OLOSAPO 30 - Embimbiliya - Bíblia Sagrada em Umbundu

¹ Olondaka via Aguri omõla a Yake u Masa. Owanji a popia ku Iteli, ku Iteli muẽle, kuenda ku Ukale, wowu:

² Ocili ame simunuko; olondunge viomunu si kuete.

³ Sia lilongisile olondunge, ndaño ukũlĩhiso w'U o kola si kuete.

⁴ Wa la londa kilu yu wa lokako helie? Wa la kutika ofela peka liaye helie? Helie wa la kutila ovava puwalo waye? Wa kolisa ovivanja viosi violuali helie? Helie onduko yaye? Onduko yomõlaye helie? Ku pumbi oku yi kũliha.

⁵ Olondaka viosi via Suku via setekiwa okuti viocili; eye ombetateli yava vo kolela.

⁶ Ku ka vokiye kolondaka viaye sanga o ku vetela evelo kuenje o linga ohembi.

⁷ Ovina vivali nda ku lomba, ku ka vi lihale osimbu sia file.

⁸ Uhembi lesanda vi ñaile ocipãla. Ku ka ngavele usuke ndaño ukuasi.

⁹ Ndise okulia kua soka ño lame, sanga nda ñuta enene hu likala siti, Yehova helie?— pamue nda ndinga osuke, njiva, kuenje membuisa onduko ya Suku yange.

¹⁰ Ku ka lundile ukuenje ku cime caye, sanga o ku siñala kuenje ove o pia.

¹¹ Kuli vamue va siñala vaisiavo, kuenda ka va pandula vainavo.

¹² Kuli vamue va lisimila, vati, Tua yela.— Puãi kumbondo wavo ka va yelisuile.

¹³ Kuli vamue va imba ovaso avo vilu, lovisokopia viavo va vi petuila.

¹⁴ Kuli vamue ovayo avo olosipata, awundi avo olomoko, ha va nyõli olohũkui kilu lieve, lolosuke pokati komanu.

¹⁵ Etuli li kuete omãla vavali vati, Nyihe! Nyihe! Kuli ovina vitatu ka vi la tela. Kuli vikuala ka vi la linga viti, Ndoto— vievi:

¹⁶ Onjembo, imo liosiule, ongongo yi sukaila ovava, londalu ka yi la linga yiti, Ndoto.

¹⁷ Iso liu o fuanguila isiaye, pamue o lavisa inaye li tofuiwa lovikuamanga viovocimbota kuenje li liwa lolohokohoko.

¹⁸ Ovina vitatu vi ñomohisa enene, vikuãla muẽle ka via ndombolokele, vievi:

¹⁹ Onjila yongonga yulombo kilu, onjila yonyoha kesenje, onjila yonaviyu vokalunga, lonjila yulume lukãi.

²⁰ Onjila yocipuepue yeyi: O lia, o lipuenya komẽla, kuenje o popia hati, Sia lingile cimue cĩvi.

²¹ Ovina vitatu vi lulumisa osi; vikuãla ka yi vi tẽla, vievi:

²² Upika nda o linga osoma, eveke nda li kuta,

²³ ukãi wa suvukiwa nda o kuela, ufeko nda o linga kapiñala ka Dona yaye.

²⁴ Ovina vikuãla vitito kilu lieve, puãi vi kuete olondunge via lua, vievi:

²⁵ Olonjinji, epata ka lia kolele, haimo vi vanjiliya okulia kuavio kondombo.

²⁶ Olohuita, epata ka lia kolele, haimo vi tunga olonjo viavio kasenje.

²⁷ Olohuma ka vi kuete osoma, haimo vi enda, vi tula viosi avanda.

²⁸ Ekokolo o li kuata peka liove, haimo li kala vayemba olosoma.

²⁹ Ovina vitatu vi enda ca posoka; vikuãla olongendo viavio viwa, vievi:

³⁰ Ohosi onõi pokati kovinyama, ka yi pambukila cimue.

³¹ Ekondombolo li enda epela, ocitupi cohombo, kuenda osoma yi lenga kovaso omanu vaye.

³² Nda wa linga uveke hu lituni, nda wa simale cĩvi, likuata komẽla.

³³ Momo oku saka asenjele ku lingisa ongundi, oku sĩla kenyulu ku tundisa osonde, oku sinda konyeño ku tunda ema.