OVISILA 12 - Embimbiliya - Bíblia Sagrada em Umbundu

¹ Oco Yehova wa popia la Mose hati,

² Sapuila va Isareli, huti, Nda ukãi wa mina kuenje wa cita omõla ulume, oco nyoho yaco a vĩhĩsua oloneke epanduvali; ndeci oloneke vioku ipa okandimba haico o vĩhĩsua.

³ Kuenje keteke liecelãla ositu yociyuvuluila comõlaco yi seviwa.

⁴ Oco eye ukãi o kala ño losonde yaye yoku liyelisa akui atatu koloneke koloneke vitatu; ka ka lambe kocikuata ci kola, pamue oku iñila vocitumãlo ci kola, toke oloneke vioku liyelisa kuaye via tẽla.

⁵ Puãi nda wa cita omõla ukãi, oco o vĩhĩsua olosemana vivali, ndomo muoku ipa okandimba haimo; kuenje o kala ño losonde yaye yoku liyelisa akui epandu koloneke koloneke epandu.

⁶ Eci oloneke viaco viaye vioku liyelisa via tẽla, ci kale viomõla ulume, ci kale viomõla ukãi, oco ukãi o nena okameme kunyamo umosi ndocilumba coku pia elisi, kuenda ocivuvu conende pamue opomba ndocilumba cekandu. O ci nena kuvelo wombalaka yoku ñualehela la Yehova, o ceca kocitunda;

⁷ kuenje ocitunda ci vi lumbila kovaso a Yehova ha cu likutilila oku tuvika; kuenje ukãi o yela kono yosonde yaye. Oco ocikandeleko cu o cita omõla ulume pamue ukãi.

⁸ Nda eci ukãi a kuete ka ca sokele londando yokameme, o nyañula olopomba vivali pamue ivuvu vivali violonende, eyi yocilumba coku pia elisi, eyi yocilumba cekandu, oco ocitunda cu likutilila ha tuvika, kuenje o yela.