OVILINGA 2 - Embimbiliya - Bíblia Sagrada em Umbundu

¹ Eci eteke lia Pendekoste lieya va kala vosi kumuamue.

² Kuenje, ocipikipiki, kilu kua tunda ocileñi ndokuõla kuocipepe ca tema, yu ca yukisa onjo yosi omu va tumala.

³ Kua va tukulukila alimi a setahala ondalu, kuenje a lisandola loku va vata omunu omunu.

⁴ Oco va yukisua le Espiritu Sandu, kuenje va fetika oku vangula alimi aiñi aiñi, ndeci Espiritu Sandu a va iha oku popia.

⁵ Vo Yerusalãi mua kala va Yudea, vakuakusumbila Suku, va tunda kolofeka viosi viovemi lilu.

⁶ Oco, eci ocileñi caco ca yevala, owiñi wa liongolola, kuenje va lisalukako, momo va va yeva va popia alimi avo omunu omunu.

⁷ Oco va lisalukako, kuenje oku komoha, va linga vati, Avoyo, ava va vangula ndeti, vosi hẽ, ha va Galileako?

⁸ Kuenje etu tu yeva ndati, omunu omunu elimi liaye a citiwa lalio?

⁹ Etu tu va Partia, la va Media, la ve Elame, lolonungi vo Mesopotamia, lo vo Yudea, lo vo Kapadokia, lo vo Pondu lo ka Asia,

¹⁰ lo vo Frugia lo vo Pamfulia lo ve Egito lo volofeka via Libia evi vi lisungue la Kurene, akombe vo ko Roma, va Yudea lolomongoloke viaco,

¹¹ va Kurete la va Arabia, tu yeva ndomo va vangula ovilinga vinene via Suku valimi etu.

¹² Kuenje vosi va lisalukako, loku komoha, kuenje va livangula pokati vati, Eci hẽ, ca lomboloka ndati?

¹³ Puãi vakuavo va sevula vati, Va kolua ovinyu vi sosa.

¹⁴ Puãi Petulu wa talama vilu kumue lekui liaco lamosi, kuenje, oku popia lolukandi, wa va kundila ondaka, hati, Alume va Yudea, lene vosi wa tungi vo Yerusalãi, yeveleli olondaka viange. Cu lomboloki okuti,

¹⁵ alume ava ka va koluele ndeci wa soki, momo cilo handi ocitalakumbi.

¹⁶ Puãi eci, oco cina ca popia uprofeto Yoeli, hati,

¹⁷ Suku hati, Koloneke vi sulako, ndi sukumuila Espiritu liange komanu vosi. Omãla vene valume lomãla vene vakãi va imba owanji. Amalehe vene va mola ovinjoinjoi, lolosekulu viene vi lota olonjoi.

¹⁸ Koloneke viaco, ndi sukumuila Espiritu liange, kakuenje lo kafeko vakuopange, kuenje va linga ovaprofeto.

¹⁹ Ndekisa ovikomo kilu, kuenda ovilimbu posi, okuti osonde londalu kuenda ombundu yowisi.

²⁰ Ekumbi li pongoloka owelema, losãi yi pongoloka osonde, osimbu eteke lia Ñala ka lieyile, eteke liaye linene lieletuluko.

²¹ Kuenje wosi o vilikiya onduko ya Ñala o popeliwa.

²² Ene alume va Isareli, yeveleli olondaka evi: Yesu u Nasara, ulume una Suku a lombolola kokuene kuenje wo wimbila uvangi mekonda liovonene lovikomo kuenda ovilimbu Suku a linga laye pokati kene, ndeci wa ci kũlĩhi ene muẽle,

²³ Yesu yaco, haeye wa pakuiwa ndocipango ca Suku co tukuiwila ale, kuenje Suku wa ci kũlĩha, ene muẽle wo valelisi kekulusu, kuenje wo wipaisi lovaka omanu ka va kasi lovihandeleko.

