OVISILA 14 - Embimbiliya - Bíblia Sagrada em Umbundu

¹ Yehova wa popia la Mose hati,

² Ocihandeleko cukuavilundu veteke liokuyelisua kuaye ceci: Vo nena kocitunda.

³ Kuenje ocitunda ci tunda kocilombo, oco ocitunda ci vanja kuenje nda uvei wovilundu wa kaya kukuavilundu,

⁴ oco ocitunda ci handeleka okuti wa nyañuile u o yelisua olonjila vivali vi li lomuenyo viombuto yi yela, luti wo-cedro, kuenda eci cohula lisapa viahisope.

⁵ Kuenda ocitunda ci tuma oku ipa onjila yimuamue vocikuata cotuma kilu liovava a enda.

⁶ Onjila ya sialapo lomuenyo ci yi nyañula luti wo-cedro kuenda eci cohula lovisapa viahisope, kuenje ci vi yava kumuamue lonjila yaco yomuenyo vosonde yonjila ya ipaiwaila kilu liovava a enda.

⁷ Kuenje ci nyĩla olonjanja epanduvali kuaco ku o yelisua kovilundu, cu tukula hati, Wa yela, kuenje cecela kusenge waco onjila yomuenyo.

⁸ Oco u o yelisua o sukula uwalo waye, kuenda o lipemũla ocifuko cosi, o yua kuenje o yela. Oco iñila vocilombo, puãi o kala oloneke epanduvali kosamua yombalaka yaye.

⁹ Keteke liepanduvali o lipemũla ocifuko cosi kuenda olonjele viaye lisokopia, ocifuko caye cosi o ci lipemũla. O sukula uwalo waye, o sukulavo etimba liaye oco wa yela.

¹⁰ Keteke liecelãla o nyañula otumeme tuvali tualume ka tu kuete etondelo, lomeme yomange yulima umosi ka yi kuete etondelo, kuenda olonepa vitatu viekui viefa liosema ya fina ndocilumba cosema ya tengiwa lulela, kuenda omeyu yo-litro yulela.

¹¹ Kuenje ocitunda caco cu yelisa ci tumbika omunu waco o yelisua kuenda ovina evi kovaso a Yehova, kuvelo wombalaka yoku ñualehela la Yehova.

¹² Kuenje ocitunda ci nyañula kamue kotumeme tualume, ci ka lumbila ndocilumba ceko, kuenda omeyu yo-litro yulela, ci vi yangelisa ndocilumba coku yangelisila kovaso a Yehova.

¹³ Kuenda cipaila okameme kaco oku ku kola kuna va ipailela ocilumba cekandu locilumba coku pia elisi, momo ndeci ocilumba cekandu ci tiamela kocitunda haimo muocilumba ceko, ci kola cimue.

¹⁴ Ocitunda ci nyañula kosonde yocilumba ceko, kuenje ocitunda ci yi kapa kosungu yetui liondio liu o yelisua, lokomumba yeka liaye liondio, lokomumba yomãi yaye yondio.

¹⁵ Ocitunda ci nyañula kamue komeyu yo-litro yulela, citila peka liaye liokepĩli;

¹⁶ noke ci yava omuine waye wondio vulela u kasi peka liaye liokepĩli kuenje ulela waco cu nyila lomuine waye kovaso a Yehova olonjanja epanduvali.

¹⁷ Oco ulela waco wa siala peka liaye ocitunda ci waveka kosunga yetui liondio liu o yelisua, lokomumba yeka liaye liondio, lokomumba yomãi yaye yondio, kilu liosonde yocilumba ceko.

¹⁸ Oco ulela wa siala peka liocitunda ocitunda ci u waveka kutue wu o yelisua, kuenje ocitunda cu likutilila kovaso a Yehova oku tuvika.

¹⁹ Kuenje ocitunda ci lumbila ocilumba cekandu ha tuvika ekandu liu o yelisua kokuvĩhĩsua kuaye. Noke ipaya ocilumba coku pia elisi.

²⁰ Oco ocitunda ci lumba ocilumba coku pia elisi locilumba cosema kilu liutala kuenje ocitunda cu likutilila oku tuvika, kuenje wa yela.

²¹ Kuenje nda osuke yu ka mõli cosi eci, oco o nyañula okameme kamosi kulume ndocilumba ceko hã ha va ci yangelisa oco va tuvika eviho liaye, kuenda onepa yekui yimosi yefa liosema ya fina ya tengiwa lulela ndocilumba cosema, lomeyu yo-litro yulela,

²² kuenda olopomba vivali pamue ovivu vivali violonende, nda ovio a tẽla oku mõla; yikuavo yi linga ocilumba cekandu, yikuavo ocilumba coku pia elisi.

²³ Oco keteke liecelãla o vi nenẽla kocitunda okuliyelisa kuaye kuvelo wombalaka yoku ñualehela la Yehova kovaso a Yehova.

²⁴ Kuenje ocitunda ci nyañula okameme kocilumba ceko lomeyu yo-litro yulela, kuenda ocitunda ci vi yangelisa ndocilumba coku yangelisila kovaso a Yehova.

²⁵ Oco eye ipa okameme kocilumba ceko kuenje ocitunda ci nyañula kosonde yocilumba ceko, ci yi kapa kosungu yetui liondio liu o yelisua, kuenda komumba yeka liaye liondio, lokomumba yomãi yaye yondio.

