OVILINGA 21 - Embimbiliya - Bíblia Sagrada em Umbundu

¹ Oco, eci tua litepa lavo oku enda lonaviyu, tua suñamela ko Ko. Eteke likuavo tueya ko Roda. Oku tunda oko tueya ko Patara.

² Oko tua sanga onaviyu yenda ko Foinike. Tua wilamo, kuenje tua enda layo.

³ Eci tua mola Kupro yi kasi kepĩli, oco tua pitahãla kuenje tua enda ko Suria. Tua talama ko Turo, momo oko onaviyu ya soka oku longoluila ovikuata.

⁴ Eci tua sanga oloñame tua tumalako oloneke epanduvali. Via sapuila Paulu le Espiritu viti, Ku ka lamanele ko Yerusalãi.

⁵ Eci oloneke vietu vioku kala oko via pita oco tua tunda, tua enda ungende wetu. Alume lakãi vavo lomãla, vosi yavo va tu sindikila toke kofeka. Eci tua pitila kopalaya tua kekama kolongolo, tua likutilila, kuenje noke tua liusika.

⁶ Etu tua wila vonaviyu, ovo va tiukila koliavo.

⁷ Eci tua malusula ungende wetu woku tunda ko Turo tua pitila ko Tolemaiya. Tua lipasula la vamanji kuenje tua tumala lavo eteke liongongo.

⁸ Eteke likuavo tua tundako kuenje tueya ko Kaisarea. Tueya konjo yukundi Filipu kuenje oko tua sikila. Filipu u eye Filipu una wa kala pokati komanu vana epanduvali va noliwile.

⁹ Eye wa kala lomãla vakãi vakuãla ka va kuelele, haivo va imbaimba owanji wuprofeto.

¹⁰ Tua tumalako oloneke vimue. Osimbu tua kalako, uprofeto umue, onduko yaye Agabo, wa tunda ko Yudea,

¹¹ weya kokuetu, wa nyañula uvia wa Paulu, kuenje wa likuta kovolu lo kovoko, hati, Ca popia Espiritu Sandu ceci, hati, Va Yudea vo ko Yerusalãi haico va ka kuta ukuovia ulo loku u pakuila ku vakualofeka.

¹² Eci tua yeva olondaka viaco, etu la vakuafeka yaco tua peya Paulu tuti, Ku ka lamanele ko Yerusalãi.

¹³ Oco Paulu wa kumbulula hati, Eci hẽ, vu ci lingila nye? Vu yongola nga oku konyuisa utima wange lokulila kuene? Momo ame haku kutiwako lika nãilili, puãi loku filavo onduko ya Ñala Yesu vo Yerusalãi.

¹⁴ Omo ka ca tavele oku u tiula oco tua liwekako, tuti, Ocipango ca Ñala ci lingiwe.

¹⁵ Kovaso yoloneke viaco tua angiliya ovikuata vietu kuenje tua lamanela ko Yerusalãi.

¹⁶ Oloñame vimue vio ko Kaisarea via enda letu, kuenje via tu tuala konjo ya Manasone u Kupro, haeye oñame ya tava osimbu. Eye wa tu yekisa vonjo yaye.

¹⁷ Eci tueya ko Yerusalãi vamanji va tu tambula lesanju.

¹⁸ Eteke likuavo Paulu wa enda letu vonjo ya Tiago kuenje akulu vosi omo va kala.

¹⁹ Eci a va lama wa va lomboluila cimosi cimosi covina viosi Suku a linga pokati ka vakualofeka lupange waye.

²⁰ Oco, eci va ci yeva, va tumbangiya Suku, kuenje va popia la Paulu, vati, Okuetu, o lete okuti olohuluwa via lua via va Yudea via tava. Kuenje, vosi yavo lopo vakuambili yovihandeleko.

²¹ Cilo puãi va ku yevela okuti va Yudea vosi va tunga pokati ka vakualofeka ove o va longaisa oku tinduka ku Mose, huti, Ko ka sevisi omãla vene evamba. Ko ka lingi vali ovihõlo viaye.

