OLOSAPO 28 - Embimbiliya - Bíblia Sagrada em Umbundu

¹ Olondingaĩvi vi tila ndaño ka kuli u vi landula, puãi olondingesunga olonõi ndolohosi.

² Ofeka nda ya huka olombiali vi lova, puãi nda omanu vaco va sunguluka haivo vakualondunge uviali u tumãla ño-o.

³ Ohuasi yi lingaisa olosuke, eye ombela yi sosola ka yi si olomema.

⁴ Ava va yanduluka ovihandeleko ovo va sivaya olondingaĩvi, puãi ava va lava lava ovihandeleko ovo va yaka lavio.

⁵ Olondingaĩvi ka vi y evi esunga, puãi ava va sanda sanda Yehova va li yeva.

⁶ Osuke yendela vesunga liaye eye wa velapo; ohuasi yendela volonjila viaye via penga eye o sule.

⁷ U o lava ovihandeleko eye omõla ukualondunge, lu o livandeka lovilianu o kutisa isiaye osõi.

⁸ U o luisa ukuasi waye losindike pamue lonjulule u siliyila ukuahenda yolosuke.

⁹ U o tindula etui liaye kovihandeleko, elombelo liaye li linga ocinyuañi.

¹⁰ U o songuila vakuesunga vonjila yĩvi o fa vokueve kuaye muẽle; puãi ava va pua eko va piñala esumũlũho.

¹¹ Ohuasi yi lipanda hati, Nda lunguka,— puãi osuke yi kuete olondunge yi limbulula.

¹² Eci vakuesunga va yula kuli ulamba wa lua. Eci olondingaĩvi vi kula omanu va salama.

¹³ U o limbika akandu aye ka tela oku sumũluha, puãi u o litavela kuenje o tindukako eye o sanga ohenda.

¹⁴ U o sumbila Yehova wa sumũlũha, puãi u o sivaisa utima waye o sanga ohali.

¹⁵ Ndeci ohosi yi kumba kumba pamue ongue yi sakiya, haico ombiali yĩvi kolosuke.

¹⁶ Ombiali ya kamba olondunge ondiandia, puãi u o suvuka ocipululu amisako oloneke viaye.

¹⁷ Ulume wa pia losonde yomunu a linge onjomboloki toke kokufa. Lomue ka ko kuatise.

¹⁸ U endaela vesunga o popeliwa, Puãi u endaela volonjila via vĩha o kupukila vocitunu.

¹⁹ U o lima lima ovapia aye o kuta olombolo, puãi u o kuama ovina viaño o mõla usuke wa lua.

²⁰ Ngendevando o sanga asumũlũho a lua. Ngendalupesi ka puluka oku yambuiwa.

²¹ Oku amela omunu hakuwako puãi ũvi waco vamue vo lingila oku tambula okacimalañanya kombolo.

²² Oholotelo yi kuata onjanga yoku limuisa, ka yi ci cokuti usuke u u sanga.

²³ U o lungula omunu noke o soliwa ca velapo, ukuambambe ci sule.

²⁴ U o punda so yaye pamue inaye kuenje o linga hati, Hekanduko,— eye locinyõi vamuamue.

²⁵ Ukuotima wusesiame o wengula ovama, puãi u wa kolela Yehova o muisua ukuasi.

²⁶ U o likolela eye muẽle vutima waye eveke, puãi u enda enda lolondunge o puluka.

²⁷ Ukuakuavela olosuke ka suki, puãi u o sitika ovaso aye o sanga asiñalo a lua.

²⁸ Eci olondingaĩvi vi katuka omanu va salama, puãi eci vi nyõlẽha olondingesunga vi siata.