OVILINGA 27 - Embimbiliya - Bíblia Sagrada em Umbundu

¹ Eci ca sokiyiwa okuti tu enda lonaviyu ki Italia oco va kundika Paulu lolomandekua vikuavo ku kesongo limue liocita, onduko yaye Juliu, eye ukuahoka ya Augustu.

² Tua wila vonaviyu yo ko Andrometeo ya kala loku pita katapu ofeka ya Asia. Tua fetika ungende. Aristarko u Makedonia wa tunda ko Tesalonike wa enda kumue letu.

³ Eteke likuavo tua pitila ko Sidono. Julia wa linga Paulu ohenda, yu wa tava okuti enda ku vakuavo ha vo kuatisa.

⁴ Oco, oku tundako, tua vambala ko Kupro momo ofela ya tu tateka.

⁵ Eci tua yoka okalunga ka Kilikia kuenda ka Pamfúlia oco tua pitila ko Mura imbo lio ko Lukia.

⁶ Oko kesongo liocita a sanga onaviyu ya tunda ka Alexandria yenda ki Italia yu wa tu kapamo.

⁷ Tua enda levando oloneke via lua kuenje tua pitila ocipepi lo ko Kinido lohali ya lua. Noke, omo ofela ka ya tavele okuti tuamako, oco tua vambala ko Kurete oku pita ocipepi loko Salimone.

⁸ Oku pitako lohali ya lua tua pitila kocitumalo ca tukuiwa Cihondolokacaposoka, haico ci lisungue limbo lia Lasea.

⁹ Omo tua pesela ale oloneke via lua, lomo oku endela vonaviyu ci koka ohele momo eteke lioku likandangiya okulia lia pita, oco Paulu wa lungula hati,

¹⁰ Ene alume, nda limbuka okuti ungende ulo u kala wohali lepese lia lua. Epese liaco haliovikuatako lika lonaviyu, puãi lovimuenyo le.

¹¹ Puãi kesongo liocita wa tava kombindululi kuenda ku muẽleanaviyu, evi via popia Paulu havioko.

¹² Kuenje omo etapu liaco ka lia finile oku tumalako olosãi viombambi, oco va lua va imba onumbi vati, Kulo tu tundako. Tu fetika ungende sanga mbi tu pitila ko Foinike kuenje ci ka tava oku tumala oko olosãi viombambi. Etapu lia Foinike lia kala vo Kurete kuenje lia imba ovaso kofeka yo Sul kuenda kofeka yo Norte.

¹³ Eci ofela yo ko Sul ya leñehako oco va soka vati, Tu kuete eci tua yongola, oco, eci va yelula olonjundo, va vambala ocipepi lo ko Kurete.

¹⁴ Noke okasimbu kaño kueya ofela yonupi ya tukuiwa Eurakulo.

¹⁵ Eci onaviyu ya kuatiwa kuenje ka ya tẽlele oku litamalala lofela oco tua yeca ha yi endi lofela.

¹⁶ Tua pita konele yokacifuka ka tukuiwa Kaluda. Ca tu lingila upange wa lua oku pandeka okawato ka kokiwa lonaviyu.

¹⁷ Eci va ka yelula va pitisa ikolo kosi yonaviyu oku yi kolisa. Omo va kala lusumba sanga va liveta kondunda yeseke, oco va lowisa olonanga vionaviyu ha va endi lofela.

¹⁸ Omo ekungukungu liaco lia tu tuñunya ca lua, oco eteke likuavo va fetika oku inasi ovikuata.

¹⁹ Eteke liatatu oco va inasi ovikolo vionaviyu lovaka avo muẽle.

²⁰ Oloneke via lua ekumbi ka lia tundile, ndaño olombungululu. Ekungukungu lia tu sindika halititoko, oco tua pua elavoko liosi lioku popeliwa.

