OVISILA 10 - Embimbiliya - Bíblia Sagrada em Umbundu

¹ Oco Nadava la Avihu, omãla va Arone, va nyañula u ociyukilo caye, u ociyukilo caye. Va yukilamo ondalu, va kapamo insensu, va nena ondalu yiñi ku Yehova, yimue Yehova ka va tukuilile.

² Kuenje ondalu ya tunda ku Yehova, yu ya va lia, kuenje va fila kovaso a Yehova.

³ Oco Mose wa popia la Arone hati, Ca popia Yehova ceci, hati, Kuava va kasi ocipepi lame, ndi lilekisa okuti ñola. Muisua ulamba kovaso omanu vosi. Arone woha ño ne.

⁴ Oco Mose wa pañinya Misiaele la Elicafane, omãla va Usiyele, isia ya Arone yumalẽhe, yu wa popia lavo hati, Amẽli ocipepi. Upi vakuẽle kovaso ocitumalo ci kola, va tuali kofeka.

⁵ Kuenje va amako, va va tuala lovikutu viavo kofeka ndeci Mose a popia.

⁶ Oco Mose wa popia la Arone kuenda Eleasa la Itamare, omãla vaye, hati Ko ka futululi kovitue viene ndaño oku kesula uwalo wene, sanga vu fa, kuenje onyeño yi wengukila omanu vosi. Puãi vakuẽle vakuepata liosi lia Isareli va lile epĩle Yehova a timiha.

⁷ Oco ko ka tundili kuvelo wombalaka yoku ñualehela la Yehova, sanga vu fa, momo wa wavekiwi lulela woku waveka kua Yehova. Oco va linga ndondaka ya Mose.

⁸ Oco Yehova wa popia la Arone hati,

⁹ Ka ci tava oku nyua ovinyu pamue vikuavo vi koluisa, ndaño ove ndaño omãla vove, eci wiñili vombalaka yoku ñualehela lame sanga vu fa. Ci kala ocisila ka ci pui kovitumbulukila viene viosi.

¹⁰ Wu tepisa ciwa pokati keci ci kola leci ka ci koli, vu tepisavo pokati keci ca liña leci ca yela.

¹¹ Kuenda vali vu longaisa va Isareli ovisila viosi Yehova a popia lavo lomẽla wa Mose.

¹² Mose wa popia la Arone, le Eleasa kuenda Itamare, ava omãla vaye valume vo supilapo, hati Nyañuli ocilumba cosema ca supa pokati kovilumba via Yehova viovondalu, ci lili konele yutala, letumbisa hacoko omo ci kola cimue.

¹³ Ci lili oku ku kola, omo eci oco ocikepa cove leci comãla vove valume covilumba via Yehova viovondalu. Oco nda handelekiwa.

¹⁴ Puãi onete yoku yangela locikalo coku tulika ci tava oku vi lila kuosi ño ku yela, ove muẽle lomãla vove valume kuenda omãla vove vakãi kumuamue love. Momo via eciwa ndocikepa cove lomãla vove valume ca tunda kovitundasonde viombembua via va Isareli.

¹⁵ Ocikalo coku tulika kuenda onete yoku yangela va vi nena lovilumba viulela viovondalu, oku vi yangelisila kovaso a Yehova ndocilumba coku yangela. Vi linga viove levi viomãla vove valume kumue love ndocikepa cenda ño hũ ndeci Yehova a popia.

¹⁶ Oco Mose wa puliliya lutate ohombo yocilumba cekandu kuenje tala, ya yokiwa ale. Oco wa temela Eleasa kuenda Itamare, omãla va Arone vo supilapo, hati,

¹⁷ Oco hẽ, nye ka wa lilili ocilumba cekandu vocitali cocitumãlo ci kola, omo ocilumba caco ci kola cimue, kuenje ca eciwa kokuene oku ambata ongole yomanu vosi ho tuvika akandu avo kovaso a Yehova?

¹⁸ Tala! osonde yaco ka ya neniwile omu mu kola. Co sesameleli ceci, nda wa ci lili omu mu kola ndeci nda sapula.

¹⁹ Arone wa popia la Mose, hati, Tala! etaili va lumbila Yehova ocilumba cavo cekandu kuenda ocilumba cavo coku pia elisi, kuenje nda vetiwa lovitangi evi. Nda nda lile etaili ocilumba cekandu, nda ca posokele hẽ kovaso a Yehova?

²⁰ Kuenje eci Mose a ci yeva oco co sungulukila.