OVILINGA 10 - Embimbiliya - Bíblia Sagrada em Umbundu

¹ Ko Kaisarea kua kala ulume umue, onduko yaye Korneliu, haeye kesongo liohoka ya tukuiwa Ohoka ya Itália.

² Eye omunu wa sunguluka, wa sumbila Suku kumue la vakuanjo yaye vosi, wa eca eca oviali komanu, kuenje wa tuwa oku likutilila ku Suku.

³ Eteke limue kekumbi eye wa mola owima. Ungelo wa Suku wa moleha, weya kokuaye, wa popia laye hati, A Korneliu.

⁴ Korneliu, oku u tunguila ovaso wa lisalukako, oco hati, A Ñala, nye oco? Ungelo wa popia laye hati, Olohutililo viove loviali viove via pitila kilu ndonjivaluko kovaso a Suku.

⁵ Cilo, tuma alume ko Yopa. Va kopilile Simono u va tukola Petulu.

⁶ Wa sikila vonjo ya Simono uyaveki wovipa. Onjo yaco yi kasi konele yokalunga.

⁷ Eci ungelo wa kala loku popia laye a enda, oco Korneliu wa kovonga akuenje vamue vaye vavali, kuenje, pasualali vo vumba, wopapovo limue lia sunguluka.

⁸ Wa va lomboluila cosi ca pita kuenje wa va tuma ko Yopa.

⁹ Hẽla yaco, eci va kala vonjila, kuenje va kasi ale ocipepi limbo, oco Petulu wa londa kilu lionjo oku likutilila. Ca kala ekumbi pongunji.

¹⁰ Wa fetika oku kuata onjala ya lua kuenje wa yongola okulia. Puãi, osimbu va kala loku u sevela okulia, oco ocinjonde co kuata.

¹¹ Wa mola ilu li kasi upulule, locikuata cimue ci kasi loku loka. Ocikuata caco ca setahala elasola linene kuenje lia kala loku lowisiwila posi lasusu a kuãla.

¹² Mua kala ovinyama viosi viovolu akuãla, lapuka oposi, kuenda olonjila viovilu.

¹³ Kuo yevalela ondaka yiti, A Petulu, votoka, ipa, lia.

¹⁴ Puãi Petulu wa kumbulula hati, A Ñala, hacoko. Ane sia la lia cimue caño pamue cimue ca vĩha.

¹⁵ Kuo yevalela vali ondaka, yiti, Ca yelisa Suku ku ka ci tukule caño.

¹⁶ Eci ca lingiwa lutatu, kuenje haico ocikuata ca yeluiwa kilu.

¹⁷ Osimbu Petulu a kala loku tatãla vutima waye, hati, Ocinjoinjoi nda mola ca lomboloka ndati? oco alume va tumiwa la Korneliu, omo va pula ale onjo ya Siono, vava, va tãilili pombundi.

¹⁸ Va vilikiya oku pula vati, Simono hẽ, una wa tukuiwa Petulu, wa sikila kulo ale?

¹⁹ Osimbu Petulu a kala loku sokolola ocinjonde oco Espiritu wa popia laye hati, Ota, alume vatatu va kasi loku ku vanjiliya.

²⁰ Votoka. Loka. Kuende lavo. Ku ka kale latatahãi momo ame nda va tuma.

²¹ Oco Petulu wa lokila kalume vaco, yu wa linga hati, Ota, ame muẽle vu kasi loku mbanjiliya. Weyilili nye?

²² Ovo va kumbulula vati, Kesongo lietu, Korneliu, wa lunguiwa lungelo umue o kola oku ku tumila okuti wenda konjo yaye, momo o yongola yeva ondaka yove. Eye omunu wa sunguluka, haeye wa sumbila Suku, kuenje va Yudea vosi vo wimbila uvangi uwa.

²³ Oco wa va iñisa vonjo kuenje wa va yekisa. Hẽla yaco wa katuka, wa enda lavo, kuenje vamue vakuetavo vo ko Yopa vo sindikila.

²⁴ Eteke likuavo va iñila vo Kaisarea. Korneliu wa kala loku va talamela. Wa laleka vamue vakuositue waye, kuenda akamba vaye va velapo, kuenje va kala kumue laye.

²⁵ Eci Petulu a iñila, Korneliu wo tambula, wa wila posi, kuenje wo fendela.

²⁶ Petulu puãi wo votola, hati, Votoka. Lamevo ndimunu.

²⁷ Wa vangula naito la Korneliu, noke wa iñila vonjo omo a sanga va lua va liongolola.

²⁸ Oco wa popia lavo hati, Ene muẽle vu ci cokuti, umue u Yudea oku linala lukualofeka, pamue oku iñila vonjo yaye, ka ci tava. Puãi Suku wa ndekisa okuti ka ca sungulukile ame oku tukula omunu siti, waño, pamue wa vĩha.

²⁹ Oco, eci nda pañinyiwa, ndeya, sia patãlẽle. Oco mula siti, Nye wa ñovongeli?

³⁰ Kuenje Korneliu wa linga hati, Konyima yoloneke vikuãla, ola yilo haiyo, nda kala vonjo yange oku likutilila ohutililo yokekumbi. Ocipikipiki, kovaso ange kua moleha ulume wa wala uwalo u nina.

³¹ Wa popia lame hati, A Korneliu, ohutililo yove ya yevala, loviali viove via ivalukiwa kovaso a Suku.

³² Oco tuma ko Yopa, ka pañinye Simono wa tukuiwa Petulu, wa sikila vonjo ya Simono uyaveki wovipa, yi kasi konele yokalunga.

³³ Oco nda ku kovongela lonjanga. Wa linga ciwa omo weya. Oco cilo, etu vosi tu kasi mulo kovaso a Suku oku yeva viosi Ñala a ku iha oku popia.

³⁴ Oco Petulu wa popia hati, Nda limbuka ocili okuti Suku ka kuete ocame,

³⁵ puãi, volofeka viosi, wosi u sumbila loku linga esunga, u sungulukila.

³⁶ Wa kũlĩhi ondaka Suku a tuma ku va Isareli, ndomo a kundika Yesu Kristu, haeye Ñala ya vosi, oku kunda ondaka yiwa yombembua.

³⁷ Wa kũlĩhivo okuti ondaka yaco ya sapuiwa vo Yudea yosi, ya fetikila vo Galilea lepapatiso Yoano a kunda.

³⁸ Wa yevivo ndomo Suku a waveka Yesu u Nasara le Espiritu Sandu kuenda unene. Wa kũlĩhi ndomo eye Yesu a ñuala ñuala oku linga ciwa loku sakula vosi va kuetiwe lunene weliapu, momo Suku wa kala laye.

³⁹ Etu tulombangi viovina viosi a linga vofeka ya va Yudea lo vo Yerusalãi. Ovo, oku u nyoñamisila kuti, vo wipa.

⁴⁰ Suku puãi, wo pindula eteke liatatu, kuenje wo molehisa,

⁴¹ puãi hakomanu vosiko, te kokuetu tulombangi via noliwa ale la Suku, haetu tua lila lila kuenda tua nyuila nyuila kumue laye eci a pinduka ku vakuavilangu.

⁴² Kuenje wa tu usika hati, Kundili omanu. Imbi uvangi okuti ame, ame u Suku a tukuila oku linga onganji yava va kasi lomuenyo lava va fa.

⁴³ Ovaprofeto vosi vo wimbila uvangi, vati, Vosi va tava kokuaye va mola ongecelo yakandu vonduko yaye.

⁴⁴ Osimbu Petulu a kala loku popia olondaka evi oco Espiritu Sandu wa wila omanu vosi va yeva ondaka.

⁴⁵ Vakuevamba veya la Petulu, haivo va linga ale vakuetavo, va komoha ndomo ocali ce Espiritu Sandu ca eciwavo ku vakualofeka.

⁴⁶ Momo va va yeva ndomo va popia alimi aiñi aiñi loku pandiya Suku. Oco Petulu wa pula hati,

⁴⁷ Umue o tẽla oku timbuiya ovava okuti ava va kuata Espiritu Sandu ndetu muẽle ka va papatisiwa?

⁴⁸ Oco wa tuma okuti va papatisiwila vonduko ya Yesu Kristu. Kuenje vo pinga okuti o kalako oloneke vimue.