OVILINGA 17 - Embimbiliya - Bíblia Sagrada em Umbundu

¹ Eci va pita ka Amfipoli kuenda ka Apolonia veya ko Tesalonike, oko kua kala osunangonga ya va Yudea.

² Oco Paulu, ndeci a tuwa, wa endaendamo, kuenje asambata atatu wa tamalala lavo oku va situluila ovisonehua.

³ Wa lombolola, kuenda wa lekisa okuti Mesiya, co sokiyilua oku tala ohali loku pinduka ku vakuavilangu. Noke wa teta onimbu hati, Yesu u ñasi loku u vu lomboluila, eye Mesiya.

⁴ Oco, vamue pokati kavo va tava, kuenje va litokeka la Paulu kuenda Siluano. Haico ca lingavo va lua pokati ka va Helasi, ava vakuambili yefendelo, kuenda va lua pokati kakãi va kemala.

⁵ Puãi va Yudea va ci kuatela onya. Oco va konga alume vamue vakuahuku vovocitanda kuenje vongolola owiñi. Va tokotisa imbo liosi kuenje vondumũhĩla konjo ya Yasone omo va yongola oku va tundisila komanu.

⁶ Eci ka va va sangele oco va nanañinyila Yasone kuenda vamue vakuavo vakuomanji waco kolombiali vimbo. Va vilikiya vati, Vana va vonguisa oluali luosi okatikitiki veyavo kulo,

⁷ kuenje Yasone wa va yekisa. Vosi yavo va kasi loku sinila ovihandeleko via Kaisare omo va kasi loku kunda, vati, Kuli osoma yikuavo, onduko yaye Yesu.

⁸ Eci omanu lolombiali vimbo va yeva ondaka yaco va tokotelua.

⁹ Eci va tambula onjeke ku Yasone la vakuavo va va eca.

¹⁰ Eteke liaco hailio vamanji va tuma Paulu la Siluano ko Berea kuteke. Eci veyako va iñila vosunangonga ya va Yudea.

¹¹ Va Yudea vaco va sunguluka ca lua, okuti va Yudea va sangele ko Tesalonike ci sule, momo va yeva ondaka lombili kuenje, oloneke viosi, va tanga tanga ovisonehua oku kũlĩhisa nda hẽ ovina viaco viocili nda ndati.

¹² Oco, pokati kavo, va lua va tava, kumue lakãi va lua va Helasi, ava va kemala, kuenda alume havititoko.

¹³ Puãi, eci va Yudea vo ko Tesalonike va yeva okuti ondaka ya Suku yi kasi loku kundiwavo la Paulu ko Berea, oco veyavo ha va tutuminya omanu kuenda oku va tokotisa.

¹⁴ Tuli veya haico vamanji va tuma Paulu toke ocipepi lokokalunga, Siluano la Timoteo puãi va siala.

¹⁵ Ava va sindikila Paulu va enda laye toke ka Atenai. Eci Paulu a vosika hati, Siluano la Timoteo va yayuleko oku iya kokuange, oco va tunda.

¹⁶ Osimbu Paulu a va talamela ka Atenai, utima waye vokati wa sakalala oku mola okuti imbo lie yuka oviteka.

¹⁷ Oco volosunangonga eye wa likumbolola la va Yudea kuenda vakuambili yoku fendela Suku, lo vocitanda, oloneke viosi, wa likumbolola la vosi ño a sangamo.

¹⁸ Oco olonoño vimue via va Epikuru la va Stoiku via hoya laye. Vamue vati, Emamõhe eli hẽ, li yongola oku popia nye? Kuenje, omo a kunda Yesu lepinduko, oco vakuavo vati, Huti ño o kasi loku kunda olosuku violofeka viñi.

¹⁹ Oco vo kuata, va enda laye konjango yavo yi tukuiwa Areópago, kuenje vo pinga vati, Va tu linge ohenda oku tu lomboluila ovilongua evi viokaliye o kasi loku longisa.

²⁰ Momo wa tu yevisa ovina vimue viokaliye kuenje tu yongola oku kũlĩha elomboluilo liavio.

²¹ Momo va Atenai kuenda vakualofeka viñi va tungamo, lacimue vali va sakalala laco, te oku sapula pamue oku yeva cimue cokaliye.

²² Oco Paulu wa talama polusenje lua kala powulu wovimbo, kuenje wa popia hati, Alume va Atenai, kovina viosi ndo limbuki okuti wa piãli oku sumbila olosuku.

²³ Momo, eci nda ñuala ñuala, kuenje nda mola oviñumañuma vi tiama kafendelo ene, oco nda sanga utala u kuete ocisonehua eci, Ku Suku ka Kulihiwilue. Oco, u vu kasi loku fendaila ño lapungunjumba, eye ndu sapuili.

²⁴ Suku u wa lulika oluali lovina viosi vi kasimo, omo eye Ñala yilu longongo, oco ka tumayala volonembele via tungiwa lovaka,

²⁵ ndaño oku vumbaiwa lovaka omanu ndu wa suka cimue, momo eye eca eca komanu vosi omuenyo lefuimo lovina viosi.

²⁶ Oku fetika lomunu umuamue wa sovola apata osi omanu va tunga kilu lieve, kuenje wa va tukuila ovovo lolongave violofeka viavo.

²⁷ Wa ci lingila okuti va sanda Suku, lelavoko liokuti, nda vo sandiliya loku papayata, vo sanga. Haimo lumue ka kasi ocipãla letu vosi omunu omunu,

²⁸ momo, Vokuaye, omo tu muila omuenyo loku lisengasenga, haimo tu kasilili lomuenyo. Ndeci ca popia umue kolonduvikiyi viene hati, Ocili etu tumãla vaye.

²⁹ Oco, omo tumãla va Suku, ka ca tu sesamelele oku soka tuti, Suku wa lisetahala lulu, pamue lopalata, pamue lewe, cokuti cimue ca luvikiyiwa luloño womunu pamue lovisimilo viomunu.

³⁰ Suku wa simuila oloneke viapungunjumba, puãi cilo o pañinya omanu vosi koluali luosi hati, Likekembeli akandu ene,

³¹ momo wa tukula eteke lioku tetuluila oluali lesunga, kuenje wa nola ale ulume o linga onganji yaco. Poku pindula ulume waco ku vakualufa opo a lekisila komanu vosi okuti ondaka yaye yocili.

³² Eci va yeva ondaka yepinduko liava va fa, vamue va sewula, vakuavo puãi va popia vati, Ondaka eyi, tuiya, tu ku yi yevelela vali noke.

³³ Oco Paulu wa tunda kokuavo.

³⁴ Puãi alume vamue vo lamẽlela kuenje va kolela. Pokati kavo pa kala Dionusio, umue u Areópago, lukãi umue, onduko yaye Damarisi, kuenda vamue vakuavo.