OLOSAPO 24 - Embimbiliya - Bíblia Sagrada em Umbundu

¹ Ku ka livele alume vãvi; ku ka livele oku kala pokati kavo;

² momo itima viavo vi sima sima undiandia, lovimela viavo vi popia popia emande.

³ Onjo yi tungiwa lolondunge, yi kolisiwa luloño.

⁴ Nda kuli ukũlĩhiso olohondo viayo vi yukisua ovina viosi viwa haivio via posoka.

⁵ Ukualondunge wa velapo, wa pama ketimba o sule. Ulume wa loñoloha wa velapo, ukualõhõlo o sule.

⁶ Momo Kapusu kolondunge endisa ciwa ovita; kolondunguli via lua kuli oku yula.

⁷ Eveke ka li pitila kolondunge omo via lepa, volusenje ka li popi.

⁸ U o sima sima oku sovola ũvi o tukuiwa usanumuli.

⁹ Evi via sokiyiwa luveke ekandu. Omembuli yi suvukiwa lomanu.

¹⁰ Nda wa konyoha keteke liohali, ca lomboloka okuti ongusu yove yitito.

¹¹ Popela ava va kasi loku tualiwa kokufa. Tiula ava va kasi loku enda loku luluma kepondelo.

¹² Ndaño wa linga huti, Ota, sia ci kũlĩhile,— u o kũlĩhisa ovitima hẽ, ka ci lete? U o lava lava utima wove hẽ, ka civo? Ka muisa hẽ omunu ndupange waye, omunu ndupange waye?

¹³ Amõlange, lialia owiki momo u pepa, latosi a loka loka kocingo a sõsa vomẽla yove.

¹⁴ Kũlĩha okuti haico ci kasi lolondunge vutima; nda wa vi sanga kuli muẽle onima, lelavoko liove ka li nyõlẽha.

¹⁵ Andingaĩvi, ku ka lavekele onjo yukuesunga, ku ka nyõle ocipuyukilo caye.

¹⁶ Momo ukuesunga o kupuka olonjanja epanduvali kuenje o votoka vali. Olondingaĩvi puãi vi lunduka lũvi.

¹⁷ Ku ka sanjuke omo unyãli wove a kupuka; utima wove ka u ka yolele omo a likonjoka,

¹⁸ sanga Yehova o ci lete kuenje cu sumuisa, lonyeño yaye u yupa.

¹⁹ Ku ka lisakalaise mekonda liolondingaĩvi; ku ka livele vakuakandu.

²⁰ Momo komunu ũvi ka kuli onima; ovela yondingaĩvi yima.

²¹ Amõlange, sumba Yehova losoma, kavali kavo ku ka va sinile;

²² momo kokuavo ku tunda oku nyõlẽha ocipikipiki; lokunyõlẽha kuaco ku tunda kokuavo helie o kui?

²³ Olondaka vimue vikuavo violonoño, vievi: Oku amẽla omunu kekanga hakuwako.

²⁴ U o popia londingaĩvi hati, Umamale, eye o siñaliwa haeye o pembuiwa lolofeka.

²⁵ Puãi ava va lungula ondingaĩvi ovo va kala ciwa, lesumũluho liocili li va wila.

²⁶ U o ku kumbulula locili, eye ekamba liocili.

²⁷ Pongiya ovina vi sukiliwa. Angiliya epia liove, oco o tunga noke onjo.

²⁸ Ku ka linge ombangi yoku pisa ukuẽle olivova; ku ka kembe lomẽla wove.

²⁹ Ku ka linge huti, Ndu linga ndomo a ndinga ame, pamue huti, Fetuluinya omunu caye omunu caye.

³⁰ Nda vinjuka kepia liukuawesi; nda nyula kocumbo cu wa kamba olondunge;

³¹ kuenje tala, cosi ca yunda lolosongo, ca sitikiwa loluyua. Ocimbaka caco ca papuluka.

³² Nda lengelela kuenje nda sokolola ciwa; nda vanja kuenje nda liupila olondunge.

³³ Okatulo katito, okakusuñila kaño; okuliketika naito ovaka poku pekela,

³⁴ kuenje uputu u ku sanga ndocingumba, kuenda usuke ndukuavita.