OVILINGA 16 - Embimbiliya - Bíblia Sagrada em Umbundu

¹ Paulu wa pitilavo ko Derbe lo ko Lustra. Oko kua kala oñame yimue onduko yaye Timoteo. Inaye u Yudea ukuetavo, isiaye puãi u Helasi.

² Vakuetavo ko Lustra lo ki Ikoniyu vo wimbila uvangi uwa.

³ Paulu wa yongola oku enda la Timoteo, kuenje omo va Yudea vovofeka yaco vo kũlĩha okuti isiaye u Helasi oco Paulu wo sevisa evamba.

⁴ Eci va pita vovaimbo va pitika olondaka via sokiyiwa lovapostolo lakulu vo Yerusalãi, kuenje va vetiya omanu okuti va vi pokola.

⁵ Oco akongelo a kolisiwila vekolelo, kuenje ava ya tava va vokiyiwa eteke keteke.

⁶ Noke, omo va tatekiwa le Espiritu Sandu oku kundila ondaka va Asia, oco va pita volofeka via Frugia la Galatia.

⁷ Eci va pitila ocipepi lo ko Musia va seteka oku enda ko Bitunia puãi Espiritu lia Yesu ka lia tavele.

⁸ Oco, oku pitahãla ko Musia va lokila ko Torasi.

⁹ Kuteke Paulu wa mola ocinjoinjoi cokuti, ulume umue u Makedonia o tãi, wo peya hati, Yokila ko Makedonia oco o tu kuatise.

¹⁰ Eci a mola ocinjoinjoi haico tua wila vonjila oku enda ko Makedonia, tuti, Suku wa tu kovongela oku va kundila ondaka yiwa.

¹¹ Oku tunda ko Torasi lonaviyu tua suñamela ko Samotrake, hẽla yaco tua enda ko Neapoli.

¹² Oku tundako tua enda ko Filipoi, olio imbo lia velapo vofeka ya Makedonia, hailio ombonge ya va Roma. Vimbo liaco tua tumalamo oloneke vimue.

¹³ Kesambata tua tundila kombundi yimbo kuenje tua enda kekulo liolui, omo tua soka tuti, Oko va likutalaila. Tua tumala kuenje tua vangula lakãi va liongoluilako.

¹⁴ Pokati kava va tu yeva pa kala ukãi umue u Tuatero, onduko yaye Ludia. Eye ondandisi yolonanga viohusu, haeye ukuakufendela Suku. Utima waye Ñala wo situluila oku yeva olondaka via popia Paulu.

¹⁵ Eci a papatisiwa, eye la vakuanjo yaye, oco wa tu laleka hati, Nda wa soki okuti nda tava ocili ku Ñala, enjui, u sikĩli vonjo yange. Yu wa tu peya ca lua kuenje tua tava.

¹⁶ Eci tua kala loku enda kocilikutililo, ufeko umue upika, ukuandele ya nalunja, wa ñualẽhẽla letu. Eye wa nganyalaela vacime caye olombongo via lua lokusingila kuaye.

¹⁷ Eye wa tu kuama etu la Paulu, kuenje wa vilikiya hati, Omanu ava akuenje va Suku Fu, haico va kasi oku u sapuili onjila yepopelo.

¹⁸ Oco a lingainga oloneke via lua. Puãi Paulu wa ci suvuka, oco wa ñualapo, yu wa popia londele yaco hati, Hu handeleka vonduko ya Yesu Kristu, siti, Weca. Kuenje haico ca weca.

¹⁹ Puãi eci vacime caye va limbuka okuti elavoko lionganyu yavo lia fa, oco va kuata Paulu la Siluano kuenje va va nanañanyaila kocitanda kolombiali.

²⁰ Oco, eci va va tuala kolonganji, va linga vati, Omanu ava, va Yudea, kuenje va kasi loku tatamisa ca lua imbo lietu.

²¹ Va kasi loku longisa ovihõlo vimue okuti ka ci tava etu tu va Roma oku vi tava pamue oku vi linga.

²² Owiñi lawovo wa va katukila. Olonganji via kesula uwalo wa Paulu la Siluano kuenje via va tipuisa lolohava.

²³ Eci va va tota olombole via lua va va imba vokayike, kuenje va kundika kalei kokayike vati, Va lava muẽle.

²⁴ Eci a kundikiwa ocikundi caco, oco wa va imba vokayike kovokati, kuenje wa valela ovikumbi kovolu avo.

²⁵ Puãi vokati kuteke, Paulu la Siluano va kala loku likutilila loku imbila Suku ovisungo, kuenje olomandekua via va yevelela.

²⁶ Oco, ocipikipiki, kueya ocilemawe ca lua okuti ociseveto cokayike ca lisenga, kuenje haico apito osi a yuluka, lalienge omanu vosi a fuomõha.

²⁷ Eci kalei kokayike a pasuka kotulo, oku mola okuti apito okayike a kasi upulule, oco wa somola osipata yaye kuenje wa si oku liponda, momo wa soka hati, Olomandekua via tila.

²⁸ Puãi Paulu wa vilikiya lolukandi hati, Ku ka lilinge cimue. Vosi tua suapo.

²⁹ Oco, kalei wa pañinya oku u nenela ovimihi kuenje wa iñila lonjanga. Wa wila posi kolomãi via Paulu la Siluano loku luluma lusumba.

³⁰ Wa vopamo kuenje wa linga hati, A vacime cange, ndinga nye si popeliwa?

³¹ Oco va popia laye vati, Kolela Ñala Yesu kuenje o popeliwa, ove lonjo yove yosi.

³² Oco va lombolola ondaka ya Ñala kokuaye kuenda ku vosi va kala vonjo yaye.

³³ Oco, kola yaco yuteke, wa enda lavo, wa sukula olombole viavo, kuenje haico a papatisiwa kumue la vakuanjo yaye vosi.

³⁴ Noke wa va tuala vonjo yaye, kuenje wa va iha okulia. Wa yolela ca lua kumue la vakuanjo yaye vosi omo wa kolela Suku.

³⁵ Eci kua ca omele olonganji via tuma akuenje vavo, vati, Omanu vaco va va ece.

³⁶ Oco kalei kokayike wa ci sapuila Paulu hati, Olonganji via tuma, viti, Va va ece. Oco tundi ño. Kuendi lombembua.

³⁷ Paulu puãi wa popia lavo hati, Oco hacoko. Va tu tipuila kovaso omanu, etu tu va Roma haetu ka tua pisiwile, kuenje va tu kapa vokayike. Cilo nga, va yongola oku tupamo ño uyombeki? Ka tu kuatako. Veye, va tu upemo, ovo muẽle.

³⁸ Akuenje va ka sapuila olonganji ndomo Paulu a popia. Eci via yeva okuti olomandekua viaco va Roma, via yokoka.

³⁹ Oco vieya kuenje via va livondela. Noke via vopamo, kuenje via va pinga okuti va tunda vimbo.

⁴⁰ Oco va tunda vokayike, kuenje va enda vonjo ya Ludia. Eci va lipasula la vamanji loku va kolisa, oco va tunda.