OLOSAPO 5 - Embimbiliya - Bíblia Sagrada em Umbundu

¹ Amõlange, tava kolondunge viange. Vonguila etui kuloño wange,

² ndokuti o kala ukuesuluviko, lomẽla wove u tata ukũlĩhiso.

³ Momo omẽla wocipuepue u lola lola owiki. Olondaka viaye via leñela, ulela u sule.

⁴ Kefulilo puãi o vi lulisa ndondulu, o vi tuisa ndosipata ya tua nelembali.

⁵ Olomãi viaye vi lokila kokufa. Ananga aye a panda konjembo.

⁶ Ocili, ka endela vonjila yomuenyo, olonjila viaye via penga penga ño, kuenje eye ka ci kũlĩhile.

⁷ Cilo amãla vange, njeveleli. Ko ka tinduki kolondaka viomẽla wange.

⁸ Onjila yene yi kale ocipãla laye. Ko ka endi kuvelo wonjo yaye,

⁹ sanga vu pesela esumbilo liene, kuenda weci ovimuenyo viene ku umue ko kapeliko;

¹⁰ sanga vakuavo va sanjukila ukuasi wene, kuenda epako liovopange ene li enda konjo yukombe waño;

¹¹ kuenje kesulilo, eci ositu yene latimba ene a nyõlẽha,

¹² vu livela hoti, Avoyo, nda suvukile alungulo. Nda pembuile okulongiwa.

¹³ Sia pokuile kondaka yalongisi vange. Sia yevelile olondaka violondunguli viange.

¹⁴ Pa ñambele ño naito oku pisiwa okufa pekanga lia vakuetu.

¹⁵ Nyuanyua ovava ovocitapela cove, kuenda ana a tunda tunda vocisimo cove.

¹⁶ Olono viove hẽ vi sanduiwa ha vi lingi olondui viovava volokololo?

¹⁷ Vi linge ño viove, lika wove, ka vi ka linge via vamue vañi.

¹⁸ Ono yove yi sumũlũhe. Sanjukila ukãi wove wombutulua,

¹⁹ una wa soka ndombambi ya posoka, pamue ndohoha ya fina. Elembeleko liaye li ku sanjuise olonjanja viosi. Sanjukila ocisola caye oloneke viosi.

²⁰ Amõlange, nye o solela ukãi wamãle? Nye wa likondekela locipuepue?

²¹ Momo, olonjila viomunu vi molẽha kovaso a Yehova. Eye o lavulula olonjila viaye viosi.

²² Olohõle viondingaĩvi viu kuata, kuenje yi fila vovikolo viakandu aye.

²³ Yi fa omo ya kamba oku lipokuisa. Yi nyolẽha omo uveke wayo wa lua.