OVILINGA 7 - Embimbiliya - Bíblia Sagrada em Umbundu

¹ Oco, ocitunda cinene co pula citi, Ovina evi hẽ, viocili ale?

² Stefano wa kumbulula, hati, Ene akuetu, lene alosekulu, njeveleli, Suku ukuolamba wa tukulukilile ku kukululu yetu, Avirahama, cina a kaile vo Mesopotamia, osimbu ka tungile handi vo Harana.

³ Wa popia laye hati, Tunda vofeka yene lo koluse luove, kuende vofeka hu lekisa.

⁴ Oco wa tunda vofeka ya va Kaldea, kuenje wa tunga vo Harana. Eci isiaye a fa oco Suku wo wupa vo Harana, kuenje wo sondoluila vofeka yilo wa tungi ndeti cilo.

⁵ Haimo lumue, ka wihililemo ocipiñalo, ndaño ociliatelo ca soka lomãi yaye, puãi wa likuminya oku yeca kokuaye kuenda kombuto yaye, ndaño ka kaile lomõla.

⁶ Suku wo lomboluila hati, Omãla vove va ka tunga vofeka yamãle ndakombe. Vakuafeka va va lingisa apika loku va talisa ohali ovita vikuãla kanyamo.

⁷ Suku wa popia hati, Puãi ame muẽle, ame netuluila ofeka yi va vumbisa, kuenje noke va tundamo, veya, va fendela vocitumalo cilo.

⁸ Kuenje wa wiha ocisila cevamba. Oco, eci Avirahama a cita Isake, wo seva evamba eteke liecelãla. Isake wa cita Yakoba, kuenje Yakoba wa cita vakukululu ekui la vavali.

⁹ Vakukululu, omo va kuatela Yosefe onya, oco vo landisa ke Egito. Puãi Suku wa kala laye,

¹⁰ kuenje wo popela kohali yaye yosi, wo muisa esunguluko lolondunge kovaso a Fareo, Soma ye Egito. Oco Fareo wo lingisa epalanga ve Egito, kuenda vonjo yaye yosi.

¹¹ Noke kueya onjala kofeka yosi ye Egito lo ko Kanana, ohali yaco ya lua. Olosekulu vietu ka via sangele eteku.

¹² Puãi, eci Yakoba a yeva okuti ve Egito muli okulia, oco wa tuma olosekulu vietu ungende wa tete.

¹³ Kungende wavali Yosefe wa lisituluila ku vahuvaye, kuenje epata lia Yosefe lia limbukiwa la Fareo.

¹⁴ Oco Yosefe wa tuma oku upilila isiaye Yakoba kuenda vakuositue waye vosi, okuti akui epanduvali komanu komanu vatãlo.

¹⁵ Oco Yakoba wa lokila ve Egito. Eci a fa, eye lolosekulu vietu,

¹⁶ oco va tualiwa ko Sekeme ha va kendiwa veleva lina Avirahama a landele londando yopalata komãla va Hamore vo Sekeme.

¹⁷ Puãi, eci oloneke viohuminyo yina Suku a likuminya la Avirahama via kamba naito oku tẽla, oco omanu vaco va luila ve Egito omo va licita.

¹⁸ Noke ve Egito mua viala osoma yikuavo ka ya kũlĩhile Yosefe.

¹⁹ Eye wa kala latutu oku linga cĩvi lepata lietu. Wa handeleka olosekulu vietu oku inasi oloñaña viavio okuti ka vi kala vali lomuenyo.

²⁰ Koloneke viaco haiko Mose a citiwa. Eye wa piãla keposo, ndaño ku Suku. Wa tekuiwila vonjo ya isiaye olosãi vitatu.

²¹ Eci inasiwa, oco omõla a Fareo ukãi wo yelula kuenje wo tekula ndomõlaye muẽle.

²² Mose wa longiwa uloño wosi wa ve Egito, haeye wa loñoloha, ci kale kueci a popia, ci kale kueci a linga.

²³ Eci a tẽla akui akuãla kanyamo oco vutima waye mueya ocisimilo coku pasula vakuavo va Isareli.

²⁴ Oku mola umue pokati kavo wa kala loku lingiwa lãvi, eye wo tundila olunda, kuenje, oku fetuluinyila u wa lingiwa lãvi, wa ipa u Egito.

²⁵ Eye wa soka hati, Vakuetu ci va lomboloka okuti Suku o va muisa epopelo leka liange, puãi ka ca va lombolokele.

²⁶ Hẽla yaco wa tukulukila kokuavo osimbu va kala loku liyenja. Eye wa yonguile oku va inalisa oco wa popia hati, Ene alume, vusitue, nye vu livaluila?

²⁷ U wa kala loku valula ukuavo wo pañula hati, Wa ku kapa okuti o linga ombiali yetu, pamue onganji yetu, helie?

²⁸ O yongola he oku njipa ndeci wa ipaile hẽla u Egito?

²⁹ Mose, oku yeva ondaka eyi, wa tila, yu wa linga ocingendelei vofeka ya Midiane omo a citila omãla vavali valume.

³⁰ Eci pa pita akui akuãla kanyamo, oco ungelo wo tukulukila vekalasoko liomunda ya Sinai, vulienge wondalu vocisapa.

