OVILINGA 13 - Embimbiliya - Bíblia Sagrada em Umbundu

¹ Vekongelo lio ka Antiokea mua kala ovaprofeto lalongisi, olonduko viavo vievi, Barnaba, la Sumone haeye Katekava, la Lukiu u Kurene, la Manane eye wa tekuiwa lepalanga Herode, kuenda Saulu.

² Osimbu va kala loku likutilila ku Ñala loku likandangiya okulia, oco Espiritu Sandu wa linga hati, Nepelipo Barnaba la Saulu ha va lingi upange nda va kovongela.

³ Oco, eci va likandangiya okulia kuenje va likutilila, va va kapa ovaka kuenje va va katula.

⁴ Oco va tumiwa le Espiritu Sandu. Oku fetika ungende va lokila ko Selukia, oku tunda ko Selukia va endela vonaviyu toke ko Kupro.

⁵ Eci va pitila vo Salami va kundila ondaka ya Suku volosunangonga via va Yudea. Yoano wa linga oñuatisi yavo.

⁶ Eci va pita vocifuka cosi va pitila ko Pafu, kuenje oko va sanga ulume umue u Yudea, onduko yaye Bar Yesu, eye uprofeto wesanda, haeye ocimbanda,

⁷ haeye wa kala kumue lepalanga Sergio Paulu. Sergio Paulu, ukualondunge, haeye wa laleka Barnaba la Saulu momo wa yongola oku yeva ondaka ya Suku.

⁸ Puãi ocimbanda Elumasi, momo oco ca lomboloka onduko yaye, wa va patãla, momo wa yongola oku konyuisa epalanga ketavo.

⁹ Puãi Saulu, haeye wa tukuiwavo Paulu, haeye we yuka Espiritu Sandu, wo tunguila ovaso,

¹⁰ kuenje wa linga hati, amõla eliapu, onyali wesunga liosi, amunu we yuka elimbi liosi levĩho liosi, ku liweka hẽ oku pengisa olonjila via suñama via Suku?

¹¹ Kaliye, ota, eka lia Ñala li ku wila kuenje o linga omeke, ku moli handi ekumbi. Tuli a ci popia haico ovaso o vuvala, lowelema wo wila. Wa fetika oku papayata loku vanjiliya ava vo kuatela kombueti.

¹² Oco, epalanga, oku mola eci ca lingiwa, wa tava momo wa komoha ovilongua via Ñala.

¹³ Oco Paulu lava va kala laye va endela vonaviyu oku tunda ko Pafu, kuenje va pitila ko Perga ko vo Pamfulia. Yoano puãi wa litepa lavo kuenje wa tiukila ko Yerusalãi.

¹⁴ Oku tunda ko Perga va amako, yu veya ka Antiokea ko Pisidia. Eteke liesambata va iñila vosunangonga kuenje omo va tumala.

¹⁵ Kovaso yoku tanga ovihandeleko lovaprofeto oco akulu vosunangonga va tuma kokuavo vati, Akuetu, nda vu kuete ondaka yoku lungula, kundi ño.

¹⁶ Oco Paulu wa votoka, kuenje oku payula, wa linga hati, Alume va Isareli, lene wa sumbili Suku, yeveleli.

¹⁷ Suku yomanu ava va Isareli wa nola olosekulu vietu, yu wa kemainyaisa omanu vaco osimbu va kala ve Egito, kuenje wa va tundisa ve Egito lokuokuo kua kola.

¹⁸ Ca soka ndakui akuãla kanyamo wa va lela ndonjali vekalasoko.

¹⁹ Eci a nyõla epanduvali liolofeka vo Kanana oco wa va piñalisa osi yavo ovita vikuãla kanyamo kanyamo akui atãlo.

²⁰ Kovaso yaco, wa va iha olonganji toke kuprofeto Samuele.

²¹ Oco va pinga osoma, kuenje Suku wa va iha Saulu, omõla a Kisi, ukuepata lia Benjamini. Eye wa viala akui akuãla kanyamo.

²² Eci a vopako oco wa katula Daviti ha lingi Soma yavo, yu wo wimbila uvangi hati, Nda sanga Daviti, omõla a Jese, haeye ulume ukuotima wange, o lingainga ocipango cange cosi.

²³ Suku wopa kombuto ya Daviti onjovoli ya Isareli yokuti Yesu, ndeci a likuminya.

²⁴ Osimbu Yesu keyile handi, Yoano wa kundila va Isareli vosi, oku vetiya epapatiso li linga ondimbukiso yoku likekembela akandu.

