OLOSAPO 31 - Embimbiliya - Bíblia Sagrada em Umbundu

¹ Olondaka via Lemuele, osoma ya Masa, violongisa inaye vievi, hati,

² Amõlange, nye? Amõla imo liange, nye? Amõla olohuminyo, nye?

³ Ku ka ece ongusu yove kakãi, ndaño olonjila viove kuava va nyõla olosoma.

⁴ A Lemuele, hacolosomako, hacolosomako oku nyuanyua ovinyu. Hacolombialiko oku pula pula ovingundu,

⁵ sanga vi nyua, kuenje vivalako ovihandeleko ha vi pengisa esunga ku vakuahali vosi.

⁶ Eca ovingundu ku o kasi loku nyõlẽha, kuenda ovinyu kuava va kasi lotokua.

⁷ Va nyue, va ivaleko uputu wavo, kuenje ka va ivaluka vali ohali yavo.

⁸ Asama omẽla wove hu popela ovitende, hu tundila olunda vosi va yandulukiwa.

⁹ Asama omẽla wove, tetulula lesunga. Linga esunga kolohũkui lokolosuke.

¹⁰ O sanga ukãi wa sunguluka helie? Ocili wa velapo, olomota via tĩla vi sule.

¹¹ Utima wa veyaye wo kolela, eye ka kambi ukuasi.

¹² O linga veyaye ciwa, cĩvi hacoko, oloneke viosi viomuenyo waye.

¹³ O vanjiliya ovonya olomeme lalinya, ha sakalala lupange wovaka aye.

¹⁴ Wa soka lolonaviyu vioku fũla, upopa ovilia viaye kupãla.

¹⁵ O pasuka tupu ka kua cile, ha eci okulia konjo yaye, kuenda ongaso kafeko vaye.

¹⁶ O sokolola epia kuenje o li landa; o kũla ocumbo cayuva lupange wovaka aye.

¹⁷ O litika uvia wolohõlo vombunda; o pamisa ovoko aye.

¹⁸ O limbuka okuti ondando yaye yi silivila; uteke ovela yaye ka yimi.

¹⁹ Imba ovaka aye koku pota, ovaka aye a kuata ombundo.

²⁰ Oluila eka liaye kolosuke; amisa ovaka aye komanu va suka.

²¹ Ka kuete usumba wocikokoto eci o sokolola onjo yaye, vonjo yaye vosi va wala ovikutu viohusu.

²² O litungila olonyime via posoka, o wala ovalatanya lolohusu.

²³ Veyaye wa kemãla kolonjango, eci a tumãla pokati kakũlu vofeka.

²⁴ O tunga olonanga vielinyu ha vi landisa, kuenje eca ovivia ku vakuakufũla.

²⁵ Uwalo waye olohõlo lesumbilo, o yola eteke liya.

²⁶ Asama omẽla waye lolondunge; alungulo ohenda a kasi kelimi liaye.

²⁷ O tata ciwa onjo yaye, ka li ombolo yowesi.

²⁸ Omãla vaye vo pandula; veyaye layevo u sivaya, hati,

²⁹ Akãi va lua va lingainga ca posoka, ove puãi wa va velapo vosi.

³⁰ Ulambi ohembi, eposo ocina caño, puãi ukãi o sumbila Yehova o kemanyaiwa.

³¹ Ene amanu, u muisi onima yovaka aye. Ovopange aye o sivayale pokati komanu.