OVILINGA 15 - Embimbiliya - Bíblia Sagrada em Umbundu

¹ Puãi vamue va tunda ko Yudea veya ka Antiokea yu va longisa oloñame viaco, vati, Ka vu tẽla oku popeliwa, te wa seviwi evamba ndocihõlo ca Mose.

² Eci kueya onjuela kuenje Paulu la Barnaba va hoya lavo ca lua, oco ekongelo lia tukula Paulu la Barnaba la vamue vakuavo oku enda ko Yerusalãi ha va sokiya ondaka yaco lovapostolo lakulu.

³ Oco, eci va katuiwa lekongelo, va pita vo Foinike lo vo Samária kuenje va sapula epongoloko lia vakualofeka. Ca sanjuisa ca lua vosi vakuomanji waco wa Kristu.

⁴ Eci veya ko Yerusalãi va tambuiwa lekongelo lovapostolo kuenda akulu, kuenje va sinumula ovina viosi Suku a linga lavo.

⁵ Puãi oloñame vimue via tiamela kocisoko ca va Fariseo via votoka viti, Ca sesamela oku va sevisa evamba, kuenda oku va handeleka okuti va tava kovihandeleko via Mose.

⁶ Oco ovapostolo lakulu va liongolola oku vangula ondaka yaco.

⁷ Oco, eci va lihoya ca lua, Petulu wa votoka kuenje wa popia lavo hati, Ene a vamanji, ene vu ci okuti, tunde koloneke viefetikilo, Suku pokati kene wa nolapo ame okuti, komẽla wange, oko vakualofeka va yevela ondaka yiwa, kuenje va yi tava.

⁸ Kuenje Suku, u wa kũlĩha ovitima, eye wa va imbila uvangi, kuenje wa va iha Espiritu Sandu ndeci a li eca kokuetu.

⁹ Eye ka pañuile pokati ketu lavo, puãi wa yelisa ovitima viavo lekolelo.

¹⁰ Oco he, nye vu setekela Suku poku kapa kapasingo oloñame okanga yimue yokuti, ndaño olosekulu vietu ndaño etu muẽle, ka tua yi tẽlele oku yambata.

¹¹ Puãi etu tua kolela okuti tu popeliwa locali ca Ñala Yesu, ndovo.

¹² Oco owiñi wosi wohako, kuenje va yevelela Barnaba la Paulu eci va sinumula ovilimbu lovikomo Suku a linga lavo pokati ka vakualofeka.

¹³ Eci va liweka Tiago wa kumbulula hati, A vamanji, njeveleli.

¹⁴ Simono wa lombolola ndeci tete Suku a nyula vakualofeka ha nolela onduko yaye epata.

¹⁵ Eci ca lisoka lolondaka viovaprofeto, ndeci ca sonehiwa citi,

¹⁶ Noke niuka, kuenje numbulula onembele ya Daviti ya papuluka. Ovitungilo viaco ndi vi tunga vali, kuenje ndi yi katula,

¹⁷ okuti ocisupe comanu ci sanda Ñala, ndaño vakualofeka vana va tukuiwa londuko yange.

¹⁸ Oco ca popia Ñala, u o linga ovina evi viosi. Ovina evi via kũlĩhiwa la Suku tunde kosiahũlu.

¹⁹ Oco, ame nda soka siti, Ka tu ka sakalaisi vakualofeka va pongolokela ku Suku.

²⁰ Puãi tu va soneheli, tuti, Va likandangiye kovina via kola vioviteka, kuenda koku pekelisa, lo kovina via lekiwa ekõle, kuenda kosonde.

²¹ Momo, tunde kosiahũlu, vovaimbo osi, mua kala kala ava va lombolola Mose, momo ovisonehua viaye vi tangiwa volosunangonga asambata osi.

²² Oco ovapostolo lakulu lekongelo liosi va sima vati, Ciwa nda pokati kakulu tu nolapo vamue, okuti tu va tuma ka Antiokea kumue la Paulu la Barnaba. Oco va nola Yuda wa tukuiwa Barsamba, la Siluano, haivo ovasongui vumanji waco.

²³ Va soneha ukanda kuenje vo tuma peka liavo vati, Etu tuvapostolo kuenda akulu, haetu tuvamanjene, tu u soneheli, ene vuvamanjetu vakualofeka vu kasi ka Antiokea lo ko Suria kuenda ko Kilikiya. Epasu liwa.

²⁴ Tua yeva okuti vamue va tunda kulo, puãi ka va tumiwile letu, veya kokuene, kuenje vo tatamisi lolondaka loku vu tokotisa vovitima.

²⁵ Oco etu vosi tua kala vonjango tua soka tuti, Ciwa oku nola akulu ha tu va tumi kokuene kumue la vakuetu va soliwa, Barnaba la Paulu,

²⁶ haivo va tumbikila ovimuenyo viavo onduko ya Ñala yetu Yesu Kristu.

²⁷ Oco tua tuma Yuda la Siluano, okuti olondaka tua soneha haivio vo lomboluili lomẽla

²⁸ Espiritu Sandu letu, tua tava okuti ka tu vu tuika ocilemo cimue. Tuo kisiki ño vimue okuti,

²⁹ vu yuvula ovina via lumbiwa koviteka, kuenda osonde, lovina via lekiwa ekõle, kuenda oku pekelisa. Nda vu litata kovina viaco vu kala ciwa. Lalipo.

³⁰ Eci va katuiwa ndomo va lokila ka Antiokea. Oco vongolola omanu vaco vosi kuenje va eca ukanda.

³¹ Eci vo tanga va sanjukila elembeleko liawo.

³² Kuenje Yuda la Siluano, omo lavovo ovaprofeto, va lungula vakuomanji waco lolondaka via lua, kuenje va va kolisa.

³³ Eci va kalako okasimbu, oco vamanji va liusika lavo lombembua kuenje va tiukila kuava va va tumile.

³⁴ Siluano puãi wa soka hati, Ame ñala ño kulo, oco Yuda wa enda lika liaye ko Yerusalãi.

³⁵ Puãi Paulu la Barnaba va kala ka Antiokea oku longisa loku kunda ondaka yiwa ya Ñala. Vakuavo va lua va kalavo kumue lavo.

³⁶ Eci pa pita oloneke vimue Paulu wa popia la Barnaba hati. Tu ende, tu ka pasule vamanjetu va kasi vovaimbo osi omo tua longaisa ondaka ya Ñala, ha tu va nyula ndomo va kasi.

³⁷ Barnaba wa yongola oku enda la Yoano wa tukuiwa Marko.

³⁸ Paulu puãi ka tavele oku enda lomunu wa litepele ale lavo ko Pamfulia kuenje kaile lavo kupange.

³⁹ Oco va liyenja ca lua kuenje ca nena oku litepa. Barnaba wambata Marko kuenje va enda lonaviyu toke ko Kupro.

⁴⁰ Paulu puãi wa nola Siluano kuenje, eci vamanji vo kundika kocali ca Ñala, oco wa tunda.

⁴¹ Wa pita ko Suria lo ko Kilikia oku kolisa alongelo.