²⁵ Eci Yoano a kala kesulilo liupange waye oco wa popia hati, Wa simi nye, ame ame elie? U wa simili okuti ame, hameko. Puãi konyima yange kuiya umue okuti ame si sesamela oku u lula olohaku kolomãi viaye.

²⁶ Akuetu, amãla vepata li. Avirahama kuenda ava pokati kene wa sumbili Suku, ondaka yepopelo eli ya tumiwa muẽle kokuetu.

²⁷ Ava va tunga vo Yerusalãi lolombiali viavo, omo ka vo limbukile, lomo olondaka viovaprofeto, vina via tangiwa asambata osi, ka via va lombolokele, oco va vi tẽlisa eci vo pisa.

²⁸ Ndaño ka vo sangele leko lia sesamela okufa, haimo va pinga Pilato okuti ipaiwa.

²⁹ Eci va linga ovina viosi vio sonehiwila oco vo tulula kuti, kuenje vo kenda veleva.

³⁰ Suku puãi wo pindula ku vakualufa,

³¹ kuenje oloneke via lua, a limolehisa kuava va enda laye eci a tunda ko Galilea oku iya ko Yerusalãi, haivo cilo va linga olombangi viaye komanu.

³² Etu tu vu sapuila ondaka yiwa yokuti ohuminyo yina Suku a likuminya lolosekulu vietu,

³³ wa tu yi tẽlisila etu, tumãla vavo, eci a pindula Yesu. Ondaka eyi yi kasivo vosamo yavali, yiti, Ove umõlange, etaili nda ku cita,

³⁴ Kuenda vali, kondaka yoku u pindula ku vakualufa okuti ka futi vali, Suku wa popia hati, Ndu muisi asumũlũho a kola a tunda ku Daviti hao a koleliwa.

³⁵ Oco, wa popiavo vosamo yikuavo hati, Ku tava okuti u Wove o kola o mola oku futa.

³⁶ Momo Daviti, eci a linga ocipango ca Suku vocitumbulukila caye, wa fa, wa kendiwila kumue lolosekulu viaye, kuenje wa mola oku futa.

³⁷ U puãi Suku wo pindula ka muile oku futa.

³⁸ Oco akuetu, limbuki okuti komunu waco oko ku u sapuilui ongecelo yakandu,

³⁹ kuenje vosi vo kolela o va yovola kovina viosi, okuti, nda kovihandeleko via Mose, ka vu tẽla oku yovuiwa kovina viaco.

⁴⁰ Oco lunguki sanga eci ca popia ovaprofeto ci vu kuata, cokuti,

⁴¹ Ene alomembuli vanji. Komohi loku nyõleha. Momo ñasi loku linga upange umue voloneke viene okuti, ndaño u sapuilui, haimo ko tava.

⁴² Eci va kala loku tunda va va pinga, vati, Olondaka evi ene vu tu vi sapuila vali kesambata liyako.

⁴³ Eci va tunda vosunangonga oco va Yudea va lua kuenda olomongoloke via sumbila Suku, va kuama Paulu la Barnaba. Ovo, eci va vangula lavo, va va lungula vati, Pandikisili vocali ca Suku.

⁴⁴ Esambata lia kuamamo, pa kamba naito imbo liosi oku ongolokela oku yeva ondaka ya Suku.

⁴⁵ Puãi, eci va Yudea va mola owiñi waco, va lenda itima, va patãla ovina via popiwa la Paulu kuenje vo sepula.

⁴⁶ Oco Paulu la Barnaba va popia lutõi, vati, Ca sungulukile okuti ondaka ya Suku yu kundiwili ene tete. Puãi, omo wa yi likali, kuenje wa lisimili hoti, Ka tua posokelele omuenyo ko pui, cilo tu enda ku vakualofeka.

⁴⁷ Momo oco ocikundi tua tambula ku Ñala, cokuti, Nda ku lingisa ocinyi ca vakualofeka, okuti o tuala epopelo toke kasulilo ongongo.

⁴⁸ Eci vakualofeka va ci yeva va yolela, kuenje va tumbangiya ondaka ya Suku. Vosi va noliwila omuenyo ko pui va tava.

⁴⁹ Kuenje ondaka ya Ñala ya sambukila kofeka yaco yosi.

⁵⁰ Puãi va Yudea va tutuminya akãi vakuambili yefendelo haivo va kemala, kuenda olosekulu viovimbo, yu va wenguila Paulu la Barnaba ema, kuenje va va tundisa vofeka yavo.

⁵¹ Paulu la Barnaba, puãi, va va tutumuila oneketela yolomãi viavo, kuenje va enda ki Ikoniyu,

⁵² Kuenje oloñame vie yuka onjolela kuenda Espiritu Sandu.