OVILINGA 25 - Embimbiliya - Bíblia Sagrada em Umbundu

¹ Festo, eci a tẽlisa oloneke vitatu vioku viala, oco wa tunda ko Kaisarea kuenje wa lamanela ko Yerusalãi.

² Ovitunda vinene kuenda akulu va va Yudea va sapula Paulu ku Festo, yu vo pinga vati,

³ Tu linge ohenda. U tumila oku iya kulo ko Yerusalãi. Vovitima va sima ongombo yoku u lavekala ha vo wipaila vonjila.

⁴ Festo wa kumbulula hati, Paulu o kasi vokayike vo Kaisarea, haiko njila ndopo.

⁵ Oco, vamue va kuete omoko pokati kene va ende lame. Nda omunu waco o kasi leko ovo va ko patisa.

⁶ Oloneke a kala lavo ekui ka lia supile, pamue mbi ecelãla. Kovaso yaco wa lokila ko Kaisarea. Hẽla yaco wa yala ekanga kuenje wa tumila Paulu.

⁷ Eci Paulu eya, va Yudea va tunda ko Yersualãi vo ñuala ocingonja, vo wasa ovako a lua, ovako aco puãi ka va tẽlele oku a imbila uvangi.

⁸ Paulu wa lombolola ohasa yaye hati, Sia sinilile ovihandeleko via va Yudea, ndaño vionembele, ndaño via Kaisare.

⁹ Puãi Festo, omo a yongola oku livondela la va Yudea, wa pula hati, O yongola oku lamanela ko Yerusalãi okuti oko ha ku tetuluila ovina evi?

¹⁰ Paulu puãi wa kumbulula hati, Nãi pekanga lia Kaisare opo ca sesamela oku netuluila. Va Yudea sia va lingile cimue ndeci ove wa kũlĩha ciwa!

¹¹ Oco, nda ndindingaĩvi okuti nda linga cimue ca sesamela okufa, ame si yuvula okufa. Puãi nda ovina evi va mindikila viesanda, lomue o tẽla oku makuila kokuavo. Ame nukula Kaisare.

¹² Oco Festo, eci a vangula la vakuekanga, wa kumbulula Paulu hati, Omo wa tukula Kaisare wenda ku Kaisare.

¹³ Eci pa pita oloneke vimue oco Soma Agripa la Bernike veya ko Kaisarea oku lama Festo.

¹⁴ Omo va kalako oloneke via lua oco Festo wa sapuila Soma ondaka ya Paulu, hati, Feliki wa sia kulo ulume umue omandekua.

¹⁵ Eci ndaile ko Yerusalãi, ovitunda vinene lakulu va va Yudea vo pindika, kuenje va pinga okuti ndu pisa.

¹⁶ Nda va kumbulula siti, Hacituwa ca va Romako oku pakula ño omunu ocali, osimbu u wa pindikiwa ka limuile lolomindiki viaye iso liso okuti o kumbulula ondaka vo pindikila.

¹⁷ Oco, eci va liongolola palo, sia kaile osimbu, puãi hẽla yaco haico nda yala ekanga, kuenje nda linga siti, Va nene ulume waco.

¹⁸ Eci olomindiki viaye via votoka ka vio pindikilile cimue cĩvi kovina ndo sokelele.

¹⁹ Puãi vo kuatela ño olonamalala vimue viefendelo liavo, kuenda vimue viumue wa fa, Yesu. Ulume waco puãi, onduko yaye Paulu, wa popia hati, Yesu lopo o kasi lomuenyo.

²⁰ Omo ca muiya oku kũlĩhisa ovina evi oco ndo pula siti, O yongola oku enda ko Yerusalãi, okuti oko ha ku tetuluila olondaka evi?

²¹ Puãi, eci Paulu a pinga okuti o yikiwa toke o tetuluiwa la Kaisare, oco nda handeleka okuti o yikiwa muẽle toke ndu tuma ku Kaisare.

²² Agripa wa popia la Festo hati, Lamevo njongola oku liyevela omunu waco. Festo wa kumbulula hati, U yeva hẽla.

²³ Oco, hẽla yaco, Agripa la Bernike veya lulamba wa lua, kuenje va iñila vonjo yekanga kumue la vakesongo lalume va kemala vimbo. Festo wa tuma hati, Neni Paulu, kuenje Paulu wa neniwa.

²⁴ Oco Festo a linga hati, A Soma Agripa, lene vosi vu kasi kulo letu, vu lete omunu u. Va Yudea vosi vo pindika kokuange, ndaño ko Yerusalãi, ndaño kulo. Va vilikaiya vati, Eye ka sesamela oku kala vali lomuenyo.

²⁵ Ame puãi, eci nda sanga okuti ka lingile cimue ca sesamela okufa, oco, omo eye muẽle a tukula Kaisare, ame nda panga oku u tuma kokuaye.

²⁶ Puãi, omo si kuete ondaka yocili yoku u pindika layo ku Ñala yange Kaisare, oco ndo nena kokuene, ca piãla kokuove, a Soma Agripa. Ndo nena okuti eci tu mala oku u pula oco sanga cimue coku soneha.

²⁷ Momo kokuange ci linga ño esanda oku tuma ño omandekua osimbu ka vo tukuilile eko.