²¹ Eci va kala ño osimbu okuti ka va lile, oco Paulu wa votoka pokati kavo yu hati, Alume, hise nda wa njeveli kuenda nda ka wa tundili ko Kurete oku mola ohali eyi lepese eli.

²² Kaliye ndu peyi siti, Kolisiko, momo pokati kene ka pa peseka omuenyo umue, puãi onaviyu lika yi nyõleha,

²³ Momo uteke wetali kua nukulukila ungelo wa Suku yange u ndi vumba.

²⁴ Ungelo wa linga hati, A Paulu, ku ka yokoke. O talama kovaso a Kaisare, kuenda Suku wa ku iha vosi va endela kumue love vonaviyu.

²⁵ Oco kolisiko, ene alume, momo nda kolela Suku okuti ciya ndeci a popia lame.

²⁶ Haimo lumue tu ka imbiwa kocifuka cimue.

²⁷ Kuteke wekui lakuãla osimbu tua pungua ño vokalunga ka Adria oco vokati kuteke vakuanaviyu va soka vati, Tu kasi loku pitila ocipepi longongo yimue.

²⁸ Oku setekamo va sanga akui avali kapeka. Eci va amako vali va seteka kuenje va sanga ekui liapeka kapeka atãlo.

²⁹ Omo va kuata usumba wokuti sanga tu imbiwa kovawe oco va imbamo olonjundo vikuãla ketako lionaviyu, yu va felevela oku ca.

³⁰ Vakuanaviyu va sanda oku tila vonaviyu lelimbi. Osimbu va kala loku lowisa okawato kaco, oku viaviaya okuti va soka oku vokiya olonjundo kocinyulu,

³¹ oco Paulu wa popia la kesongo liocita, lasualali, hati, Avandeti, nda ka va siala vonaviyu, ka vu tẽla oku popeliwa.

³² Asualali va tetako ovikolo viokawato okuti ka kupuka.

³³ Eci kua kala loku ca Paulu wa peya omanu vosi okuti va lia cimue, kuenje hati, Etaili ca tẽla ekui lioloneke koloneke vikuãla okuti wa kali ño ndoto, ka wa lili cimue.

³⁴ Oco ndu peyi siti, Hise nda vu lia cimue cu wihi ongusu, momo vu popeliwa kuenje lalimue esinga liokovitue viene li nyõleha.

³⁵ Eci a popia ondaka eyi wa nyañula ombolo. Eci a yi panduila ku Suku kovaso avo vosi wa yi timbula, yu wa fetika oku lia.

³⁶ Oco vosi va kolisako kuenje va liavo.

³⁷ Vosi yetu tua kala vonaviyu tua tẽla ovita vivali kakui epanduvali komanu komanu epandu.

³⁸ Eci ve kuta va inasi otiliku vokalunga ha va leluisa onaviyu.

³⁹ Eci kua ca ka va limbukile ofeka, puãi va mola okacihondoloka ka kuete opalaya oco va panga oku londisako onaviyu, nda ci tẽliwa.

⁴⁰ Oco va tepako olonjundo kuenje va vi sia vokalunga. Va pandululavo ovikolo viovilapo, kuenje oku katula onanga yocinyulu conaviyu, va loña kopalaya.

⁴¹ Eci va kuama omunda yopokati kalondo va vetisapo onaviyu. Ocinyulu cokovaso ca tika veseke kuenje ca saka, puãi ocinyulu coketako lionaviyu ca fetika oku teka longusu yakimba.

⁴² Asualali va limba onumbi vati, Hise oku ipa olomandekua sanga umue o liteva ha puluka.

⁴³ Puãi kesongo liocita, omo a yongola oku popela Paulu, wa timbuiya ocipango cavo. Wa handeleka hati, Ava va tẽla oku yua va limbe vovava ha va tetekela kongongo.

⁴⁴ Vakuavo va endela kavaya, pamue kovikuata vionaviyu. Oco vosi va pitila kongongo kuenje va popeliwa.