OLOSAPO 25 - Embimbiliya - Bíblia Sagrada em Umbundu

¹ Olosapo vimue vikuavo via Salomone, via sondolola akuenje va Hesekiya, osoma ya Yuda, vievi:

² Ulamba wa Suku oku sitika alomboluilo alumbu aye; ulamba wolosoma oku moñolola olondaka.

³ Ndeci kilu kua lepa, loposi pa longa, haico itima violosoma ka vi moñoluiwa.

⁴ Tepisa eña kolomanya viopalata, kuenje ku tunda eci ocivinda ci tunga laco elonga.

⁵ Tundisa ondingaĩvi kovaso osoma, kuenje omangu yaye yi kolisua lesunga.

⁶ Ku ka likemainye kovaso osoma; ku ka talame pakope,

⁷ momo ca velapo oku ku pañinya hati, Enju kulo. Kaciwako oku ku amisila apa pa sule kovaso ombiali. Eci ca mõla ovaso ove

⁸ ku ka ci nene lonjanga kekanga, omo kefulilo hẽ o linga nye nda ukuẽle o ku kutisa osõi?

⁹ Vangula lukuẽle ove muẽle; ku ka sapule ondaka yukuẽle;

¹⁰ sanga u o yi yeva o ku kutisa osõi, lepembe liove ka li pui.

¹¹ Ondaka ya popiwa yu ya soka lotembo yaco ya linga ndapako ulu velonga liopalata.

¹² Ondunguli ya sunguluka ketui li yeva, ya soka ndocingẽlengẽle culu pamue etoloso liulu.

¹³ Ndeci ombambi yocikokoto yi kavuluisa omunu kotembo yoku ungula, haico omunga yocili kokuava vo tuma, yi kavuluisa ovitima via vacime caye.

¹⁴ Ndeci alende lofela, ombela mbu, haico omunu o lipandela ombanjaile ka ecele.

¹⁵ Ombiali yi lemelehua lolupandi lua lova. Elimi li onjuka li teya ekepa.

¹⁶ Nda wa sanga owiki, liako eci wa soka laco lika, sanga o lia calua kuenje o sanja.

¹⁷ Omai yove ka yi ka endaende enene vonjo yukuẽle, sanga wu kuma kuenje o ku suvuka.

¹⁸ U wa lingila ombangi yuhembi kukuavo, wa soka ndonjundo, pamue osipata, pamue usongo wa tua.

¹⁹ Okukolela ukuelimbi keteke liohali, kua soka ndeyo lia vola pamue okulu kua tunguka.

²⁰ U imbaila ovisungo ku-u utima waye u vala wa soka ndu o lula ocikutu keteke liombambi, pamue o kapa indangele kepute.

²¹ Nda unyali wove wa lambuka u lisa ombolo, nda o kuete enyona u nyuisa ovava.

²² Momo nda oco o linga wa kapa akala ondalu konumbutue yaye, kuenje Yehova o ku muisa onima.

²³ Ofela yokonano yi nena ombela, lelimi liusokui li felisa ocipala.

²⁴ Ca velapo oku yotaila pevindi liolusoka luonjo, vonjo yinene lukãi o yenja yenja hamoko.

²⁵ Ndeci ovava a talala komunu o kasi lenyona, haico londaka yiwa yi tunda kofeka kupãla.

²⁶ Ndeci ocisimo ci kuete ovava a venga, pamue ono ya vĩhisua, haico ukuesunga wa konyohela ondingaĩvi.

²⁷ Kaciwako oku lia ca lua owiki, oco lunguka lolondaka vioku pandula enene.

²⁸ Omunu ka tẽla oku likandangaya wa soka ndimbo lia papuluka, ka li kuete ocimbaka.