OVILINGA 18 - Embimbiliya - Bíblia Sagrada em Umbundu

¹ Oco noke Paulu wa tunda ka Atenai, weya ko Korindo.

² Oko a sanga u Yudea umue, onduko yaye Akuila, u Pondo, ndopo a tunda ki Italia lukãi waye Prisila, momo Kaludio wa handeleka hati, Va Yudea vosi va tunde vo Roma. Paulu wa enda kokuavo,

³ kuenje, omo ocipinduko caye haico cavo, oco wa tumala lavo kuenje va lingila pamosi upange wavo, Ocipinduko cavo oku tonga olombalaka.

⁴ Asambata osi wa longaisaila vosunangonga, kuenje, ndaño wa sanga olonamalala vialua, haimo wa tavisa va Yudea la va Helasi.

⁵ Siluano la Timoteo va tunda ko Makedonia. Eci va pitila ko Korindo va sanga Paulu wa sakalala loku kunda. Wa kala loku sapuila va Yudea hati, Yesu eye Mesiya.

⁶ Oco, eci va tamalala laye loku u wimbula oco eye wa tutumula uwalo waye kuenje wa popia hati, Osonde yene yi kale kovitue viene muẽle! Ame nda pua eko. Tunde opo ngenda ku vakualofeka.

⁷ Oco wa tundamo kuenje wa enda konjo yumue, onduko yaye Tito Justo, eye ukuakufendela Suku. Onjo yaye yi lisungue losunangonga.

⁸ Krispo, eye ukulu wosunangonga, wa tava ku Ñala la vakuanjo yaye vosi. Va Korindo va lua va yeva ondaka va tava kuenje va papatisiwa.

⁹ Kuenje Ñala wa popia la Paulu vonjoi hati, Ku ka kuate usumba, puãi longisa, ku ka liweke.

¹⁰ Momo ame ñasi love kumue, kuenje lomue o ku yakisa ha ku lingi cĩvi, momo ñuete omanu va lua vimbo lilo.

¹¹ Oco Paulu wa kala vo Korindo unyamo kolosãi epandu, kuenje wa longisa ondaka ya Suku pokati kavo.

¹² Puãi, eci Galio a kala epalanga ka Akaya, va Yudea va katukila Paulu lutima umuamue kuenje vo tuala kekanga,

¹³ vati, Ndeci omunu u a kasi loku vetiya omanu oku fendela Suku ci sama ovihandeleko.

¹⁴ Puãi, eci Paulu a soka oku kumbulula, oco Galio wa popia la va Yudea hati, A va Yudea, nda ca kaile ongole yimue pamue elinga limue lĩvi, nda ca sunguluka ame oku vu yevelela.

¹⁵ Puãi, omo ondaka wa neni yi tiama kolondaka lolonduko kuenda ovihandeleko viene, oco ci sokiyi ene muẽle. Ame oku linga onganji yovina evi si kuatako.

¹⁶ Oco wa va lupuisa kekanga.

¹⁷ Vosi yavo va kuata Sositene, eye ukulu wosunangonga, kuenje vo tipuila posamua yonjo yekanga. Eci puãi, Galio ka co tukuile utima.

¹⁸ Kovaso yovina evi Paulu wa tumalako vali oloneke via lua. Noke wa liusika la vamanji vaco kuenje wa endela vonaviyu toke ko Suria. Prisila la Akuila va enda laye! Eci a kala ko Kengerai, oco wa lipemula esenye, momo wa lisinga ocisingo caco.

¹⁹ Noke veya ke Efeso kuenje oko a va sia. Eye Paulu puãi wa iñila vosunangonga kuenje wa likumbulula la va Yudea.

²⁰ Eci va seteka oku u tiula okuti imbisapo naito, eye ka tavele.

²¹ Puãi, eci a liusika lavo, wa popia hati, Niuka vali kokuene nda Suku wa panga. Oco wa tunda ke Efeso lonaviyu.

²² Eci a pitila ko Kaisarea wa lamanela ko Yerusalãi kuenje wa lama ekongelo. Kovaso yaco wa lokila ka Antiokea.

²³ Eci a kalako okasimbu, wa tunda, kuenje wa pita kovaimbo osi o ko Galatia lo ko Frugia oku kolisa oloñame viosi.

²⁴ Oco u Yudea umue, onduko yaye Apolosi, kimbo liavo ka Alexandria, weya ke Efeso. Eye wa kala onoño yoku kunda, kuenda wa loñoloha lovisonehua.

²⁵ Eye wa longisiwa onjila ya Ñala, haeye ukuambili yovutima, oco wa sapula loku longisa lutate ovina via Yesu, ndaño wa kũlĩha lika epapatiso lia Yoano.

²⁶ Wa fetika oku longisa vosunangonga lutõi. Puãi, eci Prisila la Akuila vo yeva, vo pañinya kuenje vo wimba onumbi ya velapo yonjila ya Suku.

²⁷ Eci a yongola oku enda ka Akaya, vamanji vo kolisa kuenje va sonehela oloñame vio ka Akaya vati, U tambuli. Eci a pitilako wa kuatisa ca lua ava va kolela mekonda liocali ca Suku,

²⁸ momo wa tamalala la va Yudea kovaso omanu, kuenje wa lekisa lovisonehua viavo muẽle okuti Yesu eye Mesiya.