²⁶ Kuenda citila kamue kulela waco peka liaye liokepili,

²⁷ kuenje ocitunda ci nyĩla lomuine waye wondio kamue kulela u kasi peka liaye liepili olonjanja epanduvali kovaso a Yehova.

²⁸ Ocitunda ci waveka ulela u kasi peka liaye kosungu yeka liaye liondio, lokomumba yomãi yaye yondio, oko kua kapiwa osonde yocilumba ceko.

²⁹ Kuenje ocisupe culela waco u kasi peka liocitunda ci wavekiwa kutue wu o yelisua, noke ocitunda cu likutilila kovaso a Yehova oku tuvika.

³⁰ Kuenje osuke yi lumba olopomba pamue ivuvu violonende ndevi a mõla.

³¹ Ndevi muẽle a mõla, yikuavo ocilumba cekandu, yikuavo ocilumba coku pia elisi, kumue locilumba cosema, kuenje ocitunda ci likutilila u o yelisua kovaso a Yehova oku tuvika.

³² Eci oco ocihandeleko cu o kasi luvei wovilundu, u ka tẽla oku mõla evi viokuliyelisa kuaye.

³³ Oco Yehova wa popia la Mose la Arone hati,

³⁴ Eci wiñili vofeka ya Kanana ndu yihi ha yi lingi ofeka yene, kuenje ñapa uvei wilundu vonjo yimue yofeka wu kasi layo,

³⁵ u o fuka onjo iya, o sapuila ocitunda hati, Nda soka siti, huti ño vonjo yaco mu kasi uvei.

³⁶ Kuenje ocitunda ci tuma oku tundisa vonjo yaco ovikuata viosi osimbu ocitunda ka ca iñilile handi oku vanja uvei, sanga viosi vi kasi vonjo vi vĩhĩsua; kuenje noke yaco ocitunda ciñila oku tala onjo.

³⁷ Oco ci vanja kuvei waco kuenje nda uvei u kasi vovimano vionjo, laniõlõlo a talala pamue a kusũka a mõleha hutiño vokati kocimano,

³⁸ ocitunda ci tunda vonjo puvelo wonjo ha yiki onjo oloneke epanduvali.

³⁹ Oco ocitunda ciya vali keteke liaco liepanduvali ha vanjimo, kuenje nda uvei wa sambukila kovimano vionjo,

⁴⁰ ocitunda ci tuma oku upamo ovawe a kasi luvei ha va va imbi kumue kua vĩha kofeka.

⁴¹ Kuenje ci kuanguisa vokati konjo yaco yosi, kuenda va pesila eve liaco va kuangula kumue kua vĩha kofeka.

⁴² Oco va nyañula ovawe amue aiñi oku a piñainyapo, kuenje o nyañula onata yimue yiñi ha kolongisa onjo.

⁴³ Nda uvei wiya vali, okuti u tiuka vali vonjo kovaso yoku tundisa ovawe aco, kuenda oku kuangula onjo loku yi kolonga,

⁴⁴ noke ocitunda ciya, ci kulihisa kuenje nda uvei wa tiuka ocili vonjo, uvei waco ilundu viukuaku toñola, onjo yaco ya vĩhĩsua.

⁴⁵ Kuenje o teyisapo onjo yaco, ovawe aco lolohangalo lovimu viosi vionjo o vi tualisa kofeka kumue kua vĩha.

⁴⁶ Lu le iñila vonjo yaco osimbu yaco yosi yoku yika, o vĩhĩsua toke koñolosi.

⁴⁷ Oco u o pekela vonjo yaco o sukula uwalo waye; kuendavo u o lila vonjo yaco o sukula uwalo waye.

⁴⁸ Puãi nda ocitunda ciya, ci kũlihisa kuenje nda uvei ka wa tiukile ocili vonjo eci ya kolongiwa, oco ocitunda ci sapula hati, Onjo ya yela, momo uvei wa tundamo.

⁴⁹ Kuenje poku yelisa onjo ocitunda ci nyañula olonjila vivali luti wo-cedro leci cohula lovisapa viahisope.

⁵⁰ Cipalela onjila yimue vocikuata cotuma kilu liovava a enda.

⁵¹ Ci yelula uti wo-cedro leci cohula kuenda ohisope lonjila yi kasi lomuenyo ha ci vi yavi vosonde yonjila yaco ya ipaiwa lovovava aco a enda ha ci nyĩla onjo olonjanja epanduvali.

⁵² Kuenje ci yelisa onjo losonde yonjila, lovava a enda, lonjila yi kasi lomuenyo, kuenda luti wo-cedro, la hisope leci cohula,

⁵³ puãi cecela kusenge waco onjila yaco yi kasi lomuenyo, oco yi tunde vimbo; kuenje ci likutilila onjo oku tuvika, kuenje onjo yi yela.

⁵⁴ Evi ovio ovihandeleko viuvei wosi wilundu lutumbutumbu,

⁵⁵ lovilundu viuwalo levi vionjo,

⁵⁶ haivio ovihandeleko viuvei wocilenda, pamue apute, pamue uvei wamañana.

⁵⁷ Vi longisa oku tepisa pokati keci ca vĩha leci ca yela. Evi ovio ovihandeleko vilundu.