OLOSAPO 23 - Embimbiliya - Bíblia Sagrada em Umbundu

¹ Eci o tumãla poku lia lombiali, limbuka lolondunge eci ci kasi kovaso ove.

² Likalula anguli nda wa sapa.

³ Ku ka livele ovilia viaye vi sõsa, momo vielimbi.

⁴ Ku ka likavise no oku mõla ukuasi. Liwekako. Kuata olondunge.

⁵ Tuli ovaso ove a u mõla, wa tila, ocipikipiki wa lilulikila avava, wa palalela kilu ndongonga.

⁶ Ku ka lie kombolo yofufi; ku ka livele ovilia viaye vi sõsa.

⁷ Momo wa soka ndumue o sokolola vutima, haeye o ku pañinya hati, Lia, nyua,— haimo utima waye ka u kasi love.

⁸ Okambu wa lile o ka sanja, kuenje o pesela olondaka viove vi sõsa.

⁹ Ku ka vanguile kovaso eveke, momo o tomba olondunge violondaka viove.

¹⁰ Ku ka sondolole ulilo wonahũlũlua, pamue oku tepulula kovapia olosiwe.

¹¹ Momo pakisi yavo wa kola, eye o funda love ondaka yavo.

¹² Kapa utima wove kalungulo, lovatui ove kolondaka violondunge.

¹³ Ku ka liweke oku pindisa omõla, ndaño u veta lombueti ka fi.

¹⁴ Nda u veta lombueti, o popela omuenyo waye konjembo.

¹⁵ Amõlange, nda utima wove wa lunguka, lamevo utima wange u sanjuka.

¹⁶ Ocili, utima wange u yolela, eci omẽla wove u vangola evi via sunguluka.

¹⁷ Utima wove ka u ka livele olonjila violondingakandu. Kuamelela vusumba wa Yehova otembo yosi.

¹⁸ Momo nda oco, ku kala onima, lelavoko liove ka li nyõlẽha.

¹⁹ Yevelela amõlange, kuata olondunge; suñamisa utima wove vonjila yesunga.

²⁰ Ku ka kale pokati kolohõlua, ndaño pokati kovisapanu violositu,

²¹ oholua locilianu vi mõla uputu. Ayele a walisa omunu ovindambu.

²² Pokola ku so wa ku cita; ku ka lavise nyoho eci a kuka.

²³ Landa esunga, ku ka li landise vali; landa olondunge lalungulo luloño.

²⁴ So yondingesunga o yolela muẽle; u wa cita ukualondunge u sanjukila.

²⁵ Sanjuisa so la nyoho; u wa ku cita a yolele.

²⁶ Amõlange, nyihe utima wove; ovaso ove a lavulule olonjila viange.

²⁷ Momo elãsãla okueve kua longa, ukuovaisi ocisimo ca sukatela,

²⁸ o lavakaila ndocimunu, o luisa vakuevĩho pokati komanu.

²⁹ Elie o litetela? Elie o lisiõsiõla? Ukuavama helie? Elie o likekemba? Elie wa asiwa olongase olivova? Elie ukuavaso a kusuka?

³⁰ Ovo vana va tumãla osimbu lovinyu, vana va nyuanyua ovinyu via tengiwa.

³¹ Ku ka vanje ovinyu eci vi kusuka, eci vi tutuma vokopo, leci vi feloka ocili.

³² Kefulilo vi lumana ndonyoha, vi lumana muẽle ndenyenya.

³³ Vovaso muiya ovingoingoi; utima wove u tana tana evi viesanda.

³⁴ O linga ndomunu wa pekela pokati kokalunga, pamue ndu wa tumãla kongunji yonaviyu

³⁵ O popia huti, Va mbeta puãi ka ca mbalele; va nota olombole puãi sia ci yevele.

³⁶ Otembo yipi masuka si vi sandi vali?