OVISILA 11 - Embimbiliya - Bíblia Sagrada em Umbundu

¹ Yehova wa popia la Mose la Arone hati,

² Popi la va Isareli hoti, Evi vi tava oku lia vi li lomuenyo pokati kovinyama viosi vi kasi kilu lieve vievi:

³ Eci pokati kovinyama ca toka ekonjo, ci kasi lakonjo a litepa, haico ci lukola, ci tava oku liwa lene.

⁴ Haimo lumue pokati kevi vi lukola pamue via toka ekonjo evi ka vi tava oku lia vievi: ongamelo omo yi lukola puãi ka ya tokele ekonjo; oyo yu vĩhĩsi.

⁵ Ohuita omo yi lukola puãi ka ya tokele ekonjo, oyo yu vĩhĩsi.

⁶ Ondimba omo yi lukola puãi ka ya tokele ekonjo, oyo yu vĩhĩsa.

⁷ Ongulu omo ya toka ekonjo, yi kasi lakonjo a litepa, puãi ka yi lukola, oyo yu vĩhĩsi.

⁸ Ko ka li ositu yavio, ko ka lambi ovife viaco, viu vĩhĩsi.

⁹ Evi pokati kavio viosi vi kasi vovava vi tava oku liwa lene vievi: cosi ci kasi lovilele lakaka vovava vokalunga lo volondui, oco ci tava oku liwa lene.

¹⁰ Cosi ka ci kasi lovilele lakaka vokalunga lo volondui, pokati kovina viosi vi pita pita lovava, pokati koviendalomuenyo viosi viovava, oco cu lingili umbondo.

¹¹ Oco vi kale kokuene ndumbondo; ka ci tava oku lia ositu yavio; ovife viavio viu lingile ndumbondo.

¹² Evi viosi viovovava ka vi kuete ilele lakaka, ovio viu lingili ndumbondo.

¹³ Kuenje pokati kovina wu kuatela umbondo kolonjila, okuti viumbondo, ka vi liwa vievi: ongonga yulombo, ohokohoko, omungu;

¹⁴ ociselele kuenda olombuto viosi viokaliama,

¹⁵ olombuto viosi viovikuamanga,

¹⁶ lombo, locimbamba, lolimbondo, lolombuto viosi violongonga,

¹⁷ lokalumba, lombundambunda, locihungulu,

¹⁸ lokacukucuku, lohombo yenyãla, lohumbihumbi,

¹⁹ la cilumewapunda, lolombuto viosi viapanda, la muipui, lelima.

²⁰ Ovina viosi vi likoka posi, vi kasi lavava, haivio vi enda lovolu akuãla viu lingili ndumbondo.

²¹ Handi ci tava oku lia evi vi likoka posi, vi kasi lavava, vi enda lovolu akuãla, ovio vi kasi lovolu a lepa kolomãi vi tẽha tẽha lao posi.

²² Evi vi tava oku liwa vievi: olombuto viosi violohuma, lolombuto viosi viovimina, lolombuto viosi viovienye, lolombuto viosi violombata.

²³ Puãi viosi evi vi likoka posi, vi kasi lavava, vi kasi lakoto akuãla, viu lingili ndumbondo.

²⁴ Oco wu vĩhĩsua lovina evi; u wosi o lamba kovife viavio o vĩhĩsua toke koñolosi;

²⁵ lu ambata kamue kovife viavio a sukule uwalo waye kuenje o vĩhĩsua toke koñolosi.

²⁶ Ocinyama cosi ca toka ekonjo, puãi ka ci kasi lakonjo a litepa kuenda ka ci lukola, cu vĩhĩsa: wosi o vi lamba o vĩhĩsua.

²⁷ Oco cosi ci endaenda lakasa pokati kovinyama viovolu akuãla cu vĩhĩsi. U o lamba kocife caco o vĩhĩsua toke koñolosi.

²⁸ U o tikula ocife caco a sukule uwalo waye kuenje o vĩhĩsua toke koñolosi; viu vĩhĩsa.

²⁹ Kuenje evi vi vĩhĩsa pokati kovina vi pita pita posi vievi: evili, omuku, olombuto viosi viohaka,

³⁰ lekokolo, lekangala, locikukuluvandoke, lomunduluka, leleñailo.

³¹ Evi ovio viu vĩhĩsi pokati kovina vi pita pita posi; u o vi lamba eci via fa o vĩhĩsua toke koñolosi.

³² Kuenje ovina viosi vi lambiwa locife caco vi vĩhĩsua; ci kale ocikuata cuti, pamue uwalo, pamue ocipa, pamue onjeke, ndaño nye ocikuata caco, cosi va linga laco upange, ci kapiwa vovava kuenje ci vĩhĩsua toke koñolosi; oco ci yela noke.

³³ Olombia viosi viotuma mua kupukila cimue covina viaco, cosi ci kasimo ci vĩhĩsua kuenje ombia yaco wu yipa.

³⁴ Okulia kuosi ku kasi vombia yaco okuti nda ca tava oku ku lia kuenje ku telekiwa lovava ku vĩhĩsua. Cosi coku nyua ci kasi vombia yaco ci vĩhĩsua.

³⁵ Cosi ci kupuilua lokacina kamue kovife viaco ci vĩhĩsua, ndaño ofolono, ndaño iko, vi nyanyuiwe, via vĩhĩsua, kuenje viu vĩhĩsi.

³⁶ Haimo lumue etumu pamue ocisimo mu kuete ovava a lua, ovio vi yela; puãi eci ci lamba ocife cavio ci vĩhĩsua.

³⁷ Nda cimue cocife caco ci kupukila kombuto yoku kũla, ombuto yaco yi yela.

³⁸ Puãi nda va kapa ovava kombuto yaco kuenje cimue cocife cavio ci kupukilako, ombuto yaco kokuene ya vĩhĩsua.

³⁹ Nda ocinyama cimue ci tava oku lia ca lifila, u o lamba caco ca lifila o vĩhĩsua toke koñolosi.

⁴⁰ U o lia kocife caco a sukule uwalo waye kuenje o vĩhĩsua toke koñolosi; lu le ambata ocife caco o sukula uwalo waye kuenje o vĩhĩsua toke koñolosi.

⁴¹ Cosi ci likoka posi, umbondo, ka ci ka liwe.

⁴² Viosi vi endaila vimo kuenda viosi vi enda lovolu akuãla levi vi kasi lovolu a lua, viosi muẽle vi likoka posi ko ka vi li; momo via linga umbondo.

⁴³ Ko ka litami leci ci likoka posi, ko ka livĩhĩsi lavio, okuti wa vĩhĩsui lavio.

⁴⁴ Momo ame ndi Yehova Suku yene; oco liyelisi, lingi omanu va kola, momo ame ñola. Ko ka livĩhĩsi levi vi likoka posi, vi kale nye, vi kale nye.

⁴⁵ Omo ame ndi Yehova; ndo wupi vofeka ye Egito okuti ndinga Suku yene; oco wu kola momo ame ñola.

⁴⁶ Eci oco ocihandeleko coviyama kuenda olonjila, levi viosi vi li lomuenyo vi endaila vovava, levi viosi vi likoka posi.

⁴⁷ Nda ci lingila oku tepisa pokati kevi via vĩhĩsua levi vi yela, kuenda pokati koviendalomuenyo vi liwa loviendalomuenyo ka vi liwa.