OLOSAPO 26 - Embimbiliya - Bíblia Sagrada em Umbundu

¹ Ndeci ocikakula ka ci tava kondombo pamue ombela kokuenye, haico esumbilo ka li sesamẽla keveke.

² Ndeci okangungu ka sonda sonda, pamue omiapia yi palala, haico endamba liaño ka liya.

³ Okavalu osikote, ocimbulu elienge, eveke ombueti konyima.

⁴ Ku ka tambulule eveke nduveke waye, sanga lovevo o lisoka laye.

⁵ Tambulula eveke nduveke waye, sanga o litambela olondunge viaye.

⁶ U o tuma ondaka leveke o litopola olomai viaye muẽle, kuenje o likokela ohali.

⁷ Ndeci ovolu ocilema a seluka haico olusapo vomẽla weveke.

⁸ Ndeci omunu a pandekela ewe vepipili haico omunu eca esumbilo keveke.

⁹ Ndeci ocanja colosongo peka lioholua, haico olusapo vomẽla weveke.

¹⁰ Omunu ukualondunge o talavaya upange waye muẽle; eveke li kapa kupange waye wosi ño omitambamba.

¹¹ Ndeci ombua yi tiukila vali kosanjo yayo, haico eveke li tongeka luveke walio.

¹² O lete omunu wa lipanda hati, Ndukualondunge? Eveke hise muẽle lomunu waco.

¹³ Ukuawesi hati, Vonjila muli ondumba, volokololo muli ohosi.

¹⁴ Ndeci epito li lisenga kolondevaliso, haico ukuawesi pula waye.

¹⁵ Ukuawesi o yava eka liaye velonga, oku li tuala vali komela cu kavisa.

¹⁶ Ukuawesi kokulisimila kuaye wa velapo kolondunge, olonganji epanduvali vi sule.

¹⁷ U o limba vema haliayeko, wa soka ndu wa kuata kovatui ombua yi pita ombamba.

¹⁸ Ndeci eyui li sandola ovitonga lovisongo lokufa,

¹⁹ haico omunu wa kemba ukuavo, hati, Hakupapalako hẽ?

²⁰ Pa kamba olohui ondalu yima; ka pali ukualombonde uyaki u pua.

²¹ Ndeci akala volutukuta, pamue olohui vondalu, haico lonjaki yi sanomõla ovama.

²² Olondaka viocisokui via soka ndovilia vi pepa. Viñila muẽle toke vokati kimo.

²³ Ndeci ociyo caño ca lañiwa lopalata, haico omela wombambe lutima ũvi.

²⁴ Ukuesuvu o livondela lomela waye, puãi vutima o seleka elimbi.

²⁵ Ndaño wa popia ombambe ku ko tave, vutima waye mu li ovinyuañi epanduvali.

²⁶ Ndaño esuvu liaye li tuvikua lulimbiki, haimo ũvi waye u limbulukilua kowiñi.

²⁷ U o fela okueve o famo, lu o tiñulula ewe, ewe liaco liu lundika.

²⁸ Elimi liuhembi li suvuka olongase vialio; omẽla wombambe u koka oku nyõlẽha.