²⁴ Puãi Suku wo pindula, wa kutulula ovikolo viokufa, momo ka ca tẽliwile eye oku pandekiwa lakuo.

²⁵ Momo Daviti wo tukula hati, Oloneke viosi ndukuakumola Ñala kovaso ange. Omo eye o kasi kondio yange, si sengiwa.

²⁶ Oco utima wange wa sanjuka, lelimi liange lia yolela. Etimba liange laliovo li puyukila velavoko.

²⁷ Momo ku si omuenyo wange vonjembo. Ku tava okuti U Wove o kola o futa.

²⁸ Wa njimba onumbi yolonjila viomuenyo. O njukisa esanju omo o kala kala lame.

²⁹ Akuetu, nẽla oku tukula kukululu yetu Daviti. Eye wa fa kuenje wa kendiwa, leyambo liaye tu kasi lalio toke etaili lilo.

³⁰ Omo a kaile uprofeto, kuenje wa kũlĩha okuti Suku wa likuminya laye loku lisila okuti umue kombuto yaye o tumala kocalo caye,

³¹ oco wa imba owanji wepinduko lia Kristu eci a popia hati, Ka siwa vonjembo, ndaño etimba liaye ka li futi.

³² Yesu u-u, Suku a pindula, etu vosi tulombangi viaco.

³³ Omo a yeluiwa londio ya Suku, lomo a tambula ku Isia ohuminyo ye Espiritu Sandu, oco wa tu sukumuila eci vu lete leci vu yevite.

³⁴ Momo eye muẽle Daviti ka londele kilu, puãi eye wa linga hati, Ñala wa popia la Ñala yange hati, Tumala kondio yange,

³⁵ toke ovanyali vove ndi va lingisa ociliatelo cove.

³⁶ Oco, epata liosi lia Isareli li limbuke okuti ocili, u Yesu, una ene wa valeli kekulusu, Suku wo lingisa Ñala kuenda Kristu.

³⁷ Oco, eci va ci yeva va tomiwa vovitima, kuenje va popia la Petulu lovapostolo vakuavo, vati, Akuetu, tu linga nye?

³⁸ Kuenje Petulu wa popia lavo hati, Ene vosi omunu omunu, likekembeli akandu ene, papatisilui ongecelo yakandu vonduko ya Yesu Kristu, oco vu mola ocali ce Espiritu Sandu.

³⁹ Momo ohuminyo yaco ya likuminyiwa kokuene lo komãla vene kuenda ku vosi va kasi kupãla, okuti vosi ava Ñala Suku yetu a kovonga.

⁴⁰ Yu wa imba uvangi lolondaka via lua vikuavo, kuenje wa va peya, hati, Lipopeli kocitumbulukila eci cehungu.

⁴¹ Oco, ava va tava kondaka yaye va papatisiwa, kuenje eteke liaco kua vandeka ca soka ndolohũlũkãi vitatu viomanu.

⁴² Kuenje va pandakaisa oku yeva ovilongua viovapostolo, Kuenda kongongela yavo, loku timbula ombolo, kuenda koku likutilila.

⁴³ Usumba wa kuata omanu vosi. Ovikomo via lua lovilimbu via lingiwa lovapostolo.

⁴⁴ Vosi va tava va kala pamuamue, kuenje va litepaila ovina viosi.

⁴⁵ Va landaisa ovikuata viavo lovina vikuavo va fuka, kuenje va vi liamuila pokati kavo vosi ndeci umue a kamba.

⁴⁶ Eteke keteke va endaila pamosi vonembele. Volonjo viavo va timbowaila Pamosi ombolo. Va lia lia okulia kuavo lesanju lesunguluko liutima.

⁴⁷ Va endaenda loku sivaya Suku kuenda oku kala ciwa lomanu vosi. Kuenje eteke keteke Ñala wa vokiya kongongela yaco ava va popeliwa.