OLOSAPO 3 - Embimbiliya - Bíblia Sagrada em Umbundu

¹ Amõlange, ku ka ivaleko alungulo ange. Patekela ovihandeleko viange.

² Momo ovio vi ku muisa oloneke via lua, lanyamo omuenyo, kuenda ombembua.

³ Ohenda locili ka vi ka ku tunde, vi pandekela kosingo yove, vi soneha vutima wove,

⁴ oco o soliwa, kuenje o sanga oluhimo luwa ku Suku lo komanu.

⁵ Kolela Yehova lutima wove wosi. Ku ka tiamẽle kolondunge viove muẽle.

⁶ U sumbila kolongenda viove viosi, kuenje eye o suñamisa olonjila viove.

⁷ Ku ka kolele olondunge viove. Sumbila Yehova, tinduka kũvi.

⁸ Oco etimba liove li kuata uhayele, kuenda akepa ove a kavuluka.

⁹ Vumba Yehova lovipako viove, lelombolo lia tete kokungula kuove kuosi,

¹⁰ oco olosila viove vi yuka olomema, kuenda ocikoselo ci supoka ovinyu.

¹¹ Amõlange, ku ka pukule okupindisa kua Yehova. Okulonga kuaye ka ku ka ku kume.

¹² Yehova o pokuisa u a sole, ndeci ci lingainga onjali lomõlaye a sanjukila.

¹³ Wa sumũlũha omunu o sanga Ndunge, kuenda omunu o limuisa uloño,

¹⁴ momo ondando yaye ya velapo, yopalata yi sule, ukuasi waye wa velapo, wulu u sule.

¹⁵ O silivila muẽle, wa tĩla ca lua, olomota viondongo vi sule. Cosi omunu a livela ka ci lisoki laye.

¹⁶ Peka liaye liondio pa li oloneke via lua viomuenyo, pepĩli ukuasi lunene.

¹⁷ Olonjila viaye via sunguluka; kolohoka viaye ombembua lika.

¹⁸ Eye uti womuenyo kuava vo kuatelela. Ava vosi vo kuata va sumũlũha.

¹⁹ Yehova wa sovola oluali lolondunge. Wa lulika ilu luloño.

²⁰ Luloño waye wa tumuhĩsa ovava, haiwo a lokisa lawo owume u tunda kalende.

²¹ Amõlange, tata olondunge lutate, ka vi ka ku pusumuhe,

²² kuenje vi linga omuenyo wutima wove, kuenda eposo liosingo yove;

²³ oco wenda ciwa vonjila yove, okuti omai yove ka yi likasulapo.

²⁴ Nda o tumãla ku kuata usumba; eci o pekela, otulo tu posoka.

²⁵ Oco ku yokokela ocisalu ciya ocipikipiki, ndaño ekundu li veta ondingaĩvi.

²⁶ Momo Yehova eye ombetateli yove, haeye o popela omãi yove kolonjanjo.

²⁷ Ku ka likandangiye oku linga ohenda ava va yi sukila, nda o ci tẽla oku yi linga.

²⁸ Ku ka popie lukuẽle huti, Kuende yapa, tiuka noke. Hẽla oco hu ihã, —osimbu o kasi ale laco.

²⁹ Ku ka simĩle cimue cĩvi ukuẽle o lisungue laye, haeye wa ku kolela.

³⁰ Ku ka litĩle lomunu olivova eci ka ku lingile cimue cĩvi.

³¹ Ku ka livele ongusu yonjaki, ku ka nole onjila yimue yaye.

³² Momo Yehova o nyale ocimbinde, puãi o kolela ava va sunguluka.

³³ Esiñalo lia Yehova li wila vonjo yondingaĩvi, puãi esumũlũho lia Yehova li wila vonjo yondingesunga.

³⁴ Ocili eye o pembula olomembuli, puãi o linga ambombe ohenda.

³⁵ Vakualondunge va sumbiwa, aveke puãi va sepuiwa.