekailako a vĩhĩsua.

²⁵ Nda ukãi o kasi loku pita osonde oloneke via lua havotembo yofuko yayeko, pamue nda o kasi lokupita kumue kua piãla osimbu yofuko yaye, oloneke viosi ku pita eci cu vĩhĩsa o kala ndeci coloneke viofuko yaye; eye wa vĩhĩsua.

²⁶ Ovola osi a pekailako oloneke viosi viokupita kuaco o lingila ndula wofuko; kuenda evi viosi a tumayãla vi vĩhĩsua ndokuvĩhĩsua kuofuko yaye.

²⁷ Kuenje wosi o lamba kovina viaco o vĩhĩsa, oco o sukula uwalo waye, o yua, kuenje o vĩhĩsua toke koñolosi.

²⁸ Puãi nda ukãi o yelisua kokupita kuaco, oco o litendela oloneke epanduvali noke o yela.

²⁹ Oco keteke liecelãla o linyañuila olopomba vivali pamue ivuvu vivali violonende, kuenje o vi nena kocitunda kuvelo wombalaka yoku ñualehela la Yehova.

³⁰ Kuenje ocitunda ci lumba, yikuavo ndocilumba cekandu, yikuavo ndocilumba coku pia elisi; kuenje ocitunda cu likutilila kovaso a Yehova ha tuvika okupita kuaco kuo vĩhĩsa.

³¹ Oco wu tepaisaila va Isareli kokuvĩhĩsua kuavo okuti ka va fi loku vĩhĩsua kuavo eci va vĩhĩsa otavernakulu yange yi kasi pokati kavo.

³² Eci oco ocihandeleko cu o kasi lokupita kumue, lu olucito luaye lu tunda oco wa vĩhĩsua laco,

³³ kuenda ukãi o kasi loku vela ofuko yaye, lomunu o kasi lokupita kumue, ci kale kulume, ci kale kukãi, kuenda u o pekela lu wa vĩhĩsa.