OLOSAPO 29 - Embimbiliya - Bíblia Sagrada em Umbundu

¹ U o lunguaiwa ca lua puãi haimo o pembula ño-o eye o nyõlẽha ocipikipiki kuenje ka sakuiwa vali.

² Eci olondingesunga vi viala, omanu va sanjuka, puãi eci olondingaĩvi vi viala, omanu va liyeya.

³ U o sole olondunge o sanjuisa isiaye, puãi u endaenda lovipuepue o sandola ukuasi waye muẽle.

⁴ Osoma yi viala lesunga yi tumãlisa ofeka, puãi osoma yi kisika ulambu wa lua yi yi nyõla.

⁵ U o sivaya ukuavo lombambe o petuila olomai viaye onjanjo.

⁶ Ukuevĩho o kuatiwa lonjanjo yevĩho liaye muẽle; puãi ukuesunga imbaimba ovisungo haeye o yolela.

⁷ Ondingesunga yi kũlĩha eci ca sesamela osuke; ondingaĩvi ka yi kuete ukũlĩhĩso waco.

⁸ Vakuemande va yuelisa imbo; vakualondunge va tulumula onyeño.

⁹ Nda ukualondunge o lisombisa leveke, eveke li keloha ño kuenda li yola, loku tula lakamue.

¹⁰ Olomondi vi nyale u wa pua eko; vakuevĩho va sanda omuenyo waye.

¹¹ Eveke li lekisa onyeño yaye yosi, ukualondunge puãi o yi likandangiya.

¹² Nda osoma yi yevelela kuhembi, akuenje vaye vosi va vĩha.

¹³ Ohukui londiandia va ñualẽhela; Yehova o va tuisila ocinyi caye, kavali kavo.

¹⁴ Nda osoma yi tetuluila olohũkui lesunga, omangu yaye yi kolisua hũ.

¹⁵ Ombueti lalungulo vi eca olondunge, puãi omõla wa pañuiwa o kutisa inaye osõi.

¹⁶ Eci olondingaivi vi viala, akandu a lova, puãi vakuesunga va mõla okunyõleha kuavio.

¹⁷ Pindisa omõlove kuenje o ku kavuluisa, haeye o sanjuisa utima wove.

¹⁸ Apa ka peli oku sokoluila kovasoangenda omanu va nyõlẽha, puãi u o lava lava ovihandeleko wa sumũlũha.

¹⁹ Ukuenje ka pindisua lolondaka lika, momo ndaño o yeva ka pokola.

²⁰ O lete omimu ukuakupopia lonjanga? Kokuaye elavoko li sule, keveke elavoko lia velapo.

²¹ U o pindisa ukuenje waye lutate tunde kutila waye, kefulilo o sanga okuti wa linga ndomolaye woku licitila.

²² Ukuakanyama o wengola ovaima; ukuanyeño o lueyisa ca lua.

²³ Epela liomunu liu sepula, puãi u wonjuka o sumbiwa.

²⁴ U o lia locimunu wa suvuka omuenyo waye; o yeva esingo liaco puãi ku situlula.

²⁵ Usumba omunu a kuetele ukuavo onjanjo, puãi u wa kolela Yehova wa koka.

²⁶ Valua va livondela kombiali, puãi esunga liocili omunu o li sanga ku Yehova.

²⁷ Ukuesunga o nyale ondingohõle; ondingohõle yi nyale omunu endela vonjila ya suñama.