OLOSAPO 27 - Embimbiliya - Bíblia Sagrada em Umbundu

¹ Ku ka litambele eteke lia hela, momo ku ci eci eteke liaco li nena.

² Ukuẽle a ku sivaye, omela wove hawoko; ukombe a ku sivaye, elimi liove halioko.

³ Ewe li lema, eseke ocitele, puãi onyeño yeveke ya velapo viosi kokulema.

⁴ Ocikumbiti ci futuisa utima, onyeño yi samoha, puãi o tela oku tamalala lesepa helie?

⁵ Elalulo kutanya lia velapo, ocisola ca vundisua ci sule.

⁶ Olombole via totiwa lukuacisola via sunguluka; okusipula kunyali uhembi.

⁷ U we kutale o likala owiki, puãi ku wa lambuka cosi ci lula ci pepa.

⁸ Ndeci onjila yi sia sia ocanju cayo haico ci kasi ulume o sia sia onjo yaye.

⁹ Ulela lelemba liwa vi sanjuisa utima; lelungulo liekamba li sanjuisa omunu.

¹⁰ Ku ka nyuhe ekamba liove pamue ekamba lia so; ku ka ende konjo ya manjove eteke liohali yove. Ukuẽle o kasi ocipepi wa velapo, manjove o kasi kupãla o sule.

¹¹ Kuata olondunge amõlange, sanjuisa utima wange, oco nambulule u o njimbula.

¹² Omunu wa lunguka o mõla ũvi kuenje u yepa, puãi ava va kamba olondunge va enda ño kuenje va yambuka.

¹³ Kuata onanga yu wa liyekela onjeke yukombe; muẽle a linge onjeke nda wa liyekela onjeke yukualofeka.

¹⁴ U o lama ukuavo londaka ya lua eci a pasuka ociteketeke, cu tendiwila ndendamba.

¹⁵ Okupuapuala kueteke liombela, lukãi ukuakuyokoya ca soka.

¹⁶ Oku u lemela kua soka loku lemela ofela, pamue loku kuata ulela peka liondio.

¹⁷ Ndeci utale u lepika utale, haico omunu a lepika omunu.

¹⁸ U o lava ukuyu o lia kepako liawo, lu o tata cime caye o sanga esumbilo.

¹⁹ Ndeci ocipala ci molehela vovava ndomo ci kasi ocili, haico utima womunu u molehela vovilinga viaye.

²⁰ Ndeci konjembo lokokalunga lalimue eteke ku tẽla haico ovaso omunu lalimue eteke a tẽla.

²¹ Opalata oku yeveya, ulu oku totola, omunu o setekiwa lesivayo a tambula.

²² Ndaño o sulila eveke lowisi vocine haimo uveke waye ka u u tundi.

²³ Pindamua lolomeme viove; lava ciwa olongombe viove;

²⁴ momo tikuasi ko tumãla hũ, ndaño usoma hẽ, u tumãla toke kovitumbulukila viosi?

²⁵ Eci owangu u keluiwa, losungu yi tunda, leci owangu wa kukuta u selekiwa,

²⁶ oco otumeme tu eca uwalo, kuenje kolohombo ku tunda ondando yepia.

²⁷ Asenjele olohombo a tẽla eteku liove, kuenda eteku lionjo yove leli liafeko vove.