OVILINGA 5 - Embimbiliya - Bíblia Sagrada em Umbundu

¹ Puãi ulume umue, Ananiya, kumue lukãi waye Safira, wa landisa epia,

² yu wa soleka onepa yondando yaco, kuenje weya lonepa yikuavo oku yi kapa polomãi viovapostolo. Ukãi waye wa ci kũlĩha.

³ Petulu wa linga hati, A Ananiya, nye Satana e yukisila vutima wove uhembi woku kemba Espiritu Sandu loku soleka onepa yondando yepia?

⁴ Osimbu kua li landisile hẽ, ka lia kaile liove muẽle? Leci wa li landisa olombongo viaco hẽ, ka via kaile viove oku linga lavio ndeci wa panga? Elinga ndeli wa li panga ndati vutima wove? Kua kembele omunu te Suku.

⁵ Eci Ananiya a yeva olondaka evi wa kupuka kuenje wa fa. Usumba wa lua wa kuata vosi va ci yeva.

⁶ Akuenje oku votoka vo wiña onanga, vo tuala kusenge, kuenje vo kenda.

⁷ Kovaso yolowola vitatu ukãi waye wa iñila, eye ka kũlĩhile eci ca pita.

⁸ Petulu wa popia laye hati, Sapuileko nda olombongo evi ovio wa landisi epia. Eye hati, Ovio.

⁹ Petulu puãi wo pula vali hati, Nye wa litaveli pokati oku nyika Espiritu lia Ñala? Olomãi viava va kenda veyove vievi puvelo, kuenje va ku ambatavo.

¹⁰ Haico a kupukila kolomãi viaye kuenje wa fa. Akuenje, oku iñila, vo sanga wa fa, va tunda laye, yu vo kenda ponele ya veyaye.

¹¹ Usumba wa lua wa kuata ekongelo liosi kuenda omanu vosi va yeva ovina evi.

¹² Va tuwa oku ongolokela vocindumba ca Salomone. Ovilimbu via lua lovikomo via lingiwa pokati komanu lovaka ovapostolo.

¹³ Puãi lomue ukuavo wa lukuta oku kala lavo, ndaño omanu va va pandiya.

¹⁴ Kua vokiyiwa va lua va tava ku Ñala, owiñi walume lakãi,

¹⁵ okuti va nena ava va vela valuwa, kuenje va va pekelisa kovola lo poviyalo, okuti, eci Petulu a pita, oco ocilelembia caye ci vetapo vamue, ndaño ka va luile.

¹⁶ Kueyavo owiñi wa tunda kovaimbo a lisungue la Yerusalãi. Va ambata olombei, lava va talisua ohali laspiritu ãvi, kuenje vosi va sakuiwa.

¹⁷ Puãi ocitunda cinene ca votoka, la vosi va kala laye okuti ocisoko ca va Sadukeo. Vosi yavo ve yuka onya,

¹⁸ oco va kuata ovapostolo kuenje va va kapa vokayike kaño.

¹⁹ Puãi pokati kuteke, ungelo wa Ñala wa yikulula apito okayike, wa vopamo kuenje wa popia hati,

²⁰ Kuendi konembele, talami vilu kovaso omanu, ka lomboluili omanu omuenyo ulo.

²¹ Eci va ci yeva oco va iñila vonembele omele, kongula, kuenje va longisa. Oco, ocitunda cinene ceya, lava va kala laye. Vongolola onjango yavo lakulu va va Isareli kuenje va tuma kokayike oku ka vopa.

²² Puãi, eci akuenje va enda, ka va va sangele vokayike, oco, oku tiuka, va sapula vati,

²³ Tua ka sangele okayike ka yikiwa lutate. Vakuakulava va kala povivelo. Puãi, eci tua yikulula, lomue tua sangamo.

²⁴ Oco, eci Kesongo lionembele lovitunda vinene va yeva olondaka evi, va tokotelua kuenje vati, Eci puãi ci laika oku sulila pi?

²⁵ Oco, umue weya, wa va sapuila hati, Alume vana wa kapi vokayike va kasi vonembele oku longisa omanu.

²⁶ Oco Kesongo wa enda lakuenje, wa ka vopile, puãi halonjangako, momo va kala lusumba womanu sanga va va asa ovawe.

²⁷ Oco, eci va ka vopile, va va nena vonjango. Oco ocitunda cinene ca va pula,

²⁸ citi, Tuo handeleki longusu, tuti, Ko ka longisi vali vonduko yaco. Puãi haimo wa yukisi Yerusalãi lovilongua viene, kuenje wa pangi oku tu pisila osonde yomunu waco.

²⁹ Puãi Petulu lovapostolo va kumbulula vati, Cetu oku pokola ku Suku, komanu hakoko.

³⁰ Suku yolosekulu vietu wa pindula Yesu, una ene wa pondi loku u nyoñamisila kuti,

³¹ haeye Suku a kemalisila kondio yaye ha lingi Njalu kuenda Upopeli oku eca ku va Isareli oku likekembela akandu longecelo yao.

³² Etu tulombangi violondaka viaco. Espiritu Sandu, una Suku a eca komanu vosi va pokola kokuaye, layevo ombangi.

³³ Ovo, eci va yeva olondaka evi, va fungula kuenje va yongola oku va ipa.

³⁴ Puãi vonjango mua kala u Fariseo umue, onduko yaye Gamalieli, eye ulongisi wovihandeleko kuenje wa sumbiwa lomanu vosi. Eye wa votoka, kuenje wa popia hati, Omanu vaco va tundile handi posamua.

³⁵ Oco wa popia lavo hati, Alume va Isareli, lunguki leci wa soki oku linga lomanu ava.

³⁶ Momo ale kua katukile Teodasi. Eye wa litukula hati, Ndimunu unene. Omanu va litokeka laye va lua, va soka ndovita vikuala. Puãi eye wa ipaiwa, kuenje vosi va tava kokuaye va sandoka, yu va taka.

³⁷ Noke kua katuka Yuda u Galilea koloneke vioku lisonehisa. Layevo wa koka omanu okuti vo kuama. Layevo wa nyõleha kuenje vosi va tava kokuaye va sandoka.

³⁸ Kaliye mopia lene siti, Liweki komanu ava. Va kale ño, momo etavo eli, pamue upange u, nda womanu, u nyõleha.

³⁹ Puãi, nda wa Suku, ene ka vu tẽla oku va yula. Kuli ohele sanga vu linga ndava va liyaka la Suku.

⁴⁰ Oco va tava kokuaye, kuenje, eci va pañinya ovapostolo, va va tipula. Noke va va handeleka, vati, Ka ci tava oku longisa vali vonduko ya Yesu, kuenje va va eca.

⁴¹ Ovo va tunda vonjango loku yolela, momo va sangiwa okuti va sesamela oku talela onduko yaco esepu.

⁴² Oloneke viosi ka va liwekele oku kundila vonembele lo volonjo, loku longisa okuti Yesu eye Mesiya.