OVILINGA 12 - Embimbiliya - Bíblia Sagrada em Umbundu

¹ Koloneke viaco Soma Herode wa kuata vamue vakuekongelo oku va linga cĩvi.

² Wa ipa Tiago, huva a Toano, losipata.

³ Eci a limbuka okuti va Yudea va ci sola oco wa kuatavo Petulu. Ca kala koloneke viofesta yombolo ka yi kuete etumbisa.

⁴ Eci o kuata wo wimba vokayike, kuenje wo kundika kolohoka vikuãla viasualali oku u lava. Wa soka oku u tundisila komanu pana okuti o Pascoa ya pita.

⁵ Oco Petulu wa laviwa lutate vokayike, puãi ekongelo lia tongeka loku u likutilila ku Suku.

⁶ Oco uteke Herode a lalela oku u tundisa, uteke waco haiwo, Petulu wa pekela pokati kasualali vavali, haeye wa kutiwa lalienge avali. Olondavululi via kala puvelo oku lava okayike.

⁷ Ocipikipiki kua moleha ungelo wa Ñala, kuenje ocinyi ca tuila vokahondo. Ungelo wa veta Petulu pepati, wo pasula, kuenje wa linga hati, Pasuka lombili, oco alienge a loluka kovoko aye.

⁸ Ungelo wa popia laye hati, Iña pimo. Wala olohaku viove, kuenje wa ci linga. Ungelo wa popia vali laye hati, Lisikĩlĩla. Ñuame.

⁹ Oco wa tunda kuenje wo kuama, ndaño ka limbukile okuti, eci ci kasi loku lingiwa lungelo, cocili, puãi wa soka hati, Ñasi loku mola owima.

¹⁰ Eci va pitahãla ondavululi yatete leyi yavali, oco veya kombundi yutale yovimbo. Oyo ya va yulukila ño oyo muẽle. Oco va tunda, va pita voluwa lumosi, kuenje haico ungelo wo sia.

¹¹ Eci mueya olondunge Petulu wa linga hati, Kaliye nda ci limbuka okuti Ñala wa tuma ungelo waye yu wa mopela peka lia Herode, lo kovina viosi via lavoka va Yudea.

¹² Oco, eci a ci sokolola, wa enda konjo ya Maria ina ya Yoano wa tukuiwa Marko. Omu mua liongoluila va lua va kala loku likutilila.

¹³ Eci a totola kepito liombundi, oco ufeko umue, onduko yaye Roda, weya oku yevelelako.

¹⁴ Eci a limbuka okuti ondaka yaco ya Petulu, oco wa yolela enene okuti ka yikuluile ombundi, puãi wa tiukila lolupesi oku va sapuila okuti, Petulu o tãi pombundi.

¹⁵ Yu va popia laye vati, Vuyui. Eye wa toñomãla hati, Eye muẽle. Ovo vati, Ocilũlu caye.

¹⁶ Puãi Petulu wa tongeka loku totola. Eci va yikulula epito oco vo mola kuenje va komoha.

¹⁷ Puãi eye, eci a va kandangiya leka okuti voha, wa va sapuila ndeci Ñala o tundisa vokayike, kuenje wa linga hati, Ka sapuili Tiago la vamanji ovina evi. Noke wa tunda, wa enda kumue kuiñi.

¹⁸ Eci kua ca omele kueya onjuela hayititoko pokati kasualali, vati, Petulu he, ca pita ndati laye?

¹⁹ Oco, eci Herode o sanda kuenje ko sangele, wa sombisa olondavululi, yu wa handeleka hati, Ka va ipayi. Oco, Herode wa tunda vo Yudea, wa enda ko Kaisarea, oko a yotela.

²⁰ Oloneke viaco eye Herode wa tema ca lua la va Turo kuenda va Sidono. Oco, eci va linala la Blasto ukuenje wolohama via Soma, veya ku Herode lutima umuamue. Va sanda ombembua momo ofeka yavo ya tekuiwa lofeka ya Soma.

²¹ Oco, eteke limue lia tukuiwa, Herode wa wala uwalo wusoma, wa tumala kocalo caye, yu wa va kundila ohundo.

²² Oco omanu va sambiliya, vati, Ondaka eyi yosuku, hayomunuko.

²³ Kuenje haico ungelo wa Ñala o veta omo ka muisile Suku ulamba. Noke wa liwa lapuka kuenje wa fa.

²⁴ Puãi ondaka ya Suku ya amamako loku sandoka.

²⁵ Eci va mala upange wavo, Barnaba la Saulu va tunda ko Yerusalãi. Vambata Yoano wa tukuiwa Marko.