OVILINGA 22 - Embimbiliya - Bíblia Sagrada em Umbundu

¹ A vamanji, lene vu vo tate, yeveleli uvangi wange ndi popia lene cilo.

² Eci va yeva okuti wa popia lavo o Heveru voha ekukutu. Yu wa linga hati,

³ Ame ndu Yudea. Nda citiwila ko Tarso ko Kilikia, puãi nda pindisiwila vimbo lilo. Ovisila violosekulu vietu nda vi lilongisila vongolo yulongisi Gamalieli. Nda pindisiwa oku pokola lutate kovihandeleko viosi violosekulu vietu. Nda kala lombili yoku fendela Suku ndeci ene vosi vu kasi layo etaili.

⁴ Onjila eyi ñunda ndeti nda yi yambuila omanu toke kokufa. Alume lakãi ava va yi kuama nda va kuta loku va yikisa votuyike,

⁵ ndeci ocitunda cinene lonjango yosi yakulu va tẽla oku njimbila uvangi. Nda tambula kokuavo ovikanda via sonehiwila vamanji vo ko Damasko, kuenje nda ileko oku ka kuta ava va kalako loku va nena ko Yerusalãi okuti va yambuiwa.

⁶ Eci nda kala loku enda ungende wange, oku panda ko Damasko, ekumbi pongunji, ocipikipiki ocinyi ca tua ca nuila.

⁷ Nda kupukila posi, kuenje nda yeva ondaka ya popia lame, yiti, A Saulu, a Saulu, o ñangisila nye?

⁸ Nda kumbulula siti, A Ñala, ove elie? Kuenje eye wa popia lame hati, Ame Yesu u Nasara, una o kasi loku kangisa.

⁹ Ava va kala lame va mola ocinyi puãi ka va yevele ondaka yu wa popia lame.

¹⁰ Nda pula siti, A Ñala, ndinga nye? Kuenje Ñala wa ñumbulula hati, Votoka. Iñila vo Damasko, kuenje omo va ku sapuila ovina viosi via ku tukuilua oku vi linga.

¹¹ Eci nda linga omeke mekonda liokutua kuocinyi caco, oco ava va kala lame va ñuata vokuokuo, kuenje va songuila toke tua pitila vo Damasko.

¹² Ulume umue Ananiya, ukuambili yokovihandeleko, haeye va Yudea vosi va kalako va wimbila uvangi wa posoka, weya kokuange.

¹³ Wa talama ponele yange kuenje wa popia lame hati, A manjange, a Saulu, letuluka. Kuenje ola yaco muẽle haiyo nda letuluka, kuenje ndo mola.

¹⁴ Yu wa linga hati, Suku yolosekulu vietu wa ku nola okuti o kũlĩha ocipango caye loku mola Ukuesunga, kuenda oku yeva ondaka komela waye.

¹⁵ Momo ove o linga ombangi yaye. Ovina wa mola levi wa yeva o vi imbila uvangi komanu vosi.

¹⁶ Kaliye, o talukila nye? Votoka, papatisiwa. Vilikiya onduko yaye okuti o yelisua kakandu ove.

¹⁷ Oco, eci nda tiuka ko Yerusalãi nda kala loku likutilila vonembele, kuenje nda mola ocisalu.

¹⁸ Yu nda mola Ñala wa popia lame hati, Yayulako. Tunda lombili yo Yerusalãi momo ka va tava kuvangi o njimbila.

¹⁹ Nda linga siti, A Ñala, ovo muẽle va kũliha okuti, volosunangonga viosi, ava va ku tava nda va yikila votuyike loku va tipula.

²⁰ Eci osonde yombangi yove Stefano ya peselua haipo nda kala. Nda tava, kuenje nda lava uwalo wava vo wipa.

²¹ Ñala puai wa popia lame, hati, Kuende, momo hu tuma kupãla ku vakualofeka.

²² Vo yevelela toke eci a tukula ondaka ya vakualofeka. Oco va vilikiya vati, Omunu ndu opiwe kilu lieve. Ka sesamelele oku kala lomuenyo.

²³ Eci va kala loku vilikiya kuenda oku imbaimba uwalo wavo vilu, loku tumula oneketela,

²⁴ oco Kesongo wa tuma hati, Vo nene vombonge. Yu wa linga hati, Vo tipule loluhava oco ndimbuke eci va kasi loku u yuelela ndeci.

²⁵ Puãi eci vo kuta lolusipa oco Paulu wa pula usongui wa kalako hati, Ci tava hẽ oku tipula u Roma osimbu ka pisilue?

²⁶ Eci usongui a ci yeva wa enda ku Kesongo, wo ci sapuila hati, Wa soka oku linga nye? Omunu o u Roma,

²⁷ Oco Kesongo weya wa popia laye hati, Sapuileko, ocili, ove vu Roma? Eye hati, Nãho, oco.

²⁸ Oco Kesongo wa kumbulula hati, Ame nda feta olombongo via lua oku landa unungi waco. Oco Paulu wa popia hati, Ame puãi nda citiwa lawo.

²⁹ Oco, ava va sokele oku u nyika vo sia lonjanga. Kesongo, layevo, wa kuata usumba omo wa limbuka okuti Paulu una a kuta u Roma.

³⁰ Puãi hẽla yaco Kesongo wa kutulula Paulu, omo wa yongola oku kũlĩha cocili eci va Yudea vo pindikila. Wa pañinya ovitunda vinene lonjango yosi oku ongoloka. Noke wa nena Paulu kuenje wo talamisa kovaso avo.