OVILINGA 28 - Embimbiliya - Bíblia Sagrada em Umbundu

¹ Eci tua puluka va tu sapuila okuti onduko yocifuka caco Melita.

² Vakuafeka yaco ohenda va tu linga hayañoko. Omo ombela ya kala loku loka, lomo kua talala oco va tu siakalela ondalu kuenje va tu hindikisa vosi.

³ Paulu wa tiaña ocitungu colohui. Eci a vi vokiya pondalu oco onyoha ya tunda kovuya waco, kuenje yo kakatela keka.

⁴ Eci vakuafeka va mola ocipuka co nyoñama keka liaye, oco va livangula pokati vati, Ka ci pumbi okuti omunu u omondi. Ndaño wa puluka kokalunga haimo Esunga ka tavele okuti o kala lomuenyo.

⁵ Eye puãi wa nyĩla ocipuka vondalu kuenje ka co lingile cimue.

⁶ Ovo va soka okuti o lenda pamue o fa ocipikipiki. Puãi, eci va lavoka osimbu, kuenje lopo ka va muile cĩvi co sanga, oco va pongolokamo vali, vati, U-u osuku yimue.

⁷ Tua kala vusenge u lisungue lovapia osekulu yocifuka, onduko yaye Popiliu. Eye wa tu hindikisa ciwa oloneke vitatu.

⁸ Voloneke viaco, isia ya Popiliu wa vela ombambi loku pulukala osonde. Paulu wa iñilamo, wa likutilila, wo kapa ovaka aye, kuenje wo sakula.

⁹ Noke vakuavo vo vocifuka va vela veya kuenje va sakuiwa.

¹⁰ Va tu iha olombanjaile via lua. Eci tua tundako va tu longekela evi tua sukila.

¹¹ Eci pa pita olosãi vitatu, oco tua tunda lonaviyu yimue yo ko Alexandria ya kala kocifuka olosãi viombambi. Ondimbukiso yayo olonjamba.

¹² Eci tueya ko Surakuso tua kalako oloneke vitatu.

¹³ Oku tundako tua pita ohondo yu tueya ko Regio. Eci pa pita eteke liongongo ofela yo ko Sul ya sika, keteke likuavo tueya ko Puteoli.

¹⁴ Oko tua sanga vamanji, ovo va tu peya oku kala lavo oloneke epanduvali. Noke tua pitila ko Roma.

¹⁵ Vamanji tua sangako, eci va tu yeva, oco veya toke kocitanda ca Ápiu kuenda kolovenda vitatu oku ñualehela letu. Eci Paulu a va mola, wa pandula Suku yu wa kuata utõi.

¹⁶ Eci tua pitila ko Roma kesongo liocita wa eca olomandekua kusongui wolohoka, Paulu puãi va tava okuti o likalela lesualali liu lava.

¹⁷ Oco eci pa pita oloneke vitatu wa pañinya akulu va va Yudea va kalako. Eci va liongolola eye wa popia lavo hati, Akuetu, ndaño sia lingile omanu vetu cimue, pamue oku sama ovihõlo viavakukululu, haimo ko Yerusalãi va makuila povaka a va Roma.

¹⁸ Ovo, eci va sombisa, va yonguile oku ngeca omo ka va sangele leko lia sesamela okufa.

¹⁹ Puãi, eci va Yudea va patãla, oco ca mbetisa onjanga yoku tukula Kaisare. Cimue coku pindika laco ofeka yetu si kuete.

²⁰ Oco ndo pañinyili okuti wiyi ndu moli hã si vangula lene, momo elavoko lia Isareli olio nda pandekiwila lelienge eli.

²¹ Oco va popia laye vati. Ka tua tambuile ovikanda ku va Yudea vi ku tukula. Lomue ukuetu weya kulo wa ku sapula, pamue wa ku popela cimue cĩvi.

²² Puãi tu yongola oku yeva ovisimilo viove, momo, kondaka yocisoko caco tua kũlĩha okuti kuosi va ci patayãla.

²³ Oco, eci vo tukuila eteke, va lua veya kokuaye vonjo omo a sikila, yu wa va lomboluila ondaka yaco. Wa imbila usoma wa Suku uvangi kovaso avo, kuenje wa seteka oku va tavisa ku Yesu, poku upa olondaka kovihandeleko via Mose kuenda kovaprofeto. Wa ci linga tunde omele toke oñolosi.

²⁴ Vamue va tava kovina via popiwa, vamue ka va tavele.

²⁵ Eci ka va litavelele pokati kavo, leci Paulu a popia lavo ondaka yimuamue, oco va enda. Ondaka ya popia Paulu yeyi, Espiritu Sandu wa popia ciwa kolosekulu vietu lomẽla wuprofeto Isaya eci a linga hati,

²⁶ Kuende komanu ava, linga huti, Oku yeva vu yeva muẽle, puãi ko yevite, Oku mola vu mola, puãi haimo ka vu lete.

²⁷ Momo ovitima viomanu ava via seluka. Atui avo a yeva lenyoño. Va patisa ovaso avo sanga va mola lovaso kuenda va yeva lovatui kuenda va limbuka lovitima viavo, ha va pongoloka si va sakula.

²⁸ Oco limbuki okuti eyovo eli lia Suku lia tumiwa ku vakualofeka. Ovo va li yeva.

²⁹ Eci a popia olondaka evi oco va Yudea va enda loku lihoyisa ca lua pokati.

³⁰ Eye wa kala vonjo a fetela anyamo avali ombulu. Wa tambola vosi veya kokuaye.

³¹ Wa kunda kunda usoma wa Suku, kuenje wa longisa ovina via Ñala Yesu Kristu lutõi, kuenje lomue wo timbuiya.