OLOSAPO 7 - Embimbiliya - Bíblia Sagrada em Umbundu

¹ Amõlange, lava olondaka viange, kuenda ovihandeleko viange vi patekela vutima.

² Lava ovihandeleko viange oco o kala lomuenyo. Kuenda ovisila viange vi tata ndomoliso.

³ Vi pandekela kovimuine viove kuosi wendaenda. Vi soneha vutima wove.

⁴ Popia la Ndunge huti, Ove mukãi wange. Tukula Noño huti, Ukuetu,—

⁵ ndokuti o ku popela kelãsãla, kocipuepue ci popia ño ombambe.

⁶ Momo nda vanjela ponjanela yovonjo yange,

⁷ kuenje nda mõla vamue ka va lungukile. Yu pokati kamãlehe vaco nda limbukilapo ukuenje umue wa kamba olondunge.

⁸ Yu wa pita kokololo ocipepi levindi liokonjo yaye, wa endela vonjila yi panda konjo yaye,

⁹ koluvumbulu, koñolosi, pokati kowelema wuteke.

¹⁰ Kuenje tala, ukãi umue wa ñualehẽla laye, wa wala uwalo wupuepue, haeye ukuatutu,

¹¹ ukuakulipilisa londaka yaye, haeye o tungayala, ka tumayala vonjo yaye,

¹² yu kolokololo, yu kovila, o lavakaila kavindi osi.

¹³ Kuenje wa kuata ukuenje waco, wo sipula, locipãla cutõi wa popia laye hati,

¹⁴ Nda ka lumbile ovilumba, etali nda telisa olohuminyo viange.

¹⁵ Oco nda tundila oku ku landula loku ku sandiliya, kuenje nda ku sanga.

¹⁶ Nda yala ale ula wange lolonyime, lolonyime violinyu yavala añi añi o ke Egito.

¹⁷ Nda lẽhisa ula wange la mura kuenda candala lakasia.

¹⁸ Enju, tu tẽlĩse ocisola cetu toke ku ca, tu lisanjuise locisola.

¹⁹ Momo ulume wange vonjo kemo, wa enda ungende wupãla,

²⁰ wambata ocipete colombongo peka. O tiuka eteke osai yi tunga ongalo.

²¹ Wo tamba lombambe ya lua, wo yula lolondaka viaye via leñela.

²² Ukuenje yu wo kuama ndongombe yi kasi loku enda kepondelo, pamue ndombambi yi panda konjanjo,

²³ toke usongo wa yasa komuma, pamue ndonjila yi yayuila kowiki, kuenje ka yi ci cokuti wa petuiwila omuenyo waye.

²⁴ Cilo, amãla vange, njeveleli. Tavi kolondaka viomẽla wange.

²⁵ Utima wove ka u ka pambukile kolonjila viaye. Ku ka tungayale volonjila viaye.

²⁶ Momo va nyõlẽha laye va lua, va pondiwa laye vakahandangala.

²⁷ Onjo yaye oyo onjila yokonjembo, ya lunga muẽle kolohondo viokufa.