OVILINGA 23 - Embimbiliya - Bíblia Sagrada em Umbundu

¹ Paulu wa imba ovaso konjango, kuenje wa popia hati. A vamanji, omuneyo wange wosi nda vumba Suku lutima wa pua eko toke etaili lilo.

² Ocitunda cinene, Ananiya, wa popia lava va kala ocipepi laye, hati. U tusuli komẽla.

³ Oco Paulu wa popia hati. Ove, acimano ca yanguiwa, Suku o ku veta. Ove wa tumalelapo oku nepisila ndeci ca soka lovihandeleko, osimbu haive wa sinila ovihandeleko loku linga huti, Vo vete?

⁴ Ava va kalako va popia vati, Nga o tuka ocitunda cinene ca Suku?

⁵ Paulu wa linga hati, Akuetu, sia ci kũlĩhile okuti eye ocitunda cinene, momo ca sonehiwa citi, Ku ka popie cĩvi ombiali yofeka yove.

⁶ Puãi, eci Paulu a limbuka okuti vamue va Sandukeo, kuenda vamue va Fariseo, oco a popia lonjango lolukandi hati, Akuetu, ame ndu Fariseo, haime ndimõla a va Fariseo. Ñasi loku sombisilua elavoko liepinduko lia vakualufa.

⁷ Eci a popia ndoco, kueya olonamalala pokati ka va Fariseo la va Sandukeo. Oco owiñi wa litepa.

⁸ Momo va Sandukeo va longisa vati, Ka kuli epinduko, ndaño ungelo, ndaño ocilulu. Ovina viaco puãi, katatu kavio, va Fariseo va vi tava.

⁹ Oco kueya onjuela ya lua, kuenje vakuavisonehua vamue va tiamela ku va Fariseo, va votoka kuenje va toñomãla vati, Ka tua sangele cimue cĩvi komunu u. Mbi wa popia ocili, okuti espiritu limue, pamue ungelo umue, wa popia laye.

¹⁰ Kua wenguka ema linene. Kuenje omo Kesongo a kala lusumba sanga Paulu o nyanyuiwa lavo, oco wa tuma asualali ha vo poli pokati kavo loku u tuala vombonge.

¹¹ Uteke wa kuamamo Ñala wa talama kumue la Paulu, kuenje wa popia laye hati, Kolisako. Momo ndeci wa njimbila uvangi ko Yerusalãi haico o njimbilavo uvangi ko Roma.

¹² Eci kua ca omẽle, va Yudea va tumbika ongombo, yu va lisinga vati, Ka tu li, ka tu nyui, te tua ipa Paulu.

¹³ Ava va linga ungalu waco akui akuãla va supa.

¹⁴ Oco va enda kovitunda vinene kuenda kakulu, va linga vati, Tua lisinga lesingo li kola, tuti, Ka tu mahi cimue te tua ipa Paulu.

¹⁵ Oco ene, kumue lonjango, tumi ku Kesongo oco o nene kokuene. Ci lingiwe letutu. Ci molehe okuti tu yongola oku patisa ondaka yaye lutate. Etu tu taĩlili oku wipa osimbu ka pitilile.

¹⁶ Ocimumba ca Paulu ca yeva okuti vo lavekela, oco weya, wa iñila vombonge, kuenje wa ci sapuila Paulu.

¹⁷ Paulu wa kovonga umue usongui, wa popia laye hati, Tuala umalehe u ku Kesongo, momo o kasi londaka yoku u sapuila.

¹⁸ Eye wa enda lumalehe ku Kesongo, oco wa popia hati; Omandekua Paulu wa ñovonga yu wa minga oku nena umalehe u kokuove, o kuete cimue coku vangula love.

¹⁹ Kesongo, oku u kuata peka, wo tiamisila ponele pulika, yu wo pula hati, O kuete nye coku sapuila?

²⁰ Eye hati, Va Yudea va livangula oku ku pinga okuti hẽla o va nenela Paulu konjango, vati, Tu ka patisa vali ondaka yaye lutate.

²¹ Puãi, ku ka tave kokuavo, momo alume vakuavo, akui akuãla va supa, vo lavekela, va lisinga vati, Ka tu li, ka tu nyui, te tua wipa. Cilo va kapelako ale, kuenje va kasi loku talamela ondaka yove.

²² Oco Kesongo wa eca umalehe. Wo wusika, hati, Ku ka ci popie lomunu okuti wa ci sapuila.

²³ Noke wa kovonga asongui vavali vovisoko viocita ocita, hati, Mãlẽhisi ovita vivali viasualali, kuenda vakuakuendela kotuvalu akui epanduvali kuenda ovita vivali via vakualonjelia. Va lipongiye okuti va tunda kola yatatu kuteke, va ende ko Kaisarea.

²⁴ Angiliyivo otuvalu okuti Paulu endelako. U tuali ciwa konguluvulu Feliki.

²⁵ Noke wa soneha ukanda, hati,

²⁶ Ame ndi Kaludio Lusia ndi sonehela Feliki, onguluvulu ya piãla. Epasu.

²⁷ Ulume u wa kuatiwa la va Yudea yu va soka oku wipa. Omo nda yeva okuti u Roma oco ndeya kokuaye lasualali kuenje ndo popela.

²⁸ Eci nda yongola oku limbuka ondaka vo pindikila, ndaile laye konjango yavo.

²⁹ Nda limbuka okuti vo pindikila olondaka vimue viovihandeleko viavo, puãi ka vo pindikilile cimue ca sesamela okufa pamue oku yikiwa.

³⁰ Eci ca sapuilua okuti vo tumbika ongombo, oco ndo tuma kokuove lonjanga, kuenje nda pañinya olomindiki viaye oku u pindika kokuove.

³¹ Oco asualali, ndeci va handelekua, va enda la Paulu, kuenje veya ka Antipatiri kuteke.

³² Hẽla yaco, ovo va tiukila kombonge, Paulu vo kundika ku vakuatuvalu okuti va enda laye toke ko Kaisarea.

³³ Eci va pitila ko Kaisarea va eca ukanda ku Nguluvulu, Paulu layevo vo wecavo kokuaye.

³⁴ Eci Nguluvulu a tanga ukanda oco wa pula hati, Omunu u wa tunda kofeka yipi? Eci a yeva okuti ko Kilikia,

³⁵ wa popia hati, Hu yeva eci olomindiki viove viya. Noke wa handeleka hati, Vo lavele vombonge ya Herode.