OVILINGA 9 - Embimbiliya - Bíblia Sagrada em Umbundu

¹ Saulu puãi, lopo wa kala loku lendela olondonge via Ñala loku vi salowaisa oku vi ponda. Wa enda kocitunda cinene,

² kuenje wa pinga ovikanda vioku enda lavio kolosunangonga vio ko Damasko okuti, nda o sangamo vakuanjila yaco, ci kale alume, ci kale akãi, iya lavo lovikolo ko Yerusalãi.

³ Vonjila, eci a pitila ocipepi loko Damasko, ocinyi cokilu co tuila ocipikipiki.

⁴ Oco wa kupukila posi, kuenje wa yeva ondaka ya popia laye yiti, A Saulu, A Saulu, nye o ñangisila?

⁵ Eye hati, A Ñala, ove elie? Ondaka yiti, Ame Yesu, u o kasi loku kangisa.

⁶ Votoka, iñila vimbo, omo va ku sapuila eci o linga.

⁷ Alume va enda laye va kala ño ndovitende, va yeva ondaka, puãi lomue va mola.

⁸ Oco Saulu wa votoka. Eci a patuluka ka muile cimue, oco vo kuata peka kuenje vo songuila vo Damasko.

⁹ Oloneke vitatu wa kala omeke, ndaño oku lia ka lile, pamue oku nyua ka nyuile.

¹⁰ Vo Damasko mua kala ondonge yimue onduko yaye Ananiya. Ñala wa popia laye konjoi hati, A Ananiya. Eye hati, A Ñala, ame ulo.

¹¹ Oco Ñala wa popia laye hati, Katuka, kuende koluwa lua tukuiwa Luasuñama. Ka vanje umue o tukuiwa Saulu u Tarso vonjo ya Yuda. Momo o kasi loku likutilila,

¹² kuenje wa mola ulume umue onduko yaye Ananiya, wa iñila, wo kapa ovaka okuti o letuluka.

¹³ Ananiya wa kumbulula hati, A Ñala, omunu waco, va lua va sapuila ndomo a kasi loku kangisa olosandu viove vo Yerusalãi.

¹⁴ Kulo o kasi lomoko yo wihiwa lovitunda vinene oku kuta vosi va tukola onduko yove.

¹⁵ Puãi Ñala wa popia laye hati, Kuende ño, momo ame ndo nola. Eye o linga ocikuata coku ambatela onduko yange loku yi tuala ku vakualofeka, lo kolosoma viavo, kuenda ku va Isareli.

¹⁶ Momo ame ndu lekisa ohali yosi a talela onduko yange.

¹⁷ Oco Ananiya wa enda, wa iñila vonjo. Wa kapa Saulu ovaka aye hati, A manjange, a Saulu, Ñala Yesu, una wa ku tukulukila vonjila eci veya, eye wa numa kokuove okuti o letuluka kuenje o yuka Espiritu Sandu.

¹⁸ Tuli a ci popia haico kovaso a Saulu kua tunda cimue ca soka ndolombande, yu wa letuluka. Oco, oku katuka, wa papatisiwa.

¹⁹ Noke wa lia kuenje wa kuata vali ongusu. Wa kala oloneke vimue kumue loloñame vio ko Damasko, kuenje

²⁰ haico muẽle a kundila Yesu volosunangonga okuti eye Mõla a Suku.

²¹ Vosi vo yeva va komoha vati, Heyeko hẽ una wa kaile vo Yerusalãi kuenje wa kangaisa ava va tukula onduko yaco? Kuenje oco muẽle eyilila kulo okuti o va kapa kovikolo loku va tuala kovitunda vinene.

²² Saulu puãi wa amamako kongusu, kuenje wa tangelekisa va Yudea va tunga vo Damasko, momo wa toñomãla okuti Yesu eye Kristu.

²³ Eci pa pita oloneke via lua oco va Yudea vo tumbika ongombo yoku wipa,

²⁴ puãi ongombo yaco ya yevala ku Saulu. Vo lavekela volombundi kutanya lo kuteke ha vo wipa.

²⁵ Oloñame viaye puãi via enda laye uteke, vio kapa vohumba, vio pitisa ponjanela yovocimbaka kuenje vio lowisila kofeka.

²⁶ Eci Saulu eya ko Yerusalãi oco wa soka oku litokeka lolondonge, puãi vosi vo kuatela usumba, momo ka va kolelele okuti wa linga ocili oñame.

²⁷ Puãi Barnaba wa enda laye, wo tuala kovapostolo, kuenje wa va sapuila ndomo a mõla Ñala vonjila, lomo Ñala a vangula laye. Wa va lomboluila ndomo vo Damasko a kuata ca lua utõi woku kundila vonduko ya Yesu.

²⁸ Oco Saulu wa kala lavo vo Yerusalãi kuenje wa endaenda lavo.

²⁹ Wa kuata utõi woku kundila vonduko ya Ñala. Wa vangulavo la va Helasi loku lipatãla lavo. Ovo puãi va sanda oku wipa.

³⁰ Eci vakuetavo va ci limbuka oco vo tuala ko Kaisarea kuenje vo tuma ko Tarso.

³¹ Ekongelo lioko Yudea yosi, lo ko Galilea, kuenda ko Samária, lia linala lombembua kuenje liamamako. Lia endela vonjila yoku sumbila Ñala loku kolisua le Espiritu Sandu, kuenje lia vokiyiwa.

³² Oco, eci Petulu a kala loku ñuala ñuala kuosi, weyavo kolosandu via tunga ko Luda.

³³ Oko a sanga ulume umue onduko yaye Ainea, wa kala pula anyamo ecelãla, momo wa fa ovolu.

³⁴ Petulu wa popia laye hati, A Ainea, Yesu Kristu wa ku kayisa. Votoka. Yalula ula wove, kuenje haico a votoka.

³⁵ Vosi va tunga ko Luda lo ko Sarona vo mola kuenje va pongolokela ku Ñala.

³⁶ Vo Yopa mua kala ondonge yimue yukãi, onduko yaye Tavita, ca lomboloka citi, Kambambi. Eye wa kala ukuahenda, kuenje wa kuatisa va lua.

³⁷ Oco koloneke viaco wa vela yu wa fa. Eci vo sukula vo langeka vonjo yosapalalo.

³⁸ Omo ko Luda ocipepi lo ko Yopa, oco olondonge via yeva okuti Petulu oko a kasi, kuenje vo tumisa alume vavali oku u pañinya vati, Enju lombili. Ku ka taluke.

³⁹ Oco Petulu wa katuka yu wa enda kumue lavo. Eci a pitila va enda laye vonjo yosapalalo. Ovimbumba viosi vio ñuala, via lila kuenje vio lekisa uwalo lasanya osi Kambambi a tongele osimbu a kala kumue lavo.

⁴⁰ Petulu puãi, eci a va tundisamo vosi, wa kekama kolongolo, kuenje wa likutilila. Oco, oku pongolokela kocivimbi, wa popia hati, A Tavita, pasuka, kuenje eye wa patuluka. Eci a mola Petulu, wa tumala,

⁴¹ kuenje Petulu, oku u kuata peka, wo votola. Eci a kovonga olosandu lovimbumba, oco wa weca kokuavo lomuenyo.

⁴² Ondaka yaco ya yevala kuosi ko Yopa, kuenje va lua va tava ku Ñala.

⁴³ Oco Petulu wa kala oloneke via lua vo Yopa, wa singa vonjo ya Simono uyaveki wovipa.