OVILINGA 26 - Embimbiliya - Bíblia Sagrada em Umbundu

¹ Agripa wa popia la Paulu hati, Cilo o kuete evelo lioku lombolola ondaka yove. Oco Paulu wolõla eka liaye, kuenje wa imba ohasa yaye hati,

² A Soma Agripa, ndimbuka okuti nda sumũlũha omo etaili nẽla oku ku lomboluila olondaka viosi va Yudea va mindika lavio,

³ momo ove wa kũlĩha ciwa ciwa ovituwa viosi via va Yudea lolonamalala viavo. Oco nda ku pinga lesumbilo siti, Va njevelele lepandi.

⁴ Va Yudea vosi va kũlĩha omuenyo wange ndomo wa kala tunde kutila wange, okuti tunde kefetikilo liawo, eci nda kala la vakuepata vofeka yetu muẽle, kuenda vo Yerusalãi.

⁵ Va ñulĩha osimbu, nda va yongola oku cimbila uvangi, okuti nda kaile u Fariseo, kuenje va Fariseo ovo va piãla oku tõlisa ovihandeleko vietavo lietu.

⁶ Cilo ñasi vekanga mekonda lielavoko ñuetele ohuminyo Suku a likuminya lolosekulu vietu.

⁷ Apata etu ekui la avali a lavoka okuti ohuminyo yaco yi tẽlisua koku vumba vumba Suku lesunga utanya luteke. A Soma, elavoko liaco olio va Yudea va mindikila.

⁸ Nye vu simila hoti, Suku ka tẽla oku pindula vakualufa?

⁹ Ame muẽle nda sokele siti, Ca mosokela oku linga ovina via lua vioku tamalala londuko ya Yesu u Nasara,

¹⁰ kuenje nda vi linga vo Yerusalai. Eci nda tambula omoko yaco kovitunda vinene nda yika olosandu via lua votuyike. Puãi hacoko lika, eci va ipaiwa ame nda tava.

¹¹ Olonjanja via lua nda va yambuila volosunangonga viosi, loku va silĩha okuti va popia etonãi. Nda va fuanguila ca lua kuenje nda va landola toke kovaimbo a vakualofeka.

¹² Eci nda ilila olondaka evi ko Damasko lomoko ndopa kovitunda vinene locikundi cavo,

¹³ oco, a Soma, ekumbi pongunji kungende wange, nda mola ocinyi cokilu ca tua, cekumbi ci sule, ca nuila ame lava va enda lame.

¹⁴ Eci etu vosi tua kupukila posi, nda yeva ondaka ya popia lame velimi lio Heveru yiti, A Saulu, a Saulu, o ñangisila nye? Oku tasuila kolosongo ku ku vala.

¹⁵ Ame nda pula siti, Ove elie, a Ñala? Ñala wa kumbulula hati, Ame Yesu u o kasi loku kangisa.

¹⁶ Puãi votoka. Talama vilu. Momo eci nda ku tukulukilila ceci, nda ku nola okuti o linga oñuatisi kuenda ombangi yovina wa muila levi hu situluila.

¹⁷ Hu popela kepata eli kuenda ku vakualofeka oko hu tuma

¹⁸ oku patulula ovaso avo. O va patulula okuti va tunda kowelema ha va sangi utanya, loku tunda kuviali wa Satana ha va tiama ku Suku. Veya ku Suku okuti va mola ongecelo yakandu kuenda ocipiñalo pokati kava va yelisua omo va ñolela.

¹⁹ Oco, a Soma Agripa, sia sinile lowima wokilu.

²⁰ Oco tete nda kundila va Damasko, noke va Yerusalai, noke vofeka yosi ya Yudea, kovaso yaco vakualofeka. Vosi yavo nda va kundila, siti, Likekembeli akandu ene. Kondolokeli ku Suku. Kali lovilinga vi lekisa ocili okulikekemba kuene.

²¹ Ovina evi ovio va Yudea va ñuatela vonembele, haivio va sandela oku njipa.

²² Omo nda kuatasaiwa la Suku toke etaili oco ñasilili kulo oku imba uvangi wange kovaso omanu vatito lava vanene. Lacimue mopia te eci ovaprofeto la Mose va cimbila ale owanji.

²³ Momo ovo va popia vati, Mesiya o tala ohali, haeye o lianga oku pinduka ku vakualufa kuenje imba uvangi wocinyi kepata eli kuenda ku vakualofeka.

²⁴ Osimbu Paulu a lombolola ohasa yaye Festo wa popia lolukandi hati, A Paulu, vuyui. Okulilongisa kuove kua lua kua ku kokela uyui.

²⁵ Puãi Paulu hati, A Kuku, a Ñala Festo, siyuiko, puãi mopia olondaka via sunguluka haivio viocili.

²⁶ Omo Soma wa kũlĩha ovina evi oco nẽla oku popia laye lutõi. Nda kolela okuti pokati kovina evi ka peli cimue eye ka kũlihile, momo ka via lingiwile uyombeki.

²⁷ A Soma Agripa, o kolela hẽ ovaprofeto? Ndi ci okuti o va kolela.

²⁸ Agripa wa popia la Paulu hati, Wa sima hẽ okuti ndopo o navisa okuti ndinga ukua Kristu?

²⁹ Paulu hati, Ci kale ndopo, ci kale noke, ndi livela kovaso a Suku okuti, haveko lika puãi vosi va njeva etaili, nda va kala ndame,— ovikolo evi ovio lika havioko.

³⁰ Oco Soma wa votoka longuluvulu kuenda Bernike lava va tumala kumue lavo.

³¹ Eci va tunda va livangula pokati vati, Omunu u ka lingile cimue ca sesamela okufa pamue oku yikiwa.

³² Agripa yu wa popia la Festo hati, Ulume u nda ka tukuile Kaisare nda ca tava oku weca.