²² Oco hẽ, tu linga nye? Ka va pumbi oku yeva okuti ove weya.

²³ Linga eci tu ku sapuila. Tu kasi lalume vakuãla va lisinga ocisingo.

²⁴ Kuende lavo, liyelisa kumue lavo. Feta epese liavo okuti va lipemuila asenye. Nda o ci linga, vosi va limbuka okuti ovina va ku yevela haviociliko, puãi o pokoyola kovihandeleko.

²⁵ Puãi, kondaka ya vakualofeka va tava, tua va sonehela, yu tua va handeleka, tuti, Likandangiyi kovina via lumbiwa koviteka, kuenda kosonde, levi via lekiwa ekõle, kuenda koku pekelisa.

²⁶ Oco Paulu wa enda lalume vaco. Eteke likuavo wa liyelisa kumue lavo, kuenje wa iñila vonembele ha sapula eteke va laika oku mala oku liyelisa, okuti noke ci tava oku lumba ocilumba ci va lumbiwila omunu omunu.

²⁷ Eci pa kamba naito oku tẽlisa oloneke viaco epanduvali, oco va Yudea vamue vo ka Asia, vana vo muile ale vonembele, va tutuminya owiñi wosi kuenje va kuata Paulu.

²⁸ Va vilikiya vati, Alume va Isareli, tu kuatisiko. Omunu u, eye una o kasi loku longaisa omanu vosi kolofeka viosi oku sepula epata lietu lovihandeleko kuenda ocitumãlo cilo. Ca piãla enene, wa iñisa va Helasi vonembele, okuti wa vĩhisa ocitumãlo cilo ci kola.

²⁹ Va ci popia momo konyima yoloneke va muile Trofimo u Efeso wa kala loku pita vimbo kumue la Paulu, oco va soka vati, Paulu wa iñila laye vonembele.

³⁰ Oco imbo liosi lia yuva, lomanu va lipungaika. Va kuata Paulu, vo nanañinyila kosamua yonembele, kuenje haico apito a yiliwa.

³¹ Osimbu va sanda oku wipa ondaka ya yevala ku kesongo liovita, yiti, Yerusalãi yosi ya yuva.

³² Tuli a ci yeva haico a pañinya asualali lasongui vavo kuenje wa lupukila kokuavo. Eci va mola kesongo lasualali, va liwekako oku tipula Paulu.

³³ Oco kesongo wa amako yu wo kuata kuenje wa handeleka okuti vo kuta lalienge avali. Noke wa pula onduko yaye kuenda eci a linga.

³⁴ Vamue vowiñi va vilikiya ondaka yiñi, vakuavo ondaka yiñi. Eci kesongo ka tẽlele oku limbuka ondaka yocili omo va yuela ño, oco wa handeleka hati, U tuali vombonge.

³⁵ Omo onjaya yomanu ya lua enene, oco Paulu oku endela vali posi ka ca tavele. Oco, eci a pitila kosikata, asualali vo wambata,

³⁶ momo owiñi womanu vo kuãi va vilikiya vati, Va wipaye.

³⁷ Eci va soka oku iñila laye vombonge Paulu wa pula kesongo hati, Ci tava okuti mopia love cimue? Kesongo wa kumbulula hati, O popia o Helasi?

³⁸ Haveko he u Egito una wa wenguile usuanji koloneke via pita, kuenje wa songuila vekalasoko olohũlũkãi vikuãla viovingumba?

³⁹ Paulu wa kumbulula hati, Ame ndu Yudea, haime ndu Tarso ko Kilikia, ndinungi yimbo haliañoko. Nda pinga kokuove siti. Va nave okuti mopia lomanu.

⁴⁰ Kotembo yaco Paulu wa talama kosikata. Eci kesongo a tava oco Paulu wa payula omanu leka liaye. Eci omanu vosi voha oco wa popia lavo velimi lio Heveru, hati,