OVILINGA 19 - Embimbiliya - Bíblia Sagrada em Umbundu

¹ Osimbu Apolosi a kala ko Korindo, Paulu wa ñuala kolofeka viokonano kuenje weya ke Efeso. Wa sangako oloñame vimue,

² yu wa va pula hati, Ene hẽ, eci wa tavi wa tambuli Espiritu Sandu ale? Vo kumbulula, vati, Ndati. Ka tua la yeva okuti kuli Espiritu Sandu.

³ Oco wa va pula vali, hati, Nda oco, wa papatisiwi lepapatiso lie? Ovo vati, Tua papatisiwa lepapatiso lia Yoano.

⁴ Oco Paulu hati, Yoano wa papatisa lepapatiso li kuama oku likekembela akandu, osimbu a popia lomanu hati, Koleli u o ñuama ndokuti Yesu.

⁵ Eci va ci yeva va papatisiwila vonduko ya Ñala Yesu.

⁶ Oco, eci Paulu a va kapa ovaka, Espiritu Sandu weya kokuavo, kuenje va popia alimi aiñi aiñi loku imba owanji wuprofeto.

⁷ Va kala ekui lialume kalume vavali.

⁸ Oco Paulu wa iñila vosunangonga kuenje wa kunda kunda lutõi olosãi vitatu. Wa likumbulula lomanu kuenje wa toñomãla loku va lomboluila usoma wa Suku.

⁹ Puãi, eci vamue va siva yu ka va kolelele, kuenje va pembuila onjila yaco kovaso omanu, oco wa tunda kokuavo, wambata oloñame, kuenje eteke keteke wa longisa vosikola ya Turano.

¹⁰ Eci ca lingiwa anyamo avali, kuenje omanu vosi va tunga ka Asia, va Yudea la va Helasi, va yeva ondaka ya Ñala.

¹¹ Suku wa lingisa ovilimbu vienene lovaka a Paulu.

¹² Oco, alesu latuaya oketimba liaye a tualiwa komanu va vela, kuenje ovovei avo a tunda, laspiritu ãvi a va eca.

¹³ Ovimbanda vimue via va Yudea, haivio via ñuala ñuala oku sakula, via fetika oku tukuila ava va kuetiwe laspiritu ãvi onduko ya Yesu, vati, Hu lisila la Yesu, u Paulu a kasi loku longisa.

¹⁴ Kua kala omãla epanduvali va Skewa, u Yudea, haeye ocitunda cinene, kuenje ovo eteke limue va kala loku ci linga.

¹⁵ Oco Espiritu lĩvi lia va kumbulula liti, Yesu ndu wi, Paulu ndu wi, puãi ene hẽ, ene velie?

¹⁶ Oco omunu o kuetiwe lespiritu lĩvi wa volumũhĩla kuenje, oku lembuisa vavali pokati kavo, wa va tota olombole kuenje wa va yula okuti va tila vonjo yavo epõlõla.

¹⁷ Cosi eci ca yevala ku va Yudea vosi lo ku va Helasi va tunga ke Efeso. Vosi yavo va kuata usumba, kuenje onduko ya Ñala Yesu ya kemanyaiwa.

¹⁸ Pokati kava va linga ale oloñame va lua veya oku litavela loku sapula ovilinga viavo viumbanda.

¹⁹ Ovimbanda vimue via nena alivulu avio, kuenje va a yokela kovaso a vosi. Eci va tenda ondando yaco ya soka akui atãlo kolohũlũwa violopalata.

²⁰ Oco ondaka ya Ñala yamamako oku sandangala loku tavisa omanu.

²¹ Kovaso yovina evi Espiritu lia katuila Paulu oku pita vo Makedonia lo va Akaya okuti enda ko Yerusalãi. Wa likapelakovo hati, Ko Yerusalãi ñalako otuneke tumue, kovaso yaco ngenda ha molavo ko Roma.

²² Eci a tuma oloñuatisi viaye vivali, Timoteo la Erasto, ko Makedonia, eye muẽle wa siala vali okasimbu kamue ka Asia.

²³ Oloneke viaco koku vangula onjila ya Ñala kueyilila onjaya ya lua.

²⁴ Momo ocivinda cimue copalata, onduko yaco Demetrio, ca telisa oviñumañuma viopalata oku luvikiya onembele ya Diana, kuenje ca nenela olomesele viaco onganyu ya lua.

²⁵ Oco, eye Demetrio wongolola olomesele viaco kumue la vakuavipinduko vikuavo okuti upange wavo haiwo. Wa popia lavo hati, Ene akuetu, wa ci kũlĩhi okuti kocipinduko eci oko ku tunda onganyu yetu.

²⁶ Vu lete kuenda wa yevi okuti hake Efesoko lika, puãi pa kamba naito kuosi ka Asia, okuti Paulu u, wa konyuisa ovitima viomanu va lua lokukunda kuaye, kuenda vali o longisa hati, Olosuku via tungiwa lovaka omanu halosukuko.

²⁷ Oco kuli ohele okuti hacipinduko cetuko lika ci sepuiwa, puãi lonembele ya suku yinene Diana layovo yi tombiwa. Kulivo ohele yokuti eye muẽle Diana, ndaño va Asia vosi kuenda vosi vokoluali vo fendela, haimo o pumba ulamba waye.

²⁸ Eci va ci yeva va lenda lonyeño, yu va vilikiya vati, Diana ya va Efeso eye fu!

²⁹ Oco imbo lie yuka onjuela yaco, kuenje omanu vosi va lupukila vocila. Va kuata Gaio la Aristarko, va Makedonia vana va endela kumue la Paulu, kuenje va va nanañinyila vocila.

³⁰ Paulu wa yongola oku iñila vowiñi puãi oloñame ka via tavele.

³¹ Olombiali vimue vio ka Asia, haivio akamba vaye, via tuma kokuaye kuenje vio lungula viti, Ku ka lukute oku iñila vocila.

³² Vamue va vilikiya ondaka yiñi, vakuavo ondaka yiñi, momo ohongele yosi ya litama. Va lua ka va kũlĩhile eci va liongoluila.

³³ Pokati kowiñi va nolapo umue, onduko yaye Alexandro, kuenje va Yudea vo pitisa kovaso. Alexandro wa tulika eka kuenje wa soka oku va fundilako kowiñi.

³⁴ Puãi eci vo limbuka okuti layevo u Yudea oco vosi va vilikiya ondaka yimuamue vati, Diana ya va Efeso eye fu! Va ci linga olowola vivali.

³⁵ Eci kalei kimbo a tulumula onjuela yowiñi oco wa linga hati, A va Efeso, pokati komanu hẽ, helie ka kũlĩhile okuti imbo lia va Efeso li lava lava onembele ya suku yinene, Diana, lociñumañuma ca loka kilu?

³⁶ Omo ka ci tava oku patãla ovina evi oco co sungulukili oku liweka, okuti ka vu lingi emande.

³⁷ Momo omanu ava wa neni palo havoko olomembuli violonembele, pamue vakuakutondala suku yetu.

³⁸ Oco, nda Demetrio lolomesele vi kasi laye va kuetele umue ondaka, akanga ya, lolonganji kuli. Oco va lisombise.

³⁹ Puãi nda vu yongola oku pindika cimue ca velapo, ci sokiyiwile vonjango yi kasilili ale.

⁴⁰ Momo kuli ohele yokuti tu pindikilua onjuela yetaili osimbu ka kuli ondaka yi lombolola onjuela yaco.

⁴¹ Oco, eci a popia olondaka evi, wa yalula ohongele.