³¹ Eci Mose a ci mola wa komoha owima waco, kuenje, eci eya ocipepi oku ci tala, oco kua yevala ondaka ya Ñala yiti,

³² Ame Suku yolosekulu viove, ndi Suku ya Avirahama la Isake kuenda Yakoba. Mose wa luluma kuenje ka lukutile vali oku talako.

³³ Oco Ñala wa popia laye hati, Lula olohaku polomãi viove, momo apa o tãi osi yaco yi kola.

³⁴ Nda mola ohali yomanu vange va kasi ve Egito, nda yeva okuleñaleña kuavo kuenje nda lokila oku va popela. Kaliye, enju hu tume ke Egito.

³⁵ Oco, Mose una va pañuile cina vo pula vati, Wa ku kapa okuti o linga ombiali yetu pamue onganji yetu elie? eye Suku a tuma okuti o linga ombiali kuenda upopeli. Suku wo tuma lungelo una wo tukulukila vocisapa.

³⁶ Oco Mose wa vopa, kuenje wa va songuila eci va tunda. Wa linga ovikomo lovilimbu ve Egito, lo ko Kalunga Kakusuka, kuenda vekalasoko, akui akuãla kanyamo.

³⁷ Mose u, eye una wa popia la va Isareli, hati, Suku o katuila pokati kene uprofeto ndame.

³⁸ Mose u, eye una wa linga kapitiya pokati kungelo a vangula laye vomunda Sinai kuenda olosekulu vietu eci va kala pamosi vekalasoko. Eye wa tambula olondaka viomuenyo ha vi eci kokuetu.

³⁹ Olosekulu vietu puãi, ka via tavele oku pokola kokuaye, vo pañula, kuenje vovitima viavo va tiukila ke Egito.

⁴⁰ Va popia la Arone vati, Tu sowile olosuku ha vi tu songuila, momo Mose u wa tu upa ve Egito, eci cu kuete ka tu ci.

⁴¹ Oco, voloneke viaco, va luvikiya onale kuenje va lumbila ociñumañuma caco ocilumba, yu va nyamuila upange wovaka avo.

⁴² Suku puãi, wa va tinduka kuenje wa va eca koku fendela olohoka viovailu, ndeci ca sonehiwa velivulu liovaprofeto, citi, Apata lia Isareli, ame wa ndumbili ovinyama via ipaiwa, lovilumba, akui akuãla kanyamo vekalasoko?

⁴³ Kotoko! Wambati ombalaka ya Moloki, kuenda olumbungululu lua suku yene Rafane, haivio oviñumañuma wa lulikili oku fendela. Oco cilo ndu sondoluili kupãla, okuti ko Bavulono ocipepi.

⁴⁴ Olosekulu vietu via kala lombalaka yocisila vekalasoko. U wa vangula la Mose wo lomboluila ndeci a yi tunga, kuenje wo lekisa oseteko yaco.

⁴⁵ Olosekulu vietu via yi tambula kuenje via enda layo eci via iñila kumue la Yehosua volofeka viomanu Suku a tundisila kovaso olosekulu vietu. Haimo ya kala toke koloneke via Daviti.

⁴⁶ Eye wa sanga esumũlũho ku Suku kuenje wa pinga oku tungila Suku ya Yakoba onjo.

⁴⁷ Puãi u wo tungila onjo, Salomone.

⁴⁸ Haimo lumue, Suku Fu ka kala kala volonjo via tungiwa lovaka, ndeci ca popia uprofeto hati,

⁴⁹ Ñala wa popia hati, Ilu ocalo cange, losi ociliatelo colomãi viange, oco onjo ye vu nungila? Ocitumalo cange coku puyukila ci kasi pi?

⁵⁰ Heka liangeko hẽ lia lulika ovina evi viosi?

⁵¹ A vakuapasingo a kevela, haene vuviyamba viovutima lovovatui, vu litamalala ño-o le Espiritu Sandu. Ndeci olosekulu viene via linga haico ene vu linga.

⁵² Uprofeto upi hẽ olosekulu viene ka vio kangisile? Kuenje va ipa ava va imba owanji wokuti Ukuesunga iya. Ukuesunga waco, eye una ene wa pakuli ndopo, kuenje wo wipayi,

⁵³ haene wa tambuli ovihandeleko via eciwa lovangelo kuenje ka wa vi pokuili.

⁵⁴ Oco, eci va yeva olondaka evi, va fungula vovitima, kuenje vo litakilila ovayo.

⁵⁵ Puãi eye we yuka Espiritu Sandu, kuenje, oku tunguila ovaso kilu, wa mola ulamba wa Suku, la Yesu yo, o tãi kondio ya Suku.

⁵⁶ Oco wa linga hati, Tali! Ndete ilu lia yuluka kuenje Mõlomanu yo, o tãi kondio ya Suku.

⁵⁷ Ovo puãi, va vilikiya lolukandi, va sitika ovatui avo, kuenje va vulumũhĩla vosi kumuamue.

⁵⁸ Vo tundisa vimbo kuenje vo sosola lovawe. Olombangi viaco via kapa olonanga viavo polomãi viocikuenjepombo Saulu.

⁵⁹ Osimbu va kala loku u sosola, Stefano wa likutilila hati. A Ñala Yesu, tambula omuenyo wange.

⁶⁰ Oco wa kekama kuenje wa vilikiya lolukandi, hati, A Ñala, ku ka va tendele ekandu eli. Eci a ci popia wa pekela olufa.