OVADIYA 1 - Embimbiliya - Bíblia Sagrada em Umbundu

¹ Ocitumasuku ca Ovadiya. Ñala Yehova wa pisa Edome. Letu tua yeva ondaka yaco ya Yehova, kuenda omunga ya tumiwĩla pokati kolofeka oku laleka omanu, yiti, Katuki! Tu u katukili lovita!

² Ondaka ya Yehova yoku pisa Edome yeyi; Tala! Nda ku kapa ndu o sule pokati kolofeka. O pembuiwa eci ca kãla.

³ Ove, ndaño wa tunga pokati kaleva ovawe, kuenda wa tumbika onjo yove kilu, loku likunda lutima, huti, Helie o ñupuila posi?— haimo epela liutima wove Ha ku liaña.

⁴ Ndaño o palãlẽla kupãla ndongonga, kuenje o tunga ocanju cove pokati kolombungululu, haimo hu kupula. Oco ca popia Yehova.

⁵ Ovimunu nda vi ku iyilila, pamue ovingumba vuteke, ka vivi lika evi vi tela oku ambata? Nda vakuakupunda ayuva va ku iyilila ka va si hẽ ovisiakata vimue? Ove puãi, oku nyõlẽha kuove! … ka ku popiwa!

⁶ Esau, okupundiwa kuaye ka ku popiwa. Ndeci va tingusola ovikuata viaye ca piãla enene!

⁷ Akamba vove vosi va ku limbika, va ku lupuisila toke kongave. Vana va linãla love va ku pakula. Akamba vove va koleliwa va ku tela onjanjo. Ndomo ca pita ka mua lombolokele.

⁸ Ca popia Yehova ceci, hati, Eteke liaco si nyõli hẽ olonoño vio ve Edome kuenda olondunge vio vomunda ye Esau?

⁹ A Temane, asualali vove va yokoka, kuenje vosi va kunduiwila komunda ye Esau.

¹⁰ Omo wa nyõla manjove Yakoba oco osõi yu ku kuta, kuenje o tepiwako otembo yosi.

¹¹ Eteke wa vanja ño locekelela osimbu vakualofeka va punda ovikuata viaye, kuenda vakuafeka yiñi va iñila volombundi viaye oku imbila Yerusalãi ocela,— eteke liaco ove wa kala nda umue pokati kavo.

¹² Puãi ka ca sungulukile ndomo wa fuanguila manjove keteke liohali yaye. Ka ca ku sesamẽlẽle ndomo wa yola epembe va Yuda eteke liokunyõlẽha kuavo. Ka ca sungulukile ndomo wa lipanda veteke lielamba liavo.

¹³ Ka ca posokele ndomo wa pita vombundi yomanu vange keteke liohali yavo. Ka ca sungulukile ndomo wa sanjukila ekundu liavo keteke liohali yavo. Kaciwako ndomo wa punda ovikuata viavo keteke lielamba liavo.

¹⁴ Ka ca sungulukile ndomo wa talama panyãha oku tateka ava va yongola oku puluka. Ka ca sungulukile ndomo wa eca kovanyãli ava va si oku puluka keteke liohali.

¹⁵ Momo eteke lia Yehova li li ocipepi, kuenje liya kolofeka viosi. Ndeci wa linga haico ci ku lingiwila. O fetuluinyiwila ovilinga viove.

¹⁶ Momo ndeci wa nyuila komunda yange yi kola, haico olofeka viosi via ku ñuala vi nyuanyua. Vi nyua, kuenje vi nyengenga, vi linga ndomanu ka va la kala lomuenyo.

¹⁷ Puãi komunda ya Siono ku kala vamue va puluka, kuenje ku kola. Epata lia Yakoba li kala vali lovikuata vialio muẽle.

¹⁸ Onjo ya Yakoba yi linga ondalu, lonjo ya Yosefe yi linga ulienge, kuenda onjo ya Esau yi linga ovinene. Va va yoka loku va mãla pe. Ka ku supi ndaño umosi kepata Ha Esau. Momo Yehova wa popia.

¹⁹ Vakua Sul va kuata omunda ye Esau. Vakuambuelo va kuata ofeka ya va Filisiti, va kuatavo ofeka ya Efarimi leyi ya Samária. Benjamini o kuata Gileada.

²⁰ Va Isareli va kasi vumandekua vo Hala ovo va kuata ofeka ya va Kanana toke ko Carefata. Olomandekua vioko Yerusalãi vi kasi vo Sefarade ovo va kuata ovaimbo o ko Sul.

²¹ Ovapopeli va londa komunda Siono ha va viala omunda ye Esau. Kuenje Yehova o viala.