OVILINGA 8 - Embimbiliya - Bíblia Sagrada em Umbundu

¹ Saulu wa tava kokufa kuaye. Oco keteke liaco kueya ekangiso lia lua kekongelo lio vo Yerusalãi, kuenje vosi va sandokaila volofeka via Yudea la Samária te lika ovapostolo.

² Vamue vakuakufendela Suku va kenda Stefano kuenje vo lila ca lua.

³ Saulu puãi wa kangisa ekongelo, wa iñila volonjo viosi oku kokamo alume lakãi kuenje wa va yika vokayike.

⁴ Oco ava va sandoka va ñuala ñuala loku kunda ondaka.

⁵ Filipu wa lokila kimbo limue ko Samária, kuenje wa va kundila Kristu.

⁶ Omanu va yevelela lutima umuamue kolondaka via popia Filipu eci vo yeva leci va mola ovilimbu a linga.

⁷ Aspiritu ãvi a tunda komanu va lua va kuetiwe la-o, a tunda loku litetela kua lua. Va lua va fa ovolu, kuenda ovilema, va sakuiwa.

⁸ Oco, vimbo liaco, mua kala onjolela ya lua.

⁹ Puãi vimbo liaco mua kala ulume umue, onduko yaye Simono. Eye ocimbanda kuenje wa kala loku komohaisa okasimbu va Samária vosi. Wa litukula hati, Ndimunu unene.

¹⁰ Vosi va tava kokuaye, tunde kuava vatito toke kuava vanene. Va popia popia vati, Omunu waco eye Unene wa Suku una u tukuiwa Cimãlõmata.

¹¹ Kuenje va tava kokuaye omo wa kala loku va komohaisa okasimbu lovombanda aye.

¹² Puãi eci va tava kondaka yiwa ya kunda Filipu, eyi yi lombolola Usoma wa Suku kuenda Onduko ya Yesu Kristu, oco, lalume lakãi va papatisiwa.

¹³ Ndaño Simono, eye muẽle, wa tava kuenje, eci a papatisiwa, wa kakatela Filipu. Eci a mola ovilimbu lovikomo vinene via kala loku lingiwa eye wa komoha enene.

¹⁴ Eci ovapostolo va kala vo Yerusalãi va yeva okuti va Samária va tava kondaka ya Suku oco va tuma kokuavo Petulu la Yoano.

¹⁵ Ovo, eci veya, va likutilila okuti va Samária va tambula Espiritu Sandu,

¹⁶ momo keyile handi kumue umosi pokati kavo, va papatisiwila ño handi vonduko ya Ñala Yesu.

¹⁷ Noke Petulu la Yoano va va kapa ovaka avo, kuenje va tambula Espiritu Sandu.

¹⁸ Eci Simono a mola okuti Espiritu weya loku kapa ovaka ovapostolo, oco wa soka oku va iha olombongo,

¹⁹ hati, Va nyihevo ame unene u okuti, eci ñapa umue ovaka ange, omunu waco o tambula Espiritu Sandu.

²⁰ Petulu wa popia laye hati, Love, lolombongo viove, kuendi kenyõleho, momo wa soka oku landa ocali ca Suku lolombongo.

²¹ Ku kuete onepa, ndaño ocipiñalo, vondaka eyi, momo utima wove ka wa sungulukile ku Suku.

²² Likekembela ekandu eli liove, kuenje likutilila ku Ñala okuti, nda ci tava, ocisimilo cutima wove cecelua.

²³ Ame nda ku limbuka okuti vundulu yi lula kuenda wa kutiwa lukolo wevĩho.

²⁴ Simono wa kumbulula hati, Liñutilili ene ku Ñala okuti lacimue cevi wa tukuli ci mbeta.

²⁵ Eci Petulu la Yoano va imba uvangi wavo, leci va kunda ondaka ya Ñala, oco va tiukila ko Yerusalãi. Vonjila, poku enda, va kundila ondaka yiwa vovaimbo a lua a va Samária.

²⁶ Filipu puãi, ungelo wa Ñala wa popia laye hati, Katuka, kuende ko Sul, wila velila li tunda ko Yerusalãi li enda ko Gasa hailio li pita vekalasoko.

²⁷ Oco wa katuka wa enda. Vonjila wa sanga umue, u Etiopia, eye kalei kanene ka Kandake, Nasoma ya va Etiopia, okuti wa kundikiwa ukuasi wosi wa Nasoma. Eye weyilile ko Yerusalãi oku fendela,

²⁸ kuenje wa kala loku tiukila. Wa tumala vekãlu liaye loku tanga uprofeto Isaya.

²⁹ Oco Espiritu wa popia la Filipu, hati, Kuende, amela kekãlu olio.

³⁰ Oco Filipu wa lupukilako, yu wo yeva o kasi loku tanga uprofeto Isaya. Oco wo pula hati, Eci o kasi loku tanga hẽ, ca ku lomboloka?

³¹ Eye wo kumbulula hati, Ci ndomboloka ndati nda lomue o ndomboluila? Oco wa pañinya Filipu oku londa kekãlu loku tumala kumue laye.

³² Ocipama cocisonehua a kala loku tanga ceci, Ndeci omeme ya tualiwa kepondelo, ndeci omõla omeme uhila vakuaku yi pemula, haico eye ka asamele.

³³ Omo embombe, wa pumba esunga. Elie o ci sapuila epata liaye? Momo omuenyo waye wopiwa kilu lieve.

³⁴ Oco Kalei wa pula Filipu hati, Hu pula siti, Uprofeto wa ci tukuila elie? eye muẽle ale, ele umue wiñi?

³⁵ Oco Filipu, oku fetikila kocisonehua caco, wo lomboluila ondaka yiwa ya Yesu.

³⁶ Eci va enda vonjila veya kovava, kuenje Kalei wa linga hati, Ovava ya, nye ci nateka oku papatisiwa?

³⁷ Kuenje Filipu hati, Nda o kolela lutima wove wosi, ci tava. Kalei wa kumbulula hati, Ñolela okuti Yesu Kristu eye Omõla a Suku.

³⁸ Oco wa talamisa ekãlu kuenje va wila vovava, kavali kavo, Filipu la Kalei, yu wo papatisa.

³⁹ Eci va tunda vovava Espiritu lia Ñala wopa Filipu kuenje Kalei ko muile vali, puãi wa enda ungende waye loku yolela.

⁴⁰ Filipu puãi wa sangiwa ka Asiote, noke wamako kungende waye kuenje wa kunda ondaka yiwa vovaimbo osi toke a pitila ko Kaisarea.