OVILINGA 20 - Embimbiliya - Bíblia Sagrada em Umbundu

¹ Eci onjuela ya imuha Paulu wa pañinya oloñame. Eci a va lungula, wa vosika kuenje wa tundako, wa enda ko Makedonia.

² Eci a pita volofeka viaco, loku kolisa ca lua oloñame, oco weya ko Helasi.

³ Oko a kala olosãi vitatu. Noke wa simile oku enda lonaviyu ko Suria. Puãi va Yudea vo tumbika ongombo, oco, wa teta onimbu hati, Oku tiukila tu pita vali vo Makedonia.

⁴ Ava va enda laye vava, Sopatero omõla a Puro, eye u Berea, kuenda Aristarko la Sekundo, ovo va Tesalonike, kuenda Galio u Derbe, la Timoteo kuenda Tukiko la Trofimo, ovo va Asia.

⁵ Ovo va pita kovaso kuenje va tu talamela ko Torasi.

⁶ Etu puãi tua talamela ofesta yombolo ka yi kuete etumbisa. Kovaso yaco tua tunda ko Filipoi oku enda lonaviyu. Tua enda oloneke vitãlo kuenje tua va sanga ko Torasi, oko tua tumala oloneke epanduvali.

⁷ Keteke liatete kosimanu tua liongoluila oku timbula ombolo. Paulu wa va kupuila ohundo omo a soka oku tundako hẽla, kuenje wa amisako ohundo yaye toke vokati kuteke.

⁸ Vohondo yosapalalo, omu tua liongoluila, mua kala olondiyelo via lua.

⁹ Ponjinela pa tumala ukuenje umue, onduko yaye Eutuko. Eye wa lemiwa lotulo tua lua kuenje, eci Paulu amisako ca lua ohundo yaye, eye, omo otulo tuo kola, wa kupuka kosapalalo yatatu. Vo yelulapo tupu wa fa.

¹⁰ Oco Paulu wa lokako, wo yukamela kuenje wo kuata, hati, Ko ka yokoki, momo lopo mu kasi omuenyo.

¹¹ Kovaso yaco Paulu wa londa vali, wa timbula ombolo kuenje wa lia. Noke wa vangula lavo, vangule-e, toke kua ca, kuenje wa tundako.

¹² Ukuenje, va enda laye lomuenyo, kuenje esanju va kala lalio ka li popiwa, lia-a lua.

¹³ Etu, tua livanga kovaso lonaviyu kuenje tueya ka Aso, momo oko tua liusikile oku tokekela la Paulu. Eye muẽle, Paulu, wa endela posi.

¹⁴ Eci a tu sanga ka Aso tuo tambula vonaviyu kuenje tueya ko Mitulene.

¹⁵ Oku tunda oko, eteke likuavo tua vambala ko Kiyo. Eteke likuavo tueya ko Samo, likuavo ko Miletu.

¹⁶ Momo Paulu wa panga oku pita ombamba ke Efeso, okuti ka talukila va Asia, momo wa kala lonjanga yoku kala vo Yerusalãi keteke lia Pentekoste, nda ci tẽliwa.

¹⁷ Ko Miletu wa tuma ke Efeso oku pañinya akulu vekongelo.

¹⁸ Eci veya kokuaye wa popia lavo hati, Ene muẽle wa kũlĩhi ndeci nda kala lene tunde eteke liatete nda liatela kongongo ya Asia.

¹⁹ Wa moli ndeci nda vumba Ñala lukukui vutima kuenda lasuelela. Wa kũlĩhi ovisiliñinya nda sanga kolongombo via va Yudea.

²⁰ Wa kũlĩhivo ndeci sia yuvuile oku lombolola kokuene olondaka viosi viu kuatisi, loku vu longasaila vovila lo volonjo.

²¹ Va Yudea la va Helasi nda va kundila oku va vetiya okuti va likekembela akandu avo kovaso a Suku loku kolela Ñala yetu Yesu Kristu.

²² Oco cilo ndimandekua ye Espiritu kuenje ngenda ko Yerusalãi. Eci ha sangako si ci.

²³ Cimosi lika nda kũlĩha ceci okuti, kovaimbo osi mita, Espiritu Sandu o njimbaimba onumbi hati, Ovikolo lohali vi ku tãilili.

²⁴ Puãi si tendi omuenyo wange ndocina cimue ci silivila pamue ci mepa. Cimosi lika ndi livela ceci, Oku tẽlisa ocikundi cange loku mala upange nda tambula ku Ñala Yesu, loku imbila uvangi ondaka yiwa yocali ca Suku.

²⁵ Kaliye, ndi ci okuti ene vosi nda ñuala ñuala pokati kene loku longaisa ondaka yusoma wa Suku, ka vu moli vali ocipala cange.

²⁶ Oco, etaili ndu sapuili longusu, siti, Nda yela osonde yomanu vosi.

²⁷ Nda pua eko momo sia yuvuile oku vu sapuila ocipango cosi ca Suku.

²⁸ Lilavi ene muẽle. Lavivo ocunda cosi Espiritu Sandu wo ci kapeli angombo, okuti vu lisa lisa ekongelo lia Ñala lina a landa losonde yaye.

²⁹ Ndi ci okuti, eci nunda, olombinji via tema viñila pokati kene, kuenje ka vi kuatela ohenda ocunda.

³⁰ Kuenda vali, pokati kene muẽle, pa katuka alume va vangula ovina via penga ha va koki oloñame okuti vi va kuama.

³¹ Oco lavululi, loku ivaluka okuti anyamo atatu, utanya luteke, sia liwekele oku u lunguli lasuelẽla, omunu omunu.

³² Cilo ndu kundiki ku Suku kuenda kondaka yocali caye, haico ci tẽla oku vu pamisa loku wihi ocipiñalo kumue la vosi va kolisiwa.

³³ Sia la livela oku tambula komunu opalata, pamue ulu, pamue uwalo.

³⁴ Ene muẽle vu ci cokuti ovaka ange alo o-o a muisa eteku liange leli liava va kala lame.

³⁵ Kovina viosi ndo lekisi okuti koku talavaya oko ku tunda coku kuatisa laco olosuke, ndocikele cetu eci tu ivaluka olondaka via Ñala Yesu vina a popia hati, Esumũlũho li tunda koku eca olio lia lua, eli li tunda koku tambula li sule.

³⁶ Oco, eci a popia ndoco, wa kekama kolongolo, kuenje wa likutilila kumue la vosi.

³⁷ Vosi va lila ca lua, va kuatelela Paulu kosingo kuenje vo sipula.

³⁸ Ca piãla enene, va sumuila ondaka a popia lavo, hati, Ka vu moli vali ocipala cange. Noke vo sindikila konaviyu.