OLOSAPO 8 - Embimbiliya - Bíblia Sagrada em Umbundu

¹ Ndunge hẽ ka kovonga? Noño hẽ ka vilikiya?

² Kanyaha alila lo volonjila, oko a talayama.

³ Kolombundi viovimbo, kovivelo viaco muẽle, oko a vilakaiyaila, hati,

⁴ Ene alume, ene muẽle ndo kovongi. Nda lipilikila komãla valume.

⁵ Ene wa kambi olondunge, lilongisi olondunge. Lene waveke, yeveleli.

⁶ Yeveleli ya, omo mopia ovina via piãla. Komẽla wange ku tunda evi via sunguluka.

⁷ Momo omẽla wange u vangola esunga, omẽla wesanda ndu nyale.

⁸ Olondaka viosi viomẽla wange viocili muẽle, ca penga pamue cuhembi ka cimo.

⁹ Viosi vi linga ocili kukualondunge, haivio vi sungulukila ava va sanga ukũlĩhĩso.

¹⁰ Kuati alungulo ange, opalata hayoko, kuenda uloño, ulu hawoko, ndaño ulu wa nõliwa.

¹¹ Momo olondunge via velapo, ovawe a tĩla a sule. Ovina viosi o livela ka vi lisoki lavio.

¹² Ame Ndunge, nda tunga la Nate. Ndi sanga uloño loku lunguka.

¹³ Oku sumbila Yehova oko oku suvuka evĩho. Epela, lemande, lonjila yĩvi, kuenda omẽla wuhembi, viosi ndi vi suvuka.

¹⁴ Kokuange ku li elungulo luloño wocili, haime ñuete olondunge lupami.

¹⁵ Eci ame ñasi olosoma vi viala, lakulu va tetolola lesunga.

¹⁶ Eci ame ñasi omãla volosoma va kuata uviali, kuenda olombuale vi viala oluali.

¹⁷ Ame sole ava va sole, lava va sandiliya va sanga.

¹⁸ Kokuange ku li ukuasi lesumbilo, ukuasi una u tumãla kuenda esumũlũho.

¹⁹ Apako ange a velapo, ulu u sule, ndaño ulu wa nõlĩwa. Onima yange ya velapo, opalata, ndaño eyi ya tila, yi sule.

²⁰ Ame ngendaila vonjila ya suñama, lovalila a sunguluka,

²¹ hã si muisa ukuasi vana va sole, loku yukisa oviseleko viavo.

²² Yehova wa ndulika kefetikilo liupange waye. Ame tete kovopange aye onahũlũlua.

²³ Nda sovuiwa kefetikilo kuna ka ku ci, oluali handi ka luko.

²⁴ Cina ka kua kaile okalunga oco va nyita, osimbu olono ka via tombokale handi ovava.

²⁵ Cina olomunda ka via kapiwile handi, kuenda oviwulu kaviko, oco nda citiwa.

²⁶ Cina eye ka lulikile handi olofeka lovisenge, ndaño oneketela yatete kilu lieve.

²⁷ Eci a sovola ovailu ame haiko nda kala, eci a ñualisa ocingondombela kilu liokalunga,—

²⁸ eci a kolisa ilu kilu, leci a tuiya olono viokalunga,—

²⁹ eci a seteka ulilo wokalunga, ndokuti ovava ka a pitahãla uhandeleko waye,— leci a seteka ociseveto coluali,

³⁰ oco ame nda kala laye ndomesele. Oloneke viosi eye wa sanjukila. Lame nda sanjuka kovaso aye otembo yosi.

³¹ Nda yolela muẽle olofeka violuali luaye, nda sanjukilavo omãla vomanu.

³² Cilo, amãla vange, njeveleli. Va sumũluha ava va lava lava olonjila viange.

³³ Tavi kalungulo ho lunguki, ko ka a likali.

³⁴ Wa sumũlũha omunu o njevelela, haeye o lavelela oloneke viosi kolombundi viange, loku talamẽla kovikuli viapito ange.

³⁵ Ocili u wa sanga ame o sanga omuenyo, haeye o muĩla esumũluho ku Yehova.

³⁶ U wa ndueyela o lipumbisa eye muẽle. Vosi va suvuka ovo va sole oku fa.