OLOSAPO 6 - Embimbiliya - Bíblia Sagrada em Umbundu

¹ Amõlange, nda wa linga ombangi yukuẽle, pamue nda wa lisila oseo kukombe,

² nda wa litela onjanjo lolondaka viomẽla wove, kuenje wa kuatiwa muẽle lolondaka viomẽla wove,—

³ Amõlange, nda oco wa linga, omo o kasi ale povaka ukuẽle, oku lipopela linga ndomo: Kuende lombili, ka livondele lukuẽle.

⁴ Ovaso ove ka a ka kuate otulo, ovikutukutu ka vi ka suñile.

⁵ Lipopela ndohoha yi tila enyanga, pamue ndonjila yi tila ometuli.

⁶ Kuende kolunjinji acisiãi. Sokolola ovituwa vialuo hu lunguka.

⁷ Ka lu kuete osoma, pamue ocime, ndaño ombiali,

⁸ haimo lu vanjiliya ohuta yaluo yokondombo, kuenda lu ungola ovilia vialuo poku lombola.

⁹ Acisiãi, o pekela toke kekumbi li pi? Ekumbi li pi o pasuka kotulo tuove?

¹⁰ Mekonda liokatulo katito lokakusuñila kãno, kuenda okuliketika naito ovaka hu puyuka,

¹¹ oco uputu u ku sanga ndocingumba, kuenda usuke ndukuavita.

¹² Omunu uvi, haeye ondingohõle, o popia popia uhembi,

¹³ o pakola ovaso, o sesama olomãi, imbaimba onumbi lovimuine,

¹⁴ lutima waye wahuku o sovola evĩho loku sanomõla ovama,

¹⁵ oco ohali yu veta ocipikipiki, o teka ocipikipiki, ka sakuiwa vali.

¹⁶ Ku li ovina epandu Yehova a suvuka, epanduvali muẽle a nyale, vievi:

¹⁷ Ovaso epela,— elimi liuhembi,— ovaka a pesela osonde yu we lipua,—

¹⁸ utima u sokolola ovipango vĩvi,— olomãi vi yolokela kevĩho,—

¹⁹ ombangi yesanda yi popia uhembi,— kuenda u o sanomõla ovama pokati kava va situe.

²⁰ Amõlange, patekela ocihandeleko ca so. Ku ka tombe alungulo a nyõho.

²¹ Vi pandekela vutima wove, vi wala wala posingo yove.

²² Eci wenda viu ku songuila, eci o pekela viu ku lava, eci o pasuka vi vangula love.

²³ Momo ocihandeleko oco ovela, elungulo olio ocinyi, olondaka vioku longa ovio onjila yomuenyo,

²⁴ vi tela oku ku popela kukuokahonga, kuenda kombambe yelimi liocipuepue.

²⁵ Utima wove ka u ka livele eposo liaye. Ka ka ku tambe lovaso aye.

²⁶ Ocili, ombaisi yi ku nenela oku kamba ombolo, ocipuepue puãi ci sandiliya omuenyo wove.

²⁷ Ulume nga o tela oku angata ondalu okuti olonanga viaye ka vi pi?

²⁸ Pamue o tela oku endela pakala ondalu, okuti olomai viaye ka vi pi?

²⁹ Haico ci kasi lu enda kukãi wamale, wosi u lamba ka pumbi oku yambuiwa.

³⁰ Ka va sepula hẽ ocimunu nda civila onjala eci ca lambuka?

³¹ Kuenje nda ca sangiwa ci kuete oku feta olonjanja epanduvali, ndokuti eca ovikuata viosi viovonjo yaye.

³² Puãi u o linga uvaisi wa kamba olondunge. U o ci linga o linyõla eye muẽle.

³³ O sanga olombole losõi, epembe liaye ka limũha vali.

³⁴ Momo ukuelume u funguisa ulume. Eteke lioku fetuluinya ka kuete ohenda.

³⁵ Layimue ofeto a tava. Ndaño o wiha ukuasi wa lua haimo ka